Isaías 49:1-26
49 Islaʼex, chʼenxikinteneʼexiʼ.
Náanach luʼumileʼex, jach uʼuyeneʼexiʼ.+
Jéeobaeʼ tsʼokaʼaniliʼ u tʼanken antes tiʼ in síijileʼ.+
Desde le tiaʼanen tu nakʼ in maamaoʼ tsʼokaʼaniliʼ u yaʼalik in kʼaabaʼeʼ.
2 Letiʼeʼ tu beetaj u pʼáatal in chiʼ jeʼex junpʼéel espada jach yaan u yejeʼ.
Letiʼeʼ tsʼoʼok u pixken yéetel u boʼoyil u kʼab.+
Letiʼeʼ tu beetaj in pʼáatal jeʼex junpʼéel puputsʼkil flechaeʼ.
Letiʼeʼ tu taʼaken teʼ nuʼukul tuʼux ku bisik u flechaʼoboʼ.
3 Letiʼeʼ tu yaʼalajten: «Israel, techeʼ in j-meyajech,+yaan a meyajten utiaʼal in weʼesik in kiʼichkelmil».+
4 Chéen baʼaleʼ teneʼ tin waʼalaj: «Chéen kunel úuchik in tsʼáaik in wóol.
Tin xupaj in muukʼ tu yoʼolal mix baʼal, chéen kunel úuchik in beetik.
Chéen baʼaleʼ le máax juzgarkenoʼ Jéeoba.
In Dios kun boʼotiken».+
5 Beoraaʼ Jéeoba le máax formarten desde tu nakʼ in maama utiaʼal in meyajtikoʼ,tu yaʼalajten ka in beet u suut Jacob tu yiknal,utiaʼal in muchʼkíintik Israel tu táan.+
Teneʼ yaan in nojbaʼalkúuntaʼal tu táan Jéeoba,in Dios túuneʼ yaan u kʼuchul u beetuba in muukʼ.
6 Letiʼeʼ tu yaʼalajten: «Maʼ chéen táan a meyajtikenutiaʼal a beetik u líikʼil u tribuʼob Jacobyéetel utiaʼal a beetik u suut le israelitaʼob pʼaatloʼoboʼ.
Baʼaxeʼ teneʼ tsʼoʼok xan in tsʼáaikech bey sáasil utiaʼal le kaajoʼoboʼ,+utiaʼal u kʼuchul in salvación tak tu xuul yóokʼol kaab».+
7 Jéeoba, le Máax kaʼa manik Israeloʼ, le Máax Santooʼ,+ ku yaʼalik tiʼ le máax maʼ yaabiltaʼanoʼ,+ tiʼ le máax pʼektaʼan tumen le kaajoʼ, tiʼ u esclavo le gobernanteʼoboʼ:
«Le reyoʼoboʼ yaan u líikʼloʼob le kéen u yiloʼob,yéetel le príncipeʼoboʼ yaan u chintaloʼob tu yoʼolal Jéeoba,le Dios jeʼel u páajtal u kʼubik u yóol máak tiʼoʼ,+le Máax Santo yaan Israeloʼ, le máax yéeymilechoʼ».+
8 Lelaʼ letiʼe baʼax ku yaʼalik Jéeobaaʼ:
«Tu kʼiinil in weʼesik in wutsileʼ tin chʼenxikintaj baʼax ka waʼalik,+yéetel tin wáantech tu kʼiinil in taasik salvación.+
Seguernaj in kanáantkech utiaʼal ka pʼáatkech bey junpʼéel señal tiʼ le pacto in beetmaj yéetel le kaajoʼ,+utiaʼal a beetik u pʼáatal le luʼum jeʼex yanil kaʼachoʼ,utiaʼal a beetik u tiaʼalintikoʼob le luʼum u pʼatmoʼob kaʼachoʼ,+
9 utiaʼal a waʼalik tiʼ le máaxoʼob kʼalaʼanoʼoboʼ: ‹¡Jóokʼkeʼex!›,+yéetel utiaʼal a waʼalik tiʼ le máaxoʼob yanoʼob ich éeʼjochʼeʼeniloʼ:+ ‹¡Jóokʼkeʼex utiaʼal a wilaʼaleʼex!›.
