1 Corintios 14:1-40
14 Maʼ u xuʼulul a weʼeskeʼex yaabilaj; beeteʼex xan tuláakal le ku páajtal utiaʼal u yantalteʼex le jejeláas páajtalil ku taal tiʼ Diosoʼ, chéen baʼaleʼ maases le utiaʼal a profetizareʼexoʼ.+
2 Tumen le máax ku tʼaan ichil jejeláas idiomaʼobeʼ maʼ yéetel u yéet máakil ku tʼaaniʼ, baʼaxeʼ yéetel Dios ku tʼaan. Le máakaʼ mix máak naʼatik baʼax ku yaʼalik+ tumen táan u tʼaan tiʼ baʼaloʼob taʼakaʼanoʼob,*+ jeʼex u tsʼaʼabal u páajtalil tiʼ tumen le espíritu santooʼ.
3 Chéen baʼaleʼ le máax ku profetizaroʼ ku muʼukʼaʼankúuntik u yóol máak, ku líiʼsik u yóol máak yéetel ku kiʼimakkúuntik u yóol u maasil yéetel le baʼaxoʼob ku yaʼalikoʼ.
4 Le máax ku tʼaan ichil yaanal idiomaeʼ chéen tu juunal ku muʼukʼaʼankúuntik u yóol, chéen baʼaleʼ le máax ku profetizaroʼ ku muʼukʼaʼankúuntik u yóol le múuchʼuliloʼ.
5 U jaajileʼ in kʼáat ka tʼaanakeʼex tuláakleʼex ichil jejeláas idiomaʼob,+ chéen baʼaleʼ maases in kʼáat ka profetizarnakeʼex.+ Tumen le máax ku profetizareʼ maas nojoch tiʼ le máax ku tʼaan ichil jejeláas idiomaʼoboʼ, jaʼaliʼ wa yaan u traducirtik ichil u idioma le múuchʼulil utiaʼal u líiʼsik u yóoloʼ.
6 Chéen baʼaleʼ beoraaʼ, sukuʼuneʼex, wa ka xiʼiken ta wiknaleʼex táan in tʼaan ichil jejeláas idiomaʼobeʼ, ¿baʼax utsil jeʼel u taasikteʼexeʼ? Wa in kʼáat in wáanteʼexeʼ, baʼax kʼaʼabéet in beetkeʼ in tsikbaltikteʼex junpʼéel baʼax tsʼoʼok u tsʼaʼabal in wojéelte,+ wa junpʼéel baʼax tsʼoʼok in naʼatik,+ wa junpʼéel profecía, wa junpʼéel kaʼansaj.
7 Lelaʼ bey xan u yúuchul yéetel le u nuʼukuliloʼob paax, jeʼex le flauta wa le arpaoʼ. Wa maʼ tu yuʼubaʼal u jejeláasil u juumeʼ, ¿bix jeʼel u kʼaj óoltaʼal baʼax ku paʼaxal yéetel le flauta wa yéetel le arpaoʼ?
8 Tumen wa jelaʼan bix u juum le trompeta kéen paʼaxkoʼ, ¿máax jeʼel u líiʼskuba utiaʼal le baʼateloʼ?
9 Bey túun xanoʼ wa maʼ ta waʼalikeʼex tʼaanoʼob séeb u naʼataʼaleʼ, ¿bix jeʼel u yojéeltik máak tiʼ baʼax ka tʼaaneʼexeʼ? Wa maʼ ta beetkeʼex beyoʼ chéen kunel baʼax ka waʼalikeʼex.
10 Teʼ yóokʼol kaabaʼ yaʼab u jejeláasil idiomaʼob ku tʼaʼanal, chéen baʼaleʼ tuláakloʼob jeʼel u páajtal u naʼataʼaloʼobeʼ.
11 Bey túunoʼ wa teen maʼ tin naʼatik le baʼax ku yaʼalaʼaloʼ kin pʼáatal bey juntúul j-táanxel luʼumil utiaʼal le máax ku tʼaanoʼ; le máax xan ku tʼaanoʼ ku pʼáatal bey j-táanxel luʼumil in tiaʼaleʼ.
12 Teʼex xaneʼ tumen táan a jach tsʼíiboltkeʼex le jejeláas páajtalil ku tsʼáaik le espíritu santooʼ, ilawileʼex ka yanakteʼex yaʼab tiʼ le jejeláas páajtalil jeʼel u muʼukʼaʼankúuntik u yóol le múuchʼuliloʼ.+
13 Le oʼolaleʼ le máax ku tʼaan ichil uláakʼ idiomaeʼ orarnak utiaʼal ka páajchajak u traducirtik le baʼax ku yaʼalikoʼ.+
14 Tumen wa kin orar ichil uláakʼ idiomaeʼ maʼ teen kin orariʼ, baʼaxeʼ letiʼ le páajtalil síiʼanten tumen le espíritu santooʼ. Le oʼolal teneʼ maʼ tin naʼatik le baʼax kin waʼalikoʼ.
