Kex ka a wil u yantaltech kiʼimak oʼolal ichil a familiaeʼ yaan kʼiineʼ jeʼel u jáan úuchul wa baʼax jeʼel u beetik u lúubul a wóoleʼ (Eclesiastés 9:11). Baʼaleʼ Dioseʼ ku yáantkoʼon ken k-muʼyajt wa baʼax. Wa ka tsʼáaikeʼex ichil a kuxtaleʼex le baʼax ku yaʼalik le Bibliaoʼ, yaan u béeytal a aktáantkeʼex tak le baʼaxoʼob maas talamtak ku yantal tiʼ máak ichil u kuxtaloʼ.

LE BIBLIAOʼ KU YAʼALIK: «Pʼateʼex tu kʼab Dios tuláakal le kuuch chiʼichnakkúuntikeʼexoʼ, tumen letiʼeʼ jach taak u yáantkeʼex» (1 Pedro 5:7). Kʼaʼajaktecheʼ Dioseʼ maʼ tu beetik u muʼyaj máak (Santiago 1:13). Wa ka natsʼkaba tiʼ letiʼeʼ yaan u tsʼáaiktech le áantaj kʼaʼabéettechoʼ (Isaías 41:10). Aʼaltiʼ Dios jach bix a wuʼuyikaba (Salmo 62:8).

Junpʼéel baʼax jeʼel u líiʼsik a wóoleʼ letiʼe a xakʼalxoktik le Biblia sáamsamaloʼ. Wa ka beetkeʼ yaan a wilkeʼ Jéeobaeʼ «ku líiʼsik k-óol tiʼ tuláakal le baʼaxoʼob k-muʼyajtikoʼ» (2 Corintios 1:​3, 4; Romanos 15:4). Jéeobaeʼ jeʼel u tsʼáaiktech «le jeetsʼelil maʼ tu páajtal u naʼataʼal tumen wíinik[oʼ]» (Filipenses 4:6, 7, 13).

BEET LELAʼ:

• Kʼáat tiʼ Jéeoba ka u yáantech utiaʼal maʼ a sen chiʼichnaktal yéetel ka tuukulnakech tubeel

• Utiaʼal a wilik baʼax jeʼel u páajtal a beetkeʼ yáaxeʼ tukult tubeel

LE BIBLIAOʼ KU YAʼALIK: «U puksiʼikʼal le máax yaan u naʼatoʼ ku yilik u maas kaanbal, u xikin le máaxoʼob yaan u naʼatoʼoboʼ ku kaxtikoʼob bix jeʼel u maas kaanbaloʼobeʼ» (Proverbios 18:15). Ilawil a wojéeltik baʼax kʼaʼabéet tiʼ cada juntúul máax yaan ichil le familiaoʼ. Tsikbalnen tu yéeteloʼob yéetel jach uʼuy baʼax ku yaʼalikoʼob (Proverbios 20:5).

¿Kux túun wa ku kíimil juntúul máax a yaabiltmaj? Maʼ a suʼlaktal a weʼes bix a wuʼuyikaba. Kʼaʼajaktecheʼ tak Jesuseʼ ‹okʼolnaji› (Juan 11:35; Eclesiastés 3:4). Jach jeʼel u yáantaj ka jeʼelkech yéetel ka weenkech maʼalobeʼ (Eclesiastés 4:6). Lelaʼ jeʼel u yáantkech a aktáan le muʼyajiloʼ.

BEET LELAʼ:

• Maʼalob ka suukak a múul tsikbaleʼex, beyoʼ maʼ tun talamtal a tsikbaltikeʼex baʼax ken a beeteʼex ken yanak wa baʼax muʼyajil

• Tsikbalnen yéetel máaxoʼob tsʼoʼok u yúuchultiʼob junpʼéel baʼax jeʼex le ka aktáantkeʼexoʼ

LE BIBLIAOʼ KU YAʼALIK: «Juntúul jach maʼalob amigoeʼ ku yeʼesik yaabilaj tiʼ tuláakal súutukil, tu kʼiinil táan u muʼyaj máakeʼ letiʼeʼ bey juntúul sukuʼuneʼ» (Proverbios 17:17). A amigoʼobeʼ taak u yáantkechoʼob, baʼaleʼ maʼ xaaneʼ maʼ u yojloʼob bixiʼ. Maʼ a suʼlaktal a waʼaltiʼob bix jeʼel u yáantkechoʼobeʼ (Proverbios 12:25). Kʼáat áantaj tiʼ le máaxoʼob u yojloʼob baʼax ku yaʼalik le Bibliaoʼ, letiʼobeʼ jeʼel u yaʼalikoʼobtech bix jeʼel a beetik le baʼaxoʼob ku kaʼansik Diosoