Gálatas 1:1-24
1 Teen Pablo, apóstolen, maʼ túuxtaʼanen tumen juntúul máakiʼ mix túuxtaʼanen tumen máakoʼobiʼ, baʼaxeʼ túuxtaʼanen tumen Jesucristo+ yéetel tumen Dios le Taataoʼ,+ le máax líiʼs Jesucristo ichil le kimenoʼoboʼ.
2 Teen yéetel tuláakal le sukuʼunoʼob yanoʼob tin wiknaloʼ, k-tsʼíib tiʼ teʼex, le múuchʼuliloʼob yanoʼob Galaciaoʼ:
3 Ka yanakteʼex u nojoch utsil yéetel u jeetsʼelil Dios k-Taata bey xan le ku taal tiʼ Yuumtsil Jesucristooʼ.
4 Letiʼeʼ tu kʼububa tu yoʼolal k-kʼebanoʼob+ utiaʼal ka u tokoʼon tiʼ le kʼasaʼan yóokʼol kaabaʼ;+ lelaʼ tu beetaj jeʼex tu yóotilak k-Dios yéetel k-Taataoʼ,+
5 le máax unaj u alabartaʼal utiaʼal mantatsʼoʼ. Ka béeyak.*
6 Jach ku jaʼakʼal in wóol in wilik tu séebaʼanil táan a náachtaleʼex* tiʼ le Dios tʼaneʼex tu yoʼolal u nojoch utsil Cristooʼ, yéetel ka kʼamkeʼex le yaanal baʼaloʼob ku tsikbaltaʼalteʼexoʼ.+
7 U jaajileʼ le baʼaloʼob jeʼeloʼ mix baʼal yaan yil yéetel Cristo, chéen baʼaleʼ yaan jujuntúul máakoʼobeʼ táan u yilkoʼob ka yanakteʼex problemas+ yéetel u kʼáat u jelbesoʼob le maʼalob baʼaloʼob ku tsikbaltaʼal yoʼolal Cristooʼ.
8 Chéen baʼaleʼ wa toʼon bey xan wa juntúul u ángelil kaʼan ka u tsikbalt tiʼ teʼex baʼaloʼob jelaʼantak tiʼ le jatsʼuts baʼaloʼob tsʼoʼok k-tsikbaltikteʼexoʼ, maldecirtaʼak.
9 Jeʼex tsʼoʼok k-yáax aʼalikteʼexoʼ, beoraaʼ kin kaʼa aʼalikteʼex: jeʼel máaxak ka u tsikbalt tiʼ teʼex baʼaloʼob jelaʼantak tiʼ le baʼaxoʼob ta yáax kʼameʼexoʼ, maldecirtaʼak.
10 Beoraaʼ ¿táan wa túun in wilik in pʼáatal maʼalobil tu táan máakoʼob, wa tu táan Dios? ¿Táan wa xan in wilik in lúubul utsil tiʼ máakoʼob? Wa láayliʼ táan in wilik in lúubul utsil tiʼ máakoʼobeʼ leloʼ u kʼáat u yaʼaleʼ maʼ u esclavoen Cristoiʼ.
11 Sukuʼuneʼex, in kʼáat ka a wojéelteʼexeʼ le jatsʼuts baʼaloʼob tin tsikbaltajteʼexoʼ maʼ tiʼ wíinik u taaliʼ,+
12 tumen leloʼobaʼ mix juntúul wíinik tsʼáaten, yéetel maʼ kaʼansbil beetaʼabteniʼ, baʼaxeʼ Jesucristo tsʼáa in wojéeltoʼob.
13 Teʼexeʼ ta wuʼuyeʼex u yaʼalaʼal le baʼaxoʼob kin beetik kaʼach le tiaʼanen ichil u religión le judíoʼoboʼ.+ Teʼ kʼiinoʼob jeʼeloʼ tin sen chʼaʼpachtaj* u múuchʼulil Dios yéetel tin wilaj in xuʼulsiktiʼ.+
14 Teneʼ táan kaʼach u tsʼaʼabalten uláakʼ meyajoʼob ichil u religión le judíoʼoboʼ, maas tiʼ le bukaʼaj ku tsʼaʼabal tiʼ yaʼab tiʼ in wéet jaʼabiloʼob yanoʼob tin kaajaloʼ, tumen jach in kʼubmaj in wóol kaʼach in beet le baʼaxoʼob suukaʼan u beetaʼal tumen in taataʼoboʼ.+
15 Chéen baʼaleʼ, Dios le máax beet in síijil* yéetel tu tʼanen yoʼolal u nojoch utsiloʼ+ tu yilaj maʼalob
16 u tsʼáaik kʼaj óoltbil u Hijo. Le oʼolal tu yéeyen utiaʼal in bin in tsikbalt tiʼ le j-táanxel luʼumiloʼob le baʼaloʼob maʼalobtak yaan yil yéetel u Hijooʼ.+ Le ka tu yéeyen in beet le meyajaʼ teneʼ maʼ tin kʼáataj tiʼ mix máak bix unaj in beetkiʼ.
17 Maʼ xan naʼaken tu kaajil Jerusalén tu yiknal le máaxoʼob kʼuch u beetubaʼob apóstolil táanil tiʼ tenoʼ, baʼaxeʼ binen tu luʼumil Arabia, tsʼoʼoleʼ ka suunajen Damasco.+
18 Le ka tsʼoʼok u máan tres añoseʼ, naʼaken tu kaajil Jerusalén+ utiaʼal in xíimbaltik Cefas,*+ ka túun pʼáaten 15 días tu yiknal.
19 Chéen baʼaleʼ maʼ tin wilaj le u maasil apóstoloʼoboʼ, baʼaxeʼ chéen Santiago,+ u yíitsʼin Yuumtsil.
20 Beora túunaʼ tak tu táan Dios kin waʼalikteʼex jach jaaj le baʼax kin tsʼíibtikteʼexaʼ, maʼ táan in tuusiʼ.
21 Le ka tsʼoʼokeʼ binen tu kaajiloʼob Siria yéetel Cilicia.+
22 Chéen baʼaleʼ maʼ kʼaj óolaʼanen kaʼach teʼ tu múuchʼuliloʼob Cristo yanoʼob Judeaoʼ.
23 Chéen ku yuʼubikoʼob kaʼach lelaʼ: «Le máak chʼaʼpachtikoʼon kaʼacheʼ,+ beoraaʼ táan u tsikbaltik baʼaloʼob maʼalobtak yaan yil yéetel le fe jach u kʼáat kaʼach u xuʼulseʼ».+
24 Ka túun joʼopʼ u alabarkoʼob Dios tin woʼolal.
Notas
^ Wa «Amén».
^ Wa «táan a náachkuntaʼaleʼex».
^ Ich griegoeʼ ku yaʼalaʼal kaʼach «píitmáan in chʼaʼpachtik».
^ Ich griegoeʼ ku yaʼalaʼal kaʼach «tu tselen tu jobnel in maama».
^ Ku yaʼalaʼal xan Pedro tiʼ.
