1 Samuel 28:1-25
-
Saúleʼ ku bin u yil le koʼolel ku tʼaan yéetel le kimenoʼoboʼ (1-25)
28 Teʼ kʼiinoʼob jeʼeloʼ le filisteoʼoboʼ tu muchʼaj u ejércitoʼob utiaʼal u binoʼob baʼateʼel tu contra u kaajil Israel.+ Le oʼolal Akíseʼ tu yaʼalaj tiʼ David: «Teech yéetel le máakoʼob láakʼintikechoʼ a wojleʼex unaj a bineʼex teʼ baʼateʼel tin wéeteloʼ».+
2 David túuneʼ tu yaʼalaj tiʼ Akís: «Techeʼ a wojel baʼax ken u beet le a esclavoaʼ». Akíseʼ tu yaʼalaj tiʼ David: «In wojel, le oʼolal teech ken in tsʼáaech utiaʼal a kanáantken mantatsʼ».*+
3 Teʼ kʼiinoʼob jeʼeloʼ Samueleʼ tsʼoʼok kaʼach u kíimil, oʼtaʼab tumen tuláakal u kaajil Israel yéetel muʼuk tu kaajil Ramá, le kaaj tuʼux kajaʼan kaʼachoʼ.+ Teʼ kʼiinoʼob xanoʼ Saúleʼ tsʼokaʼaniliʼ u luʼsik tu luʼumil Israel le máaxoʼob ku yaʼalikoʼob ku tʼaanoʼob yéetel le kimenoʼoboʼ bey xan le j-meenoʼoboʼ.+
4 Le filisteoʼob túunoʼ tu muchʼubaʼobeʼ ka jóokʼ u binbaloʼob, ka pʼáatoʼob jeʼelel tu kaajil Sunem.+ Saúleʼ tu muchʼaj xan tuláakal u soldadoiloʼob Israeleʼ ka jóokʼ u binbaloʼob, ka pʼáatoʼob jeʼelel teʼ Montaña Guilboaoʼ.+
5 Le ka tu yilaj Saúl le soldadoʼob filisteoʼoboʼ jach sajakchaji yéetel joʼopʼ u sen kukulankil u puksiʼikʼal.+
6 Kex ku orar kaʼach tiʼ Jéeobaeʼ,+ Jéeobaeʼ maʼatech u núukiktiʼ mix yéetel wayakʼoʼob mix yéetel Urim+ mix yéetel le profetaʼoboʼ.
7 Tu tsʼookeʼ tu yaʼalaj tiʼ u j-meyajoʼob: «Kaxteʼex juntúul koʼolel ku tʼaan yéetel le kimenoʼoboʼ+ utiaʼal ka xiʼiken tʼaan tu yéetel». U j-meyajoʼobeʼ tu núukoʼobtiʼ: «¡Ilawile! Tu kaajil En-doreʼ yaan juntúul koʼolel ku tʼaan yéetel le kimenoʼoboʼ».+
8 Saúl túuneʼ tu disfrazartuba, tu búukintaj yaanal nookʼoʼobeʼ ka bin u yil le koʼolel de áakʼaboʼ, bin yéetel kaʼatúul máakoʼob. Letiʼeʼ tu yaʼalaj tiʼ le koʼoleloʼ: «Beet uts u meyajtech le poder yaantech utiaʼal a waʼalikten baʼax ku taal u kʼiinil u yúuchloʼ,+ tʼan le máax ken in waʼaltechoʼ».
9 Chéen baʼaleʼ le koʼoleloʼ tu yaʼalaj: «Techeʼ seguro a wojel baʼax tu beetaj Saúl, letiʼeʼ tu luʼsaj tu luʼumil Israel le máaxoʼob ku yaʼalikoʼob ku tʼaanoʼob yéetel le kimenoʼoboʼ bey xan le j-meenoʼoboʼ.+ Le oʼolaleʼ, ¿baʼaxten a kʼáat ka in beet junpʼéel baʼal jeʼel u beetik in kíimsaʼaleʼ?».+
10 Saúl túuneʼ tu jurartaj tiʼ le koʼolel tu kʼaabaʼ Jéeobaoʼ: «¡Tu kʼaabaʼ Jéeoba, le Dios kuxaʼanoʼ, kin jurartiktech maʼ kan castigarbil tu yoʼolal lelaʼ!».
11 Le ka tu yuʼubaj leloʼ, le koʼoleloʼ tu yaʼalaj: «¿Máax a kʼáat ka in tʼane?». Saúleʼ tu núukaj: «Tʼan Samuel».
12 Le koʼoleloʼ le ka tu yilaj «Samueleʼ»+ kʼaʼam awatnajeʼ ka tu yaʼalaj tiʼ Saúl: «¿Baʼaxten ta tusen beyaʼ? ¡Si techeʼ Saúlech bakáan!».
13 Le reyoʼ tu yaʼalaj tiʼ le koʼoleloʼ: «Maʼ a sajaktal, baʼaxeʼ aʼalten baʼax ka wilik». Le koʼoleloʼ tu núukaj tiʼ Saúl: «Táan in wilik bey juntúul dios táan u jóokʼol teʼ luʼumoʼ».