Letiʼob túuneʼ tiʼ kun janaloʼob tu jáal le bejoʼoboʼ,yaan u yantal u yoʼochoʼob tu jáal tuláakal le bejoʼoboʼ.*
10 Letiʼobeʼ maʼ ken u muʼyajtoʼob wiʼij mix ken u muʼyajtoʼob ukʼaj,+maʼ ken u muʼyajtoʼob ooxol mix u chokoil kʼiin.+
Tumen yaan u nuʼuktaʼaloʼob tumen le máax chʼaʼiktiʼob óotsililoʼ,+yaan u bisaʼaloʼob tak tuʼux yaan u sayabiloʼob jaʼ.+
11 Tuláakal in montañaʼobeʼ yaan in beetik u suutoʼob bejil,in beeloʼobeʼ yaan u pʼáatal kaʼanal yaniloʼob.+
12 ¡Ilawile! Le jeʼeloʼobaʼ táan u taaloʼob desde náachil.+
¡Ilawil xan! Le jeʼeloʼobaʼ táan u taaloʼob desde xaman yéetel desde chikʼin,yéetel le jaats jeʼelaʼ táan u taaloʼob desde tu luʼumil Sinim».+
13 Kaʼaneʼex, awatnakeʼex yéetel kiʼimak óolal. Luʼum, kiʼimakchajak a wóol.+
Awatnak yéetel kiʼimak óolal le montañaʼoboʼ,+tumen Jéeobaeʼ tsʼoʼok u kiʼimakkúuntik u yóol u kaajal,+yéetel ku chʼaʼik óotsilil tiʼ le máaxoʼob táan u muʼyajoʼoboʼ.+
14 Chéen baʼaleʼ Sióneʼ seguernaj u yaʼalik:
«Jéeobaeʼ tsʼoʼok u xúumpʼatken.+ Jéeobaeʼ tsʼoʼok u tuʼubsiken».+
15 Juntúul koʼoleleʼ, ¿jeʼel wa u tuʼubsik u chaambaleʼ?
¿Jeʼel wa u pʼáatal maʼ u chʼaʼik óotsilil tiʼ u chan hijo yanchajtiʼoʼ?
Kex wa juntúul koʼolel jeʼel u tuʼubsik u chaambaleʼ, teneʼ junpuliʼ maʼ ken in tuʼubsech.+
16 ¡Ilawile! Teneʼ tsʼoʼok in tsʼíibtik a kʼaabaʼ tu táan in kʼaboʼob.
Le pakʼoʼob baʼpachtmilechoʼ mantatsʼ tiaʼanoʼob tin táaneʼ.
17 A paalaloʼobeʼ tu séebaʼanil táan u suutoʼob.
Le máaxoʼob juʼujutech yéetel xuʼulstechoʼ yaan u náachtaloʼob tiʼ teech.
18 Líiʼs a wichoʼobeʼ ka paakatnakech ta baʼpach.
Tuláakloʼobeʼ táan u muchʼkubaʼob,+letiʼobeʼ táan u taaloʼob ta wiknal.
Jéeobaeʼ ku yaʼalik: «Teneʼ jach tu jaajil kuxaʼanen,teen aʼalikeʼ yaan u pʼáatloʼob bey adornoʼob tiʼ techeʼ,yéetel yaan a tsʼáaikoʼob ta wóokʼol jeʼex u beetik juntúul noviaeʼ.
