1 Samuel 16:1-23
16 Le ka tsʼoʼokeʼ Jéeobaeʼ tu yaʼalaj tiʼ Samuel: «¿Baʼax kʼiin kun xuʼulul a wuʼuyikaba tristeil tu yoʼolal Saúl?+ Si teneʼ maʼ in kʼáat ka seguernak u beetik u reyil yóokʼol u kaajil Israeliʼ.+ Chup le baak yéetel aceiteoʼ+ ka xiʼikech. Yaan in túuxtikech tu yiknal Jesé,+ le máax kajaʼan Belénoʼ, tumen ichil u paalaleʼ tsʼoʼok in yéeyik juntúul rey».+
2 Chéen baʼaleʼ Samueleʼ tu yaʼalaj: «¿Bix kin bin? Le kéen u yojéelt Saúleʼ yaan u kíimsken».+ Jéeobaeʼ tu núukaj: «Chʼaʼ juntúul chan vacaeʼ ka a bis ta wéetel, yéetel aʼal lelaʼ: ‹Taalen utiaʼal in kʼubik junpʼéel sacrificio tiʼ Jéeoba›.
3 Aʼal tiʼ Jesé ka xiʼik teʼ tuʼux ken a kʼub le sacrificiooʼ. Teen túuneʼ yaan in waʼaliktech baʼax ken a beete. Unaj a yalik le aceite tu yóokʼol le máax ken in waʼaltechoʼ».+
4 Samuel túuneʼ tu beetaj le baʼax tu yaʼalaj Jéeobaoʼ. Le ka kʼuch Beléneʼ+ u nuuktakil le kaajoʼ táan u kikilankiloʼob ka tu yiloʼob, letiʼobeʼ tu yaʼaloʼob: «¿Yaan wa baʼax ku yúuchul?».*
5 Letiʼ túuneʼ tu yaʼalaj: «Maʼ, mix baʼal ku yúuchul. Taalen in kʼub junpʼéel sacrificio tiʼ Jéeoba. Limpiokíintabaʼexeʼ ka taalakeʼex teʼ lugar tuʼux ken in kʼub le sacrificiooʼ». Letiʼ túuneʼ tu beetaj u pʼáatal limpioil Jesé yéetel u paalal, le ka tsʼoʼokeʼ tu muchʼkíintoʼob utiaʼal le sacrificiooʼ.
6 Le táan u yookloʼoboʼ tu yilaj Eliabeʼ+ ka tu yaʼalaj: «Le máax waʼalakbal tu táan Jéeobaaʼ seguro letiʼe máax tsʼoʼok u yéeyikoʼ».
7 Chéen baʼaleʼ Jéeobaeʼ tu yaʼalaj tiʼ Samuel: «Maʼ a wilik chéen u wíinklil mix bukaʼaj u kaʼanlil u baakel,+ tumen letiʼeʼ maʼ in yéeyiʼ. Tumen maʼ jeʼex u yilik wa baʼax wíinikeʼ maʼ bey u yilik Diosiʼ, tumen wíinikeʼ chéen ku yilik le baʼax yaan yóoʼkabiloʼ, pero Jéeobaeʼ ku yilik le baʼax yaan ichil le puksiʼikʼaloʼ».+
8 Jesé túuneʼ tu tʼanaj Abinadabeʼ+ ka tu beetaj u náatsʼal tu táan Samuel, chéen baʼaleʼ Samueleʼ tu yaʼalaj: «Letiʼeʼ maʼ yéeyaʼan xan tumen Jéeobaiʼ».
9 Le ka tsʼoʼokeʼ Jeséeʼ tu beetaj u náatsʼal Samaj,+ chéen baʼaleʼ letiʼeʼ tu yaʼalaj: «Letiʼeʼ maʼ yéeyaʼan xan tumen Jéeobaiʼ».
10 Jeséeʼ tu beetaj u náatsʼal siete tiʼ u paalal tu táan Samuel, pero Samueleʼ tu yaʼalaj tiʼ Jesé: «Jéeobaeʼ maʼ u yéey mix juntúul tiʼ letiʼobiʼ».
11 Samueleʼ tu yaʼalaj tiʼ Jesé: «¿Letiʼe wa tuláakal a hijoʼobaʼ?». Letiʼ túuneʼ tu núukaj: «Beoraaʼ le u maas chichniloʼ+ minaʼan wayeʼ, u bismaj janal le tamanoʼoboʼ».+ Samuel túuneʼ tu yaʼalaj tiʼ Jesé: «Túuxt chʼaʼabil, tumen hasta u taaleʼ k-janal».
