2 Corintios 4:1-18
4 Úuchik u chʼaʼabaltoʼon óotsilileʼ kʼubéentaʼabtoʼon le meyajaʼ, le oʼolal maʼ t-chaʼik u lúubul k-óol.
2 Yéetel tsʼoʼok k-tsʼáaik juntséelil le baʼaloʼob suʼtsiltak ku beetaʼal taʼakumbailoʼ. Tsʼoʼoleʼ maʼatech u meyajtoʼon k-naʼat utiaʼal k-beetik baʼaloʼob kʼaastak, maʼatech xan k-jelbesik baʼax ku yaʼalik u tʼaan Dios,+ baʼaxeʼ k-tsʼáaik ojéeltbil u jaajil, beyoʼ k-eʼesik tu táan Dios táan k-beetik baʼax maʼalob yéetel k-tsʼáaik junpʼéel maʼalob ejemplo tiʼ tuláakal máak.+
3 Chéen baʼaleʼ wa le baʼaloʼob maʼalobtak k-tsikbaltik pixaʼan yéetel junpʼéel jaajay nookʼoʼ, pixaʼan utiaʼal le máaxoʼob táan u binoʼob tiʼ xuʼulsajoʼ.
4 Le máakoʼob maʼatech u creerkoʼob Diosoʼ+ pixaʼan u tuukuloʼob tumen u diosil le yóokʼol kaabaʼ,+ utiaʼal maʼ u kʼuchul tu yiknaloʼob u sáasilil le kiʼichkelem baʼaloʼob maʼalobtak+ yaan yil yéetel Cristo, le máax chíikaʼan tiʼ Diosoʼ.+
5 Maʼ táan k-tsikbaltik baʼaloʼob yaan yil t-éeteliʼ, baʼaxeʼ táan k-tsʼáaik ojéeltbileʼ Cristo Jesúseʼ Yuumtsil, yéetel táan k-aʼalik esclavoʼon tiʼ teʼex tu yoʼolal Jesús.
6 Tumen Dioseʼ letiʼ aʼal lelaʼ: «Juulnak le sáasil teʼ éeʼjochʼeʼeniloʼ».+ Dios túuneʼ tsʼoʼok u juul ichil k-puksiʼikʼal utiaʼal u sáasilkuntkoʼon+ yéetel u kʼaj óolalil, lelaʼ ku beetik tu yoʼolal u táan u yich Cristo.
7 Toʼoneʼ beyoʼon nuʼukuloʼob de kʼat+ tsʼaʼan koʼokoj baʼaloʼob ichileʼ,+ utiaʼal beyoʼ maʼ u yilaʼal wa tiʼ toʼon u taal le páajtalil ku píitmáan tiʼ u muukʼ wíinikoʼ, baʼaxeʼ ka ilaʼak tiʼ Dios u taal.+
8 Jejeláas bix k-sen peʼechʼel, chéen baʼaleʼ maʼatech k-peʼechʼel ka tak pʼáatak junpuliʼ maʼ tu páajtal k-péek; ku pʼáatal maʼ k-ojel baʼax jeʼel k-beetkeʼ, chéen baʼaleʼ maʼatech k-pʼaʼatal x-maʼ áantajil;*+
9 k-chʼaʼpachtaʼal, pero maʼatech k-xúumpʼattaʼal;+ k-lúuʼsaʼal, chéen baʼaleʼ maʼatech k-xuʼulsaʼal.+
10 Mantatsʼ ku chúukpajal k-óol k-muʼyajt yéetel k-wíinklil le baʼaxoʼob tu muʼyajtaj Cristo le ka kíimsaʼaboʼ,+ utiaʼal beyoʼ yéetel le wíinklil yaantoʼonaʼ ka kuxlakoʼon jeʼex kuxlajik Jesúseʼ.
11 Tumen toʼon kuxaʼanoʼon bejlaʼeʼ mantatsʼ táan k-tsʼaʼabal tu chiʼ kíimil+ tu yoʼolal Jesús, utiaʼal beyoʼ, yéetel k-kʼeban wíinklileʼ ka kuxlakoʼon jeʼex kuxlajik Jesúseʼ.
12 Bey túunoʼ toʼoneʼ tiaʼanoʼon tu táan kíimil utiaʼal ka páajchajak u yantalteʼex kuxtaleʼ.
13 Lelaʼ letiʼe baʼax tsʼíibtaʼanaʼ: «Yanchajten fe, le oʼolal tʼaanajen».+ Toʼon xaneʼ k-eʼesik yaantoʼon junpʼéel fe beyoʼ, le oʼolal k-tʼaan,
14 tumen k-ojleʼ le Máax líiʼs Jesúsoʼ yaan xan u líiʼskoʼon junmúuchʼ yéetel Jesús, tsʼoʼoleʼ junmúuchʼ ta wéeteleʼexeʼ yaan u biskoʼoneʼex tu táan.+
15 Tumen tuláakal le baʼaloʼobaʼ ku yúuchul utiaʼal a wutsileʼex, utiaʼal beyoʼ ka maas yaʼabchajak u yeʼesaʼal u nojoch utsil Dios, tumen yaʼab uláakʼ máakoʼob táan u tsʼáaikoʼob gracias tiʼ Dios utiaʼal u alabartaʼal.+
16 Le oʼolal maʼ t-chaʼik u lúubul k-óol, tumen kex k-wíinklil táan u bin u xuʼupuleʼ le bixoʼon ichil k-puksiʼikʼaloʼ* sáamsamal táan u bin u túumbenchajal.
17 Tumen kex séeb u máan le baʼax k-muʼyajtik yéetel kex maʼ jach yajeʼ, ku taasiktoʼon utsiloʼob maas nuuktak yéetel mix bikʼin kun xuʼululoʼob.+
18 Lelaʼ ku yúuchul le táan k-chʼikik k-paakat, maʼ tiʼ baʼaloʼob ku yilaʼaloʼobiʼ, baʼaxeʼ tiʼ baʼaloʼob maʼatech u yilaʼaloʼob.+ Tumen le baʼaloʼob ku yilaʼaloʼoboʼ ku xuʼululoʼob, pero le baʼaloʼob maʼatech u yilaʼaloʼoboʼ mix bikʼin kun xuʼululoʼob.
Notas
^ Uláakʼ bix u traducirtaʼaleʼ «maʼatech k-sen chiʼichnaktal».
^ Teʼelaʼ táakaʼan le modos yaan tiʼ máakoʼ bey xan le respeto ku yeʼesik tiʼ Diosoʼ.
