2 Crónicas 16:1-14
16 Treintiséis años joʼopʼok u beetik u reyil Asá ka taal Baasá+ u reyil Israel baʼateʼel tu contra Judá. Baasáeʼ káaj u líiʼsik* u kaajil Ramá+ utiaʼal maʼ u yokol mix u jóokʼol mix máak tu territorio Asá, u reyil Judá.+
2 Le ka tu yilaj leloʼ Asáeʼ tu chʼaʼaj le plata yéetel le oro yaan tu tesoreríailoʼob u yotoch Jéeobaoʼ+ bey xan le yaan tu tesoreríailoʼob u yotoch* le reyoʼ. Letiʼeʼ tu túuxtoʼob tak tu kaajil Damasco, le tuʼux kajaʼan kaʼach Ben-adad u reyil Siriaoʼ.+ Asáeʼ tu túuxtaj aʼalbiltiʼ:
3 «¿Maʼ wa in chʼaʼamaj junpʼéel acuerdo* ta wéeteliʼ? ¿Maʼ wa u chʼaʼamaj junpʼéel acuerdo a papá yéetel in papáiʼ? Ilawile, táan in túuxtiktech plata yéetel oro. Beora túunaʼ xuʼuls le acuerdo a chʼaʼamaj yéetel Baasá u reyil Israeloʼ utiaʼal maʼ u seguer u baʼateʼel tin contra».
4 Ben-adadeʼ tu yuʼubaj le baʼax aʼalaʼabtiʼ tumen rey Asáoʼ ka tu túuxtaj u nuuktakil u ejército baʼateʼel tu contra u kaajiloʼob Israel. Letiʼob túuneʼ tu xuʼulsoʼob tiʼ u kaajiloʼob Ijón,+ Dan,+ Abel-maim bey xan tuláakal le almacénoʼob yanoʼob tu kaajiloʼob Neftalíoʼ.+
5 Le ka tu yojéeltaj Baasá lelaʼ tu séebaʼanileʼ xuʼul u líiʼsik u kaajil Ramá.
6 Le rey Asá túunoʼ tu muchʼkíintaj tuláakal u kajnáaliloʼob Judá, letiʼobeʼ tu chʼaʼaj u bisoʼob le tuunichoʼob yéetel le cheʼob ku meyaj kaʼach tiʼ Baasá utiaʼal u líiʼsik+ u kaajil Ramáoʼ.+ Le baʼaloʼobaʼ letiʼe meyajnaj tiʼ le rey Asá utiaʼal u líiʼsik* u kaajil Gueba+ bey xan u kaajil Mizpáoʼ.+
7 Teʼ kʼiinoʼob jeʼeloʼ Aananí,+ le máax ku yilik le baʼax ku taal u kʼiinil u yúuchloʼ, bin tu yiknal Asá u reyil Judáeʼ ka tu yaʼalajtiʼ: «Tumen ta kʼubaj a wóol tiʼ u reyil Siria tu lugar a kʼubik a wóol tiʼ Jéeoba a Dioseʼ, u soldadoʼob u reyil Siriaeʼ tsʼoʼok u púutsʼloʼob ta kʼab.+
8 ¿Máasaʼ le etíopeʼob yéetel le libioʼoboʼ jach yaʼaboʼob kaʼachi? ¿Máasaʼ jach yaʼab u carroiloʼob u baʼateloʼob yéetel yaʼab u soldadoʼob u natʼmoʼob tsíiminoʼob? Kex beyoʼ tumen ta kʼubaj a wóol tiʼ Jéeobaeʼ, letiʼeʼ tu kʼuboʼob ta kʼab.+
9 Jéeobaeʼ jach táan u yilik baʼax ku yúuchul tiʼ tuláakal yóokʼol kaab,+ tumen letiʼeʼ taak u yáantik le máaxoʼob meyajtik* yéetel tuláakal u puksiʼikʼaloʼoboʼ.+ Techeʼ minaʼan a naʼat, maʼ maʼalob le baʼax ta beetoʼ, le oʼolal desde bejlaʼeʼ a enemigoʼobeʼ yaan u taaloʼob baʼateʼel ta contra».+
10 Le ka tu yuʼubaj leloʼ Asáeʼ pʼuʼuj tu contra Aananí, le máax ilik baʼax ku taal u kʼiinil u yúuchloʼ, ka tu beetaj u kʼaʼalal.* Teʼ kʼiinoʼob jeʼeloʼ Asáeʼ káaj u maltratartik u maasil máakoʼob yanoʼob teʼ kaajoʼ.
11 Tuláakal le baʼaxoʼob úuch ichil u kuxtal Asá, desde tu káajbal tak tu tsʼoʼokbaleʼ, tsʼíibtaʼaboʼob tu Libroil u Reyiloʼob Judá yéetel Israel.+
12 Treintinueve años káajak u beetik u reyil Asá ka tsaʼay junpʼéel kʼaakʼas kʼojaʼanil tu yook, ka túun sen kʼojaʼanchaji. Kex beyoʼ maʼ tu kaxtaj u yáantaj Jéeobaiʼ, baʼaxeʼ tu kaxtaj u yáantaj le máaxoʼob ku tsʼaakankiloʼoboʼ.
13 Asá túuneʼ kíimeʼ* ka muʼuki,+ 41 años káajak u reinar ka kíimi.
14 Letiʼeʼ muʼuk teʼ tu Kaajal Davidoʼ,+ tsʼaʼab teʼ kiʼichkelem muknal tu beetaj utiaʼal u muʼukloʼ. Tsʼaʼab tiʼ junpʼéel caja chuup yéetel junpʼéel aceite especial beetaʼan yéetel jejeláas kiʼibok aceiteʼob.+ Tsʼoʼoleʼ teʼ kʼiin ka muʼukoʼ tóokaʼab yaʼab baʼaloʼob kiʼiboktak utiaʼal u kʼaʼajsaʼal.
Notas
^ Wa «u beetik u maas yantal u muukʼ; u jel líiʼsik».
^ Wa «palacio».
^ Wa «pacto».
^ Wa «u beetik u maas yantal u muukʼ; u jel líiʼsik».
^ Wa «jach u kʼubmubaʼob tiʼ».
^ Ich hebreoeʼ ku yaʼalaʼal kaʼach «u tsʼaʼabal teʼ naj tuʼux yaan le cepoʼoboʼ».
^ Ich hebreoeʼ ku yaʼalaʼal kaʼach «jeʼel yéetel u yúuchben láakʼtsiloʼob».
