Éxodo 9:1-35
9 Jéeoba túuneʼ tu yaʼalaj tiʼ Moisés: «Xeen tu yiknal Faraóneʼ ka a waʼaltiʼ: ‹Lelaʼ letiʼe baʼax tsʼoʼok u yaʼalik Jéeoba, u Dios le hebreoʼoboʼ: «Chaʼa u bin in kaajal utiaʼal ka u adorartenoʼob.+
2 Chéen baʼaleʼ wa tercoech yéetel maʼ ta chaʼik u binoʼobeʼ,
3 ilawile, teen Jéeobaeʼ yéetel in podereʼ+ yaan in beetik u kíimil a walakʼ baʼalcheʼob. Yaan u kʼojaʼantal yéetel yaan u kíimil+ a walakʼ tsíiminoʼob, a walakʼ burroʼob, a walakʼ camelloʼob, a walakʼ wakaxoʼob bey xan a walakʼ tamanoʼob.
4 Chéen baʼaleʼ, teen Jéeobaeʼ, yaan in separartik u yalakʼ baʼalcheʼob le israelitaʼoboʼ, mix juntúul kun kíimil jeʼex kun kíimil u yalakʼ baʼalcheʼob le egipcioʼoboʼ»›».+
5 Tsʼoʼoleʼ Jéeobaeʼ tu yaʼalaj baʼax kʼiin ken úuchuk lelaʼ: «Tuláakal le baʼaloʼobaʼ sáamal ken u beet Jéeoba u yúuchul teʼ luʼumaʼ».
6 Le ka sáaschaj tuláakʼ kʼiineʼ Jéeobaeʼ tu beetaj jach jeʼex tu yaʼaliloʼ. Tuláakal u yalakʼ baʼalcheʼob le egipcioʼoboʼ káaj u kíimloʼob,+ chéen baʼaleʼ mix juntúul tiʼ u yalakʼ baʼalcheʼob le israelitaʼob kíimoʼ.
7 Faraón túuneʼ tu túuxtaj u j-meyajoʼob utiaʼal u yilkoʼob bix yanil u yalakʼ baʼalcheʼ le israelitaʼoboʼ, tuláakloʼob jaʼakʼ u yóoloʼob ka tu yiloʼob mix juntúul kimeniʼ. Chéen baʼaleʼ Faraóneʼ seguernaj u beetik u tercoil, yéetel maʼ tu chaʼaj u bin le israelitaʼoboʼ.+
8 Jéeoba túuneʼ tu yaʼalaj tiʼ Moisés yéetel tiʼ Aarón: «Yéetel tu kaʼapʼéelal a kʼabeʼexeʼ lóochʼeʼex u taʼanil junpʼéel horno. Le taʼan túunoʼ unaj u puʼulul kaʼanal tumen Moisés tu táan Faraón.
9 Le taʼan túunoʼ yaan u sen yaʼabtal bey jeʼex le polvooʼ, yéetel yaan u kʼiʼitpajal tiʼ tuláakal u luʼumil Egipto. Tsʼoʼoleʼ yaan u beetik u yantal nukuch llagaʼob tiʼ máak bey xan tiʼ baʼalcheʼ tiʼ tuláakal u luʼumil Egipto».
10 Letiʼob túuneʼ tu chʼaʼajoʼob u taʼanil junpʼéel hornoeʼ ka binoʼob tu táan Faraón. Moisés túuneʼ tu pulaj kaʼanal le taʼanoʼ ka káaj túun u chuʼupul yéetel nukuch llagaʼob u wíinklil le máakoʼoboʼ bey xan u wíinklil le baʼalcheʼoboʼ.
