1 Corintios 13:1-13
-
Le yaabilajoʼ letiʼe u maas nojchiloʼ (1-13)
13 Wa kin tʼaan ichil le idioma ku tʼanik le máakoʼoboʼ bey xan ichil le idioma ku tʼanik le ángeloʼoboʼ, chéen baʼaleʼ minaʼan in yaabilajeʼ, kin suut bey junpʼéel u nuʼukulil paax de cobre ku yáambal u juumeʼ wa bey junpʼéel címbalo* chʼeʼej u juumeʼ.
2 Wa síiʼanten u páajtalil in profetizar yéetel in wojel tuláakal le baʼaloʼob taʼakaʼanoʼ* bey xan tuláakal le baʼax unaj u yojéeltaʼaloʼ,+ yéetel yaanten le bukaʼaj fe kʼaʼabéet utiaʼal in péeksik montañaʼoboʼ, chéen baʼaleʼ wa minaʼan in yaabilajeʼ mix baʼalen.+
3 Wa kin tsʼáaik tuláakal baʼax yaanten utiaʼal ka tséentaʼak u maasil+ yéetel kin kʼubik in wíinklil utiaʼal kíimil chéen utiaʼal in nojbaʼalkúuntkinba, chéen baʼaleʼ minaʼan in yaabilajeʼ,+ leloʼ mix junpʼéel utsil ku taasikten.
4 Le máax yaan u yaabilajeʼ+ yaan u paciencia*+ yéetel ku yeʼesik u yutsil.+ Le máax yaan u yaabilajeʼ maʼ tu yaatal u yóol yoʼolal baʼax yaan tiʼ u maasil,*+ maʼ tu nojbaʼalkúuntkuba, maʼ tu kaʼantal u yich,+
5 maʼ tu beetik baʼaloʼob suʼtsiltak,*+ maʼ tu kaxtik chéen u yutsil,+ maʼ tu séeb kʼuuxil,+ maʼ tu kʼaʼajsik le baʼax kʼaas ku beetaʼaltiʼoʼ,*+
6 maʼ tu kiʼimaktal u yóol yéetel le baʼaloʼob kʼaastakoʼ,+ baʼaxeʼ ku kiʼimaktal u yóol yéetel le jaajoʼ.
7 Tuláakal baʼal ku muʼyajtik,+ tuláakal baʼal ku creertik,+ tuláakal baʼal ku páaʼtik,+ tuláakal baʼal ku chúukpajal u yóol u muʼyajte.+
8 Le yaabilajoʼ mix bikʼin kun xuʼulul.* Chéen baʼaleʼ wa tsʼaʼan tiʼ máak u páajtalil u profetizareʼ, yaan u xuʼulul; wa tsʼaʼan tiʼ máak u páajtalil u tʼaan ich jejeláas idiomaʼobeʼ,* yaan u xuʼulul; wa yaan ojéelaleʼ, yaan u xuʼulul.
9 Tumen bejlaʼeʼ maʼ chúukaʼan le baʼaxoʼob k-ojloʼ+ yéetel maʼ chúukaʼan k-profetizariʼ;
10 chéen baʼaleʼ kéen kʼuchuk le baʼax chúukaʼanoʼ, le baʼax maʼ chúukaʼanoʼ yaan u xuʼulul.
11 Tin paalil kaʼacheʼ kin tʼaan bey paaleʼ, kin tuukul bey paaleʼ yéetel u naʼat paal yaanten; chéen baʼaleʼ beora tsʼoʼok in nojoch máaktalaʼ tsʼoʼok u xuʼulul in beetik baʼaloʼob jeʼex mejen paalaleʼ.
12 Tumen beoraaʼ maʼ jach claro k-ilik le baʼaloʼoboʼ, bey táan k-paktikoʼob tiʼ junpʼéel néen de fierroeʼ, chéen baʼaleʼ yaan u kʼuchul u kʼiinil k-ilik tuláakal baʼal jach jeʼex yaniloʼoboʼ. Bejlaʼeʼ maʼ in jach kʼaj óol Diosiʼ, chéen baʼaleʼ yaan u kʼuchul u kʼiinil in jach kʼaj óoltik tubeel jeʼex u kʼaj óoltmilen letiʼ tubeeleʼ.
13 Beora túunaʼ, ku pʼáatal le óoxpʼéel baʼaloʼobaʼ: fe, esperanza yéetel yaabilaj; chéen baʼaleʼ u maas nojchil tiʼ leloʼobaʼ letiʼe yaabilajoʼ.+
Notas
^ Lelaʼ junpʼéel u nuʼukulil paax bey jeʼex le platillos ku meyaj bejlaʼa utiaʼal u yúuchul paaxoʼ.
^ Wa «le baʼaloʼob santoʼob taʼakaʼanoʼ».
^ Wa «maʼ celosoiʼ».
^ Wa «chúukaʼan u yóol muʼyaj».
^ Wa «le baʼax maʼ maʼalob ku beetaʼaltiʼoʼ».
^ Wa «maʼ tu yaʼalik baʼal».
^ Wa «mix bikʼin kun pʼáatal minaʼan».
^ Teʼelaʼ táan u tʼaan tiʼ junpʼéel milagro.