19 Kex xuʼulsaʼab yéetel pʼáat mix máak yaan teʼ lugaroʼob tuʼux kajaʼanech yéetel kex chéen jutul pakʼoʼob yaan ta luʼumeʼ,+beoraaʼ yaan u pʼáatal jach chichan utiaʼal le máaxoʼob kun kajtaloʼoboʼ.+
Le máaxoʼob xuʼulstechoʼ+ yaan u pʼáatal náach yaniloʼob tiʼ teech.+
20 Le paalaloʼob síijoʼob teʼ kʼiinoʼob táan a muʼyajoʼ yaan u yaʼalikoʼob ta táan:
‹Le luʼumaʼ jach chichan k-tiaʼalinte,tsʼáa tuʼux k-kajtal wayeʼ›.+
21 Techeʼ yaan a waʼalik ichil a puksiʼikʼal:
‹¿Máax u papá le paalaloʼob tsʼoʼok u tsʼaʼabaloʼob tenaʼ?
Si teneʼ minaʼan kaʼach in paalal yéetel mix tu páajtal u yantal,tsʼoʼoleʼ luʼsaʼaben tin luʼumileʼ ka bisaʼaben kʼalbil yaanal tuʼux.
¿Máax nojochkíintmiloʼob?+
¡Ilawile! Teneʼ pʼáaten jach chéen tin juunal,+le oʼolaleʼ, ¿tuʼux u taal le paalaloʼobaʼ?›».+
22 Kiʼichkelem Yuum Jéeobaeʼ ku yaʼalik:
«¡Ilawile! Teneʼ yaan in líiʼsik in kʼab tiʼ le luʼumoʼoboʼ,yéetel yaan in waʼakúuntik in señal utiaʼal u yilaʼal tumen le kaajoʼoboʼ.+
Letiʼob túuneʼ méekʼbil* ken u taasoʼob a hijoʼob,yéetel a hijaʼobeʼ yaan u taaskoʼob yóokʼol u hombroʼob.+
23 Reyoʼob kun kanáantkech,+yéetel princesaʼob kun meyajtikech.*
Letiʼobeʼ yaan u chintaloʼob ta táan, yaan u noktaloʼob tak luʼum+yéetel yaan u léetsʼkoʼob le luʼum yaan ta wookoʼoboʼ,+bey túunoʼ techeʼ yaan a wojéeltik de ke teneʼ Jéeobaen.
Le máaxoʼob ku kʼubik u yóoloʼob tiʼ tenoʼ maʼ bíin paʼajak u suʼtaloʼobiʼ».+
24 ¿Jeʼel wa u páajtal u salvartaʼal le máaxoʼob chukaʼanoʼob tumen juntúul máax jach yaan u muukʼoʼ?
¿Jeʼel wa u páajtal u salvartaʼal le máaxoʼob bisaʼanoʼob táanxel luʼumil tumen juntúul kʼasaʼan máakoʼ?
25 Chéen baʼaleʼ Jéeobaeʼ ku yaʼalik:
«Le máaxoʼob bisaʼanoʼob táanxel luʼumil tumen juntúul máax jach yaan u muukʼoʼ yaan u salvartaʼaloʼob+yéetel yaan xan u salvartaʼal le máaxoʼob chukaʼanoʼob tumen juntúul kʼasaʼan máakoʼ.+
Teneʼ yaan in tsʼáaikinba tu contra le máaxoʼob ku líikʼloʼob ta contraoʼ,+teneʼ yaan in salvartik a paalal.
26 Teneʼ yaan in beetik u jaantik u bakʼel le máaxoʼob beetiktech kʼaasoʼ,yéetel yaan in beetik u káaltaloʼob yéetel u kʼiʼikʼeloʼob jeʼex u káaltaloʼob yéetel chʼujuk vinoeʼ.
Bey túunoʼ tuláakal máak* ken u yojéelteʼ teneʼ Jéeobaen,+teen salvarkech,+ teen Máax kaʼa manikech,+teen u Dios Jacob».+
Notas
^ Uláakʼ bix u traducirtaʼaleʼ «teʼ cerroʼob tuʼux mix baʼal yanoʼ».
^ Ich hebreoeʼ ku yaʼalaʼal kaʼach «tu tseemoʼob».
^ Wa «kun tsʼáaik u chuʼuch a paalal».
^ Ich hebreoeʼ ku yaʼalaʼal kaʼach «bakʼ».