11 Le sacerdoteʼob ku beetkoʼob magiaoʼ maʼ páajchaj u yantaloʼob tu táan Moisésiʼ tumen jóokʼtiʼob nukuch llagaʼob, bey xan úuchik tiʼ tuláakal le egipcioʼoboʼ.+
12 Chéen baʼaleʼ Jéeobaeʼ tu chaʼaj u seguer u beetik u tercoil Faraón. Faraón túuneʼ maʼ tu yuʼubaj u tʼaan Moisés yéetel Aaróniʼ, úuch jach jeʼex tu yaʼalil Jéeoba tiʼ Moisésoʼ.+
13 Le ka tsʼoʼokeʼ Jéeobaeʼ tu yaʼalaj tiʼ Moisés: «Sáamal tempranoeʼ unaj a bin tu táan Faraón utiaʼal a waʼaliktiʼ: ‹Lelaʼ letiʼe baʼax tsʼoʼok u yaʼalik Jéeoba, u Dios le hebreoʼoboʼ: «Chaʼa u bin in kaajal utiaʼal ka u adorartenoʼob.
14 Wa maʼ ta chaʼik u bineʼ maas yaj ken in castigartilech, tsʼoʼoleʼ yaan xan in castigartik le máaxoʼob meyajtikechoʼ bey xan tuláakal a kaajal, utiaʼal ka a wojéelteʼ minaʼan uláakʼ máax jeʼex teen way yóokʼol kaabeʼ.+
15 Tumen wa ka in wóot kaʼacheʼ bejlaʼa tsʼoʼok in castigarkech paʼteʼ yéetel a kaajal yéetel kʼaakʼas kʼojaʼaniloʼobeʼ yéetel bejlaʼa úuch in xuʼulsech teʼ luʼumaʼ.
16 Chéen baʼaleʼ lelaʼ letiʼe baʼax oʼolal maʼ in xuʼulsech tak beoraaʼ: utiaʼal ka in weʼestech in poder yéetel utiaʼal ka kʼaj óoltaʼak in kʼaabaʼ tiʼ tuláakal yóokʼol kaab.+
17 Pero techeʼ láayliʼ nojbaʼal a taaskabaeʼ tumen maʼ a chaʼa u bin in kaajaliʼ.
18 Le oʼolaleʼ sáamal kex bey teʼ horaaʼ yaan in beetik u sen kʼáaxal bat,* mix juntéen ilaʼak u sen kʼáaxal bat tu luʼumil Egipto jeʼex le ken in beet u kʼáaxloʼ.
19 Le oʼolaleʼ túuxt aʼalbil ka oksaʼak tiʼ junpʼéel lugar seguro tuláakal a walakʼ baʼalcheʼob, a j-meyajoʼob bey xan tuláakal baʼax a tiaʼal. Tuláakal máak yéetel tuláakal baʼalcheʼ pʼaatal táankab le kéen kʼáaxak le batoʼ yaan u kíimil»›».
20 Le máaxoʼob meyajtik Faraón tu creertoʼob le baʼax tu yaʼalaj Jéeobaoʼ tu séebaʼanil tu beetoʼob u yokol u j-meyajoʼob bey xan u yalakʼ baʼalcheʼob tiʼ junpʼéel lugar seguro.
21 Chéen baʼaleʼ le máax maʼ tu creertaj le baʼax tu yaʼalaj Jéeobaoʼ tu pʼataj u j-meyajoʼob yéetel u yalakʼ baʼalcheʼob táankab.
22 Jéeoba túuneʼ tu yaʼalaj tiʼ Moisés: «Tichʼ a kʼab tu tojil le kaʼanoʼ utiaʼal ka kʼáaxak le bat tiʼ tuláakal u luʼumil Egiptooʼ.+ Le batoʼ yaan u kʼáaxal yóokʼol wíinik, yóokʼol baʼalcheʼ bey xan yóokʼol tuláakal le xíiwoʼob yéetel le cheʼob yaan tu luʼumil Egiptooʼ».+
23 Moiséseʼ tu tichʼaj le cheʼ tu tojil le kaʼanoʼ, Jéeoba túuneʼ tu beetaj u kíilbal cháak yéetel u kʼáaxal bat bey xan u yéemel kʼáakʼ* desde teʼ kaʼanoʼ. Jéeobaeʼ seguernaj u beetik u kʼáaxal bat yóokʼol u luʼumil Egipto.
