Eclesiastés 3:1-22
3 Tuláakal baʼal yaan u súutukil,yaan u súutukil utiaʼal u beetaʼal tuláakal baʼal way yóokʼol kaabeʼ:
2 yaan u súutukil síijil bey xan u súutukil kíimil,yaan u súutukil paakʼal bey xan u súutukil u joʼokol le baʼax pakʼaʼanoʼ.
3 Yaan u súutukil kiimsaj bey xan u súutukil salvar,*yaan u súutukil u juʼutul wa baʼax bey xan u súutukil u beetaʼal wa baʼax.
4 Yaan u súutukil awat okʼol bey xan u súutukil cheʼej,yaan u súutukil u yaatal u yóol máak bey xan u súutukil u yóokʼot* máak tumen kiʼimak u yóol.
5 Yaan u súutukil u puʼulul tuunich bey xan u súutukil u juntartaʼal tuunich,yaan u súutukil u méekʼaʼal máak bey xan u súutukil maʼ u méekʼaʼal máak.
6 Yaan u súutukil u kaxtaʼal wa baʼax bey xan u súutukil u xuʼulul u kaxtaʼal,yaan u súutukil u líiʼsaʼal wa baʼax bey xan u súutukil u puʼulul wa baʼax.
7 Yaan u súutukil u jaʼatal wa baʼax+ bey xan u súutukil u chuʼuyul wa baʼax,yaan u súutukil u makik u chiʼ máak+ bey xan u súutukil u tʼaan máak.+
8 Yaan u súutukil utiaʼal u yeʼesaʼal yaabilaj bey xan u súutukil utiaʼal pʼektaj,+yaan u súutukil utiaʼal u yantal guerra bey xan u súutukil utiaʼal u yantal jeetsʼelil.
9 ¿Baʼax ku náajaltik máak ikil u kíimskuba meyaj?+
10 Teneʼ tsʼoʼok in wilik le meyaj u tsʼaamaj Dios tiʼ le wíinikoʼob utiaʼal u yantal baʼax u beetoʼoboʼ.
11 Letiʼeʼ tsʼoʼok u beetik tuláakal baʼal kiʼichkelem* yéetel jach tu kʼiinil.+ Tsʼoʼok xan u tsʼáaik tu puksiʼikʼal wíinik le kuxtal minaʼan u xuuloʼ. Kex beyoʼ wíinikeʼ mix bikʼin u yojéeltik tuláakal le baʼaxoʼob tsʼoʼok u beetik u jaajil Dios desde tu káajbal tak tu tsʼoʼokbaloʼ.
12 Tsʼoʼok in wilkeʼ minaʼan baʼax maas maʼalob ke u kiʼimakkúuntik u yóol máak yéetel u beetik baʼax maʼalob tuláakal u kʼiiniloʼob u kuxtal.+
13 Tsʼoʼok in wilik xaneʼ máakeʼ maas maʼalob ka u jaant, ka u yukʼ yéetel ka u kiʼimakkúunt u yóol yéetel le baʼaxoʼob ku yantaltiʼ ikil u tsʼáaik u yóol meyajoʼ. Leloʼ letiʼe baʼax ku síik Dios tiʼ máakoʼ.+
14 Tsʼoʼok in kʼuchul in wileʼ tuláakal baʼax ku beetik u jaajil Dioseʼ yaan u pʼáatal utiaʼal mantatsʼ. Mix baʼal kʼaʼabéet u chúukbesaʼaltiʼ mix baʼal xan kʼaʼabéet u luʼsaʼaltiʼ. U jaajil Dioseʼ tu beetaj beyoʼ utiaʼal u respetartaʼal tumen máak.+
15 Le baʼax ku yúuchloʼ tsʼoʼok u yáax úuchul, le baʼax ku taal u kʼiinoʼ tsʼoʼok u yáax béeytal.+ Pero u jaajil Dioseʼ ku kaxtik u yutsil le máaxoʼob ku chʼaʼpachtaʼaloʼoboʼ.*
16 Tsʼoʼok xan in wilkeʼ way yóokʼol kaabeʼ ku yúuchul lelaʼ: Tu lugar justiciaeʼ yaan kʼasaʼanil, tu lugar baʼax tojeʼ yaan kʼasaʼanil.+
17 Teen túuneʼ tin waʼalaj ichil in puksiʼikʼal: «U jaajil Dioseʼ yaan u juzgartik le utsul máakoʼoboʼ bey xan le kʼasaʼan máakoʼoboʼ,+ tumen yaan u súutukil utiaʼal u beetaʼal tuláakal baʼal bey xan tuláakal meyaj».
18 Tu yoʼolal le wíinikoʼob xanoʼ tin waʼalaj ichil in puksiʼikʼal, u jaajil Dioseʼ yaan u tsʼáaik a pruebail le wíinikoʼoboʼ yéetel yaan u yeʼesiktiʼob beyoʼob baʼalcheʼobeʼ.
19 Tumen yaan junpʼéel bix u tsʼoʼokol wíinikoʼob yéetel junpʼéel bix u tsʼoʼokol baʼalcheʼob, tuláakloʼobeʼ junpʼéeliliʼ bix u tsʼoʼokoloʼob.+ Jeʼex u kíimil le baʼalcheʼoboʼ bey u kíimil xan máak, junpʼéeliliʼ muukʼ tsʼaʼantiʼob tumen Dios utiaʼal u kuxtaloʼob.+ Bey túunoʼ wíinikeʼ igual yéetel le baʼalcheʼoboʼ. Tuláakal baʼaleʼ mix baʼal u biilal.
20 Junpʼéeliliʼ lugar ku binoʼob tuláakloʼob.+ Tuláakloʼob tiʼ luʼum u taaloʼob,+ yéetel tuláakloʼob ku kaʼa suutoʼob luʼumil.+
21 ¿Máax jach tu jaajil u yojel wa le u muukʼil le kuxtal ku tsʼáaik Dios tiʼ máakoʼ ku bin kaʼan, yéetel le u muukʼil le kuxtal ku tsʼáaik tiʼ le baʼalcheʼoboʼ ku bin yáanal luʼum?+
22 Teneʼ tin wileʼ minaʼan baʼax maas maʼalob tiʼ u kiʼimaktal u yóol máak yéetel baʼax ku beetik,+ tumen letiʼe boʼol ken u kʼamoʼ.* ¿Máax jeʼel u tsʼáaik u páajtalil tiʼ máak u yilik baʼax kun úuchul kéen tsʼoʼokok u kíimileʼ?+
Notas
^ Ich hebreoeʼ ku yaʼalaʼal kaʼach «utiaʼal tsʼaak».
^ Ich hebreoeʼ ku yaʼalaʼal kaʼach «u síitʼ, u pʼiit».
^ Wa «maʼalob, tu nuʼuk».
^ Ich hebreoeʼ ku yaʼalaʼal kaʼach «ku kaxtik le baʼax úuch joʼopʼok u kaxtaʼaloʼ».
^ Wa «kun tocartiʼoʼ».