14 Saúleʼ tu kʼáataj tiʼ le koʼoleloʼ: «¿Bix letiʼ?». Le koʼoleloʼ tu núukaj: «Juntúul máak yaan u jaʼabil yéetel u búukintmaj junpʼéel nookʼ minaʼan u kʼabil».+ Le ka tu yuʼubaj leloʼ Saúleʼ tu naʼataj de ke le máakoʼ «Samuel», le oʼolal xolajeʼ ka chinlaji.
15 «Samuel» túuneʼ tu yaʼalaj tiʼ Saúl: «¿Baʼaxten ka molestarken, baʼaxten tsʼoʼok a beetik in tʼaʼanal?». Saúl túuneʼ tu núukaj: «Tsʼoʼok in wokskinba tiʼ nukuch problemas. Le filisteoʼoboʼ táan u baʼateloʼob tin contra, yéetel Dioseʼ tsʼoʼok u náachtal tiʼ teen yéetel maʼ tu núukik in tʼaan, maʼ tu núukik mix yéetel profetaʼob mix yéetel wayakʼoʼob.+ Le beetik tin beetaj a tʼaʼanal utiaʼal ka a waʼalten baʼax unaj in beetik».+
16 «Samueleʼ» tu yaʼalajtiʼ: «¿Baʼaxten ka kʼáatikten baʼax unaj a beetik beora tsʼoʼok u náachtal Jéeoba tiʼ teech+ yéetel tsʼoʼok u tsʼáaikuba ta contraaʼ?
17 Jéeobaeʼ yaan u beetik le baʼax tu beetaj in profetizarkaʼ: Jéeobaeʼ yaan u luʼsik le reino ta kʼaboʼ yéetel yaan u tsʼáaik tiʼ a wéet máakil, tiʼ David.+
18 Techeʼ maʼ ta wuʼuyaj u tʼaan Jéeobaiʼ yéetel maʼ ta xuʼulsaj tiʼ le amalekitaʼoboʼ,+ le máaxoʼob beet u pʼuʼujuloʼ, le oʼolal bey u tratarkech Jéeoba teʼ kʼiinaʼ.
19 Teech yéetel Israeleʼ yaan a kʼuʼubleʼex tumen Jéeoba tu kʼab le filisteoʼoboʼ,+ sáamaleʼ teech+ yéetel a paalaleʼ+ yaan a wantaleʼex tin wéetel. Jéeobaeʼ yaan u kʼubik xan u soldadoiloʼob Israel tu kʼab le filisteoʼoboʼ».+
20 Jach teʼ súutukoʼ Saúleʼ lúub luʼum, yéetel sen sajakchaj yoʼolal le baʼax tu yaʼalaj «Samueloʼ». Letiʼeʼ minaʼan kaʼach u muukʼ tumen bul kʼiin yéetel bul áakʼab maʼ u jaant mix baʼaliʼ.
21 Le ka taal le koʼolel tu yiknal Saúl yéetel le ka tu yilaj jach sajakoʼ, tu yaʼalajtiʼ: «¡Ilawile! Le a esclavaaʼ tsʼoʼok u yuʼubik a tʼaan yéetel tu tsʼáaj u kuxtal tu chiʼ kíimil+ utiaʼal u beetik le baʼax ta kʼáatajtiʼoʼ.
22 Beoraaʼ beet uts a wuʼuyik le baʼax ken u yaʼaltech a esclavaaʼ. Chaʼa in tsʼáaik junxéetʼ waaj ta táan utiaʼal ka a jaante, beyoʼ yaan u yantal junpʼíit a muukʼ utiaʼal ka seguernak a viajar».
23 Chéen baʼaleʼ Saúleʼ maʼ tu yóotiʼ ka tu yaʼalaj: «Maʼ tin janal». Pero le máakoʼob láakʼintik bey xan le koʼoleloʼ seguernaj u yaʼalikoʼobtiʼ ka janak. Tu tsʼookeʼ tu yuʼubaj u tʼaanoʼob, líikʼeʼ ka kulaj teʼ camaoʼ.
24 Tu yotoch le koʼoleloʼ yaan kaʼach juntúul chan wakax tsʼoʼok u polokkíintik, letiʼeʼ tu jáan kíimseʼ, tu chʼaʼaj harinaeʼ ka tu xaʼakʼtaj utiaʼal u beetik waaj minaʼan u levadurail.
25 Le koʼoleloʼ tu tsʼáaj túun tiʼ Saúl bey xan tiʼ le máakoʼob láakʼintikoʼ, letiʼob túuneʼ jaanoʼob. Le ka tsʼoʼokeʼ letiʼobeʼ líikʼoʼobeʼ ka binoʼob de áakʼab.+
Notas
^ Ich hebreoeʼ ku yaʼalaʼal kaʼach «utiaʼal a kanáantik in pool tuláakal le kʼiinoʼoboʼ».