24 Le táan u kʼáaxal le batoʼ ilaʼab xan bix u yéemel le kʼáakʼoʼ. Jach sen kʼaʼamchaj le batoʼ, mix juntéen ilaʼak u yúuchul junpʼéel baʼal bey tu luʼumil Egiptooʼ.+
25 Le batoʼ tu kʼaskúuntaj u luʼumil Egipto. Tu kíimsaj máak bey xan baʼalcheʼ, tu kʼaskúuntaj tuláakal le xíiwoʼoboʼ yéetel tu kaʼakachaj tuláakal le cheʼoboʼ.+
26 Chéen tu luʼumil Gosén, le tuʼux kajaʼan le israelitaʼob, maʼ kʼáax le batoʼ.+
27 Faraón túuneʼ tu túuxtaj tʼanbil Moisés yéetel Aaróneʼ ka tu yaʼalajtiʼob: «Beoraaʼ kin reconocertik tsʼoʼok in kʼebantal. Jéeobaeʼ maʼalob baʼax ku beetik, tiʼ teen yéetel tiʼ in kaajal yaan u culpail le baʼax ku yúuchlaʼ.
28 Kʼáat óolt tiʼ Jéeoba ka xuʼuluk u beetik u kíilbal le cháakoʼ yéetel ka xuʼuluk u beetik u kʼáaxal le batoʼ. Beyoʼ yaan in chaʼik a bineʼex».
29 Moisés túuneʼ tu yaʼalajtiʼ: «Chéen pʼelak in jóokʼol tiʼ le kaajaʼ yaan in líiʼsik in kʼab utiaʼal in orar tiʼ Jéeoba. Le cháak túunoʼ yaan u xuʼulul u kíilbal, yéetel le batoʼ yaan u xuʼulul u kʼáaxal, beyoʼ yaan a wojéeltikeʼ le luʼumaʼ u tiaʼal Jéeoba.+
30 Chéen baʼaleʼ in wojleʼ, kex beyoʼ, teech yéetel a j-meyajoʼobeʼ maʼ ken a beeteʼex baʼax ku yaʼalik Jéeoba Dios».
31 Le lino* yéetel le cebadaoʼ láaj kʼaschajoʼob, tumen le cebadaoʼ yaan kaʼach u yiʼij, yéetel le linooʼ maʼ xíitik kaʼach u looliʼ.
32 Chéen baʼaleʼ le trigo yéetel le espeltaoʼ* maʼ kʼaskúuntaʼaboʼobiʼ tumen después ka jóokʼoʼob.*
33 Moisés túuneʼ lukʼ tu táan Faraóneʼ ka jóokʼ tiʼ le kaajoʼ, ka tu líiʼsaj u kʼab utiaʼal u orar tiʼ Jéeoba. Ka túun xuʼul u kíilbal le cháakoʼ, u kʼáaxal le batoʼ bey xan u kʼáaxal le jaʼoʼ.+
34 Le ka tu yilaj Faraón tsʼoʼok u xuʼulul u kʼáaxal le jaʼ yéetel le batoʼ, yéetel tsʼoʼok u xuʼulul u jaatsʼ le cháakoʼ, kaʼa kʼebanchaji yéetel maʼ tu yuʼubaj tʼaaniʼ,+ u j-meyajoʼobeʼ bey xan tu beetiloʼoboʼ.
35 Faraón túuneʼ seguernaj u beetik u tercoil, le oʼolal maʼ tu chaʼaj u bin le israelitaʼoboʼ, úuch jach jeʼex tu yaʼalil Jéeoba tiʼ Moisésoʼ.+
Notas
^ Wa «granizo».
^ Maʼ xaaneʼ teʼelaʼ táan u tʼaan tiʼ bix fuerteil u léembal le cháakoʼ.
^ Lelaʼ junkúul xíiw suuk u paʼakʼal tu luʼumil Egipto utiaʼal u beetaʼal nookʼ.
^ Lelaʼ junpʼéel clase trigo maʼ jach finoiʼ yéetel suuk kaʼach u paʼakʼal tu luʼumil Egipto.
^ Wa «tumen pachal u cosechartaʼaloʼob».