15 ¿Baʼax túun unaj in beetik? Yaan in orar yéetel le páajtalil síiʼanten tumen le espíritu santooʼ, chéen baʼaleʼ yaan in orar xan utiaʼal ka naʼataʼak baʼax kin waʼalik. Yaan in kʼaay utiaʼal in alabartik Dios yéetel le páajtalil síiʼanten tumen le espíritu santooʼ, chéen baʼaleʼ yaan xan in kʼaay utiaʼal ka naʼataʼak baʼax kin waʼalik.
16 Tumen wa táan a alabartik Dios yéetel le páajtalil síiʼantech tumen le espíritu santooʼ, chéen baʼaleʼ ichileʼexeʼ kulukbal juntúul máak maʼ u yojel tiʼ baʼax ku yúuchul tʼaaneʼ, ¿bix ken u yaʼalil «Ka béeyak»* wa maʼ tu naʼatik le baʼax ka waʼalik utiaʼal a tsʼáaik gracias tiʼ Diosoʼ?
17 U jaajileʼ jach maʼalob bix a tsʼáaik gracias tiʼ Dios, chéen baʼaleʼ maʼ táan a líiʼsik u yóol le máakoʼ.
18 Kin tsʼáaik gracias tiʼ Dios tumen teneʼ ku páajtal in tʼaan ichil maas yaʼab idiomaʼob ke tuláakleʼex.
19 Kex beyoʼ teʼ múuchʼuliloʼ maas maʼalob in wilik ka in waʼal cinco tʼanoʼob jeʼel u páajtal u naʼataʼal utiaʼal in kaʼansik uláakʼ máakoʼobeʼ ke ka in waʼal 10,000 tʼaanoʼob ichil uláakʼ idioma.+
20 Sukuʼuneʼex, maʼ a beetkabaʼex jeʼex mejen paalal tiʼ bix a tuukuleʼexeʼ,+ baʼaxeʼ beetabaʼex bey mejen paalal tiʼ baʼax yaan yil yéetel le kʼaasoʼ;+ tuukulneneʼex jeʼex u tuukul nukuch máakoʼobeʼ.+
21 Teʼ Leyoʼ tsʼíibtaʼan: «‹Teneʼ yaan u meyajten máakoʼob tʼanik jejeláas idiomaʼob yéetel j-táanxel luʼumiloʼob utiaʼal in tʼanik le kaajaʼ, kex beyoʼ maʼ ken u yóot u yuʼubenoʼob›, ku yaʼalik Jéeoba».+
22 Jeʼex túun k-ilkoʼ, u tʼaan máak ichil jejeláas idiomaʼobeʼ maʼ junpʼéel señal utiaʼal le máaxoʼob ku creerkoʼob Diosoʼ, baʼaxeʼ utiaʼal le máaxoʼob maʼatech u creerkoʼoboʼ.+ U profetizar máak xaneʼ maʼ utiaʼal le máaxoʼob maʼatech u creerkoʼob Diosoʼ, baʼaxeʼ utiaʼal le máaxoʼob ku creerkoʼoboʼ.
23 Le oʼolaleʼ wa tuláakal le múuchʼulil ku muchʼkuba, yéetel tuláakloʼob ku káajal u tʼaanoʼob ichil jejeláas idiomaʼob, chéen baʼaleʼ ku yokol máakoʼob maʼ kaʼansaʼanoʼob wa maʼatech u creerkoʼob Dioseʼ, ¿maʼ wa jeʼel u yaʼalikoʼob tsʼoʼok u chokotal a pooleʼexeʼ?
24 Chéen baʼaleʼ wa tuláakleʼex táan a profetizareʼexeʼ, le kéen okok juntúul máax maʼatech u creertik Dios wa juntúul máax maʼ kaʼansaʼaneʼ, yaan u yuʼubik bey letiʼ ku tsolnuʼuktaʼaleʼ yéetel yaan u xakʼaltik u tuukul utiaʼal u yilik wa maʼalob baʼax ku beetik.
