Titu 2:1-15
2 Maa inde, rembue purangawaa kua nyenga supiwa.
2 Rexari kuaita apigawaita tuyuweita tiarama aintauu aintaukau, rexari tiarama aintaupuká retentu, rexari aintaumanduari satambika, rexari aintauruyari puranga, rexari aintaugustari amuita, rexari aintauiku santa.
3 Yawete yuiri kuaita kunyaita waimiita, rexari aintauwata puranga kua mundu upe, terexari aintaupurungita tenyuntu amu rese, terexari vinyu umprezu ainta, rexari aintaumbue kua purangawaa;
4 Rexari aintaumbue kuaita kunyaita pisasua urikuita imena, aintaugustari arama aintamenaita, aintamembiraita yuiri;
5 Aintaumbue ainta aintaumanduari arama satambika, aintauiku arama supiwa, puranga arama aintausaru aintaruka, puranga arama aintapia, aintauruyari arama aintamena nyenga, tiarama aintaumutenyuntu kua Deus nyenga.
6 Yawete yuiri rexari aintaumanduari satambika kuaita kurumiwasuita.
7 Asui inde, remunya puranga aintaumaa aintaumunya arama kuaye neyawe, asui rembue supiwa, respeitu irumu;
8 Asui repurungita inde nyenga purangawaa irumu tiwa aintaupuderi aintaumbeu puxi sese ape kuaita umuruanyana yande aintauyumutiĩ arama nyãse timaa aintauwasemu puxi aintaumbeu arama yaneresewara.
9 Asui rembeu ainta supe kuaita upurakiwaita aintauruyari arama aintapatrão panye maa rese, aintaumusuuri arama aintayuiri, tiarama aintauyusuaxara aintairumu;
10 Terexari aintaumunda, maa rexari aintaumukame supiwa ainta panye maa rese, aintaupuderi arama aintaumunya puranga sese kua nyenga Deus rese, kua umukaturuwaa yande. Yariku purangawaa Kristu irumu
11 Nyãse Deus purangasawa usikana aintarese umukaturu arama panye apigawaita;
12 Umbue yande yaxari arama yanesui kua puxuwerawa yamunyawaa kuxima, yaxari yuiri yanesui panye kua puxuwerawa yanepira uputari umunya, ape yaiku arama kua mundu upe satambika yamanduarisawa, yamunya arama purangawaa kuaye Deus uputariwaa yawe.
13 Kuiri yasaru kua purangawaa, yasaru yamaa uri ipurangasawa upe kua yaneDeus kirimbawawaa, kua Jesus Kristu umukaturuwaa yande.
14 Kua uyuxariwaa simutara yaneresewara umukaturu arama yande panye yanepuxuwerasawa sui, uyusi arama ixupe arama imiraita, iyaraita arama kuaita uputariwaita umunya purangawaa.
15 Rembeu ainta supe arama kuaita hambeuwaita inde arama, rembue ainta aintaukuawa arama aintaumunya puranga, rembeu ainta supe aintapekadu kirimbawa. Terexari aintaumutenyuntu inde.