12 Letiʼ túuneʼ tu túuxtaj chʼaʼabileʼ ka tu beetaj u yokol tu táan Samuel. Letiʼ kaʼacheʼ chakxikeʼen, jatsʼuts u yichoʼob, yéetel kiʼichkelem u yilaʼal.+ Jéeoba túuneʼ tu yaʼalaj: «¡Líiʼkech, yal aceite tu pool, tumen letiʼe máax tsʼoʼok in yéeyikoʼ!».+
13 Samuel túuneʼ tu chʼaʼaj le baak tuʼux yaan le aceiteoʼ+ ka tu yalaj tu pool David tu táan tuláakal u sukuʼunoʼob. Desde teʼ kʼiin jeʼeloʼ Jéeobaeʼ káaj u tsʼáaik u poder tiʼ David.+ Maʼ sáam tiʼ leloʼ, Samueleʼ líikʼeʼ ka jóokʼ u binbal tak Ramá.+
14 Jéeoba túuneʼ xuʼul u tsʼáaik u poder tiʼ Saúl. Jéeobaeʼ tu chaʼaj u sen chiʼichnaktal Saúl,+ le beetkeʼ hasta óolak chokochajak u pool.+
15 U j-meyajoʼob Saúl túuneʼ tu yaʼaloʼobtiʼ: «Yuum rey, ilawile, le bix a wuʼuyikabaoʼ tiʼ Dios u taal.
16 Yuum rey, beet uts a waʼalik tiʼ a j-meyajoʼob ka u kaxtoʼob juntúul máak jach u yojel u pax arpa.+ Cada ken u beet Dios a sen chiʼichnaktaleʼ, letiʼeʼ yaan u paxik le arpa a wuʼuyoʼ, beyoʼ yaan a wuʼuyikaba maas maʼalobil».
17 Saúl túuneʼ tu yaʼalaj tiʼ u j-meyajoʼob: «Beeteʼex uts a kaxtikeʼex juntúul máak jach u yojel paax ka a taaseʼex wayeʼ».
18 Juntúul tiʼ le máaxoʼob meyajtik Saúl túunoʼ tu yaʼalaj: «¡Ilawile! Juntúul tiʼ u hijoʼob Jesé, le máax kajaʼan Belénoʼ, jach u yojel paax, letiʼeʼ juntúul máak u yojel baʼateʼel,+ maʼatech u chʼaʼik saajkil yéetel jach yaan u páajtalil. Letiʼeʼ maʼalob u tʼaan, kiʼichkelem,+ tsʼoʼoleʼ Jéeobaeʼ tiaʼan tu yéeteleʼ».+
19 Saúl túuneʼ tu túuxtaj máakoʼob aʼalik tiʼ Jesé lelaʼ: «Túuxtten David, a hijo, le máax ku kanan tamanoʼ».+
20 Jesé túuneʼ tu chʼaʼaj waaj, junpʼéel bolsa de kʼéewel* chuup yéetel vino bey xan juntúul chan chivoeʼ ka tu tsʼáajoʼob yóokʼol juntúul burro, ka túun bisaʼab tiʼ Saúl tumen David.
21 David túuneʼ bin yiknal Saúleʼ ka joʼopʼ u meyajtik.+ Yéetel Saúleʼ kʼuch u jach yaabilte, Davideʼ kʼuch u beetuba le máax kuchik u armaʼoboʼ.
22 Saúleʼ tu túuxtaj aʼalbil tiʼ Jesé: «Beet uts a chaʼik u pʼáatal David tin wiknal utiaʼal u meyajtiken, tumen tsʼoʼok u jach lúubul utsil ten».
23 Cada ken u beet Dios u sen chiʼichnaktal Saúleʼ, Davideʼ ku paxik le arpaoʼ, Saúl túuneʼ ku chan jéetsʼel u yóol yéetel ku yuʼubikuba maas chan maʼalobil.+
Notas
^ Ich hebreoeʼ ku yaʼalaʼal kaʼach «¿U kʼáat wa u yaʼal jeetsʼelil úuchik a taal?».
^ Ilawil «Bolsa de kʼéewel», página 2558.
