Reyumbuéwaá Bíblia resé até kuíri umuturusu ne saisusá Jeová rupí. Ne saisusá uyukirari píri arama reprecisari reyumbuéwara Bíblia. (1 Pedro 2:2) Repuderi reviveri pañhe ara. Ma reviveri arama kuayé, rerikuté remukirimbá ne amizade Deus irum.​—Releri João 17:3; Juda 21.

Reyumbué ramé píri Deus resé resu remukirimbá reruyarisá. Ne ruyarisá usu uajudari remuñhã arama maã umuríwaá Deus. (Ebreoita 11:1, 6) Resu reputari repituú remuñhã maã puxiwerawaá asuí remuñhã añhu maã purangawaá.​—Releri Ato 3:19.

Pañhe awá ugustari ñheenga purangawaá. Ape resu reputari rekuntari amuita supé kuá ñheenga purangawaá resé Jeová urikuwaá. Reyumbuéwara ramé Bíblia resé resu rekuá reusari Bíblia rembué arama amuita ma resé reyumbuéwaá.​—Releri Romawaraita 10:13-15.

Repuderi reyupiru rekuntari ne rumuaraita asuí ne anamaita irum. Ti reprecisari rekuntari puxiwera ta religião resé. Rekuntari añhu maã resé purangawaá Deus usuwaá umuñhã. Remuñhã yuíri maã satambikawaá. Ne rikusá puranga rupí repuderi rembué aintá puranga píri ne ñheengaita suí.​—Releri 2 Timóteo 2:24, 25.

Reyumbuéwara rupí resu remukirimbá ne amizade Jeová irum. Repuderi reriku Jeová mayé ne paya. Puranga retana, ti será?​—Releri 2 Korintowaraita 6:18.

Yepésá reprecisari reyumbuéwara Bíblia. (Ebreoita 5:13, 14) Repurandu yepé Umbeusáita Jeová resé irum umbué arama indé kuá livro Você Pode Entender a Bíblia! irum. Reyumbué píri ramé Deus resé resu repitá surí píri.​—Releri Luka 11:28; Tiago 1:25; 4:4, 8.

Reiku píri arama Jeová rumuara, reprecisari yuíri reyumuatiri imiraita irum. (Ebreoita 10:24, 25) Jeová uriku ñheenga purangawaá indé arama. Aé uputari reriku arama yepé vida supíwaá. Sá resikári kirimbá remuñhã maã aé uputariwaá repuderi kurí reviveri pañhe ara. Ti aikué amu maã puranga píriwaá yapitáwaá suí Deus rumuara.​—Releri 1 Timóteo 1:11; 6:19.