25 Lelaʼ ku beetik u chíikpajal le baʼaxoʼob u taʼakmaj ichil u puksiʼikʼaloʼ, tsʼoʼoleʼ ku xoltal yéetel ku chintal u adorart Dios táan u yaʼalik: «Dioseʼ jach tu jaajil tiaʼan ichileʼexeʼ».+
26 Sukuʼuneʼex, ¿baʼax túun unaj u beetaʼal? Tumen kéen a muchʼabaʼexeʼ juntúuleʼ táan u kʼayik junpʼéel salmo, uláakʼeʼ táan u kaʼansik junpʼéel baʼal, uláakʼeʼ táan u tsikbaltik junpʼéel baʼax tsʼaʼab u yojéelte, uláakʼeʼ táan u tʼaan ichil uláakʼ idioma yéetel uláakʼeʼ táan u tsolik le baʼax ku yaʼalaʼaloʼ.+ Beetaʼak tuláakal baʼal utiaʼal u muʼukʼaʼantal u yóol u maasil.
27 Wa yaan máax ku tʼaan ichil uláakʼ idiomaeʼ tʼaanak chéen kaʼatúul wa tak óoxtúuliʼ, chéen baʼaleʼ jujuntúulil ka tʼaanakoʼob. Tsʼoʼoleʼ unaj u yantal máax traducirtik le baʼax ku yaʼalaʼaloʼ.+
28 Chéen baʼaleʼ wa minaʼan máax traducirkeʼ maas maʼalob maʼ u tʼaan tu táan le múuchʼuliloʼ, baʼaxeʼ tʼaanak yéetel Dios ichil u puksiʼikʼal.
29 Tsʼoʼoleʼ tʼaanak xan chéen kaʼatúul wa tak óoxtúul profetaʼob,+ yéetel u maasiloʼoboʼ u yil u chʼaʼnuʼuktikoʼob le baʼax ku yaʼalaʼaloʼ.
30 Chéen baʼaleʼ wa tiʼ uláakʼ máak kulukbal ta wiknaleʼex ku tsʼaʼabal u yojéelt wa baʼax tumen Dioseʼ, le máax táan u tʼaanoʼ unaj u xuʼulul u tʼaan.
31 Tumen tuláakleʼexeʼ jeʼel u páajtal a profetizareʼex jujuntúulileʼ, beyoʼ tuláakal kun kaanbal yéetel tuláakal kun líikʼil u yóol.+
32 Tumen le páajtalil ku tsʼáaik le espíritu santo tiʼ le profetaʼoboʼ, letiʼob unaj u controlarkoʼob.
33 Tuláakal lelaʼ bey unaj u beetaʼaloʼ, tumen Dioseʼ u Diosil jeetsʼelil yéetel uts tu tʼaan ka beetaʼak tuláakal baʼal tu tsoolol.+
Jeʼex suuk u beetaʼal tiʼ tuláakal u múuchʼulil le máaxoʼob santoʼoboʼ,
34 le koʼoleloʼoboʼ maʼ unaj u tʼaanoʼob ichil le múuchʼuliloʼoboʼ, tumen lelaʼ maʼ tu chaʼabaltiʼob.+ Baʼax unaj u beetkoʼobeʼ u tsʼáaikubaʼob yáanal u páajtalil le xiiboʼ,+ jeʼex xan u yaʼalik le Ley ka beetaʼakoʼ.
35 Wa yaan baʼax maʼ tu naʼatoʼobeʼ, unaj u kʼáatkoʼob tiʼ u yíichamoʼob tu yotochoʼob, tumen suʼtsil ka tʼaanak juntúul koʼolel teʼ múuchʼuliloʼ.
36 ¿Ta wiknaleʼex wa jóokʼ u tʼaan Dios? A tuklikeʼexeʼ, ¿chéen wa tiʼ teʼex tsikbaltaʼabi?
37 Wa yaan máax ku tuklik profeta yéetel síiʼan wa baʼax páajtalil tiʼ tumen le espíritu santooʼ, jeʼel u tsʼáaik cuentaeʼ le baʼaxoʼob kin tsʼíibtikteʼexaʼ Yuumtsil aʼalik ka beetaʼak.
38 Chéen baʼaleʼ wa yaan máax maʼ tu chʼaʼik en cuentaileʼ, maʼ xan kun chʼaʼabil en cuentail.*
39 Le oʼolaleʼ, in sukuʼuneʼex, beeteʼex tuláakal le ku páajtal utiaʼal a profetizareʼex+ yéetel maʼ a waʼalikeʼex tiʼ mix máak maʼ u tʼaan ichil jejeláas idiomaʼob.+
40 Chéen baʼaleʼ beetaʼak tuláakal baʼal tu nuʼuk yéetel tu tsoolol.+
Notas
^ Wa «baʼaloʼob santoʼob taʼakaʼanoʼob».
^ Wa «Amén».
^ Uláakʼ bix u traducirtaʼaleʼ «wa yaan máax maʼ tu naʼatikeʼ, pʼáatak beyoʼ».
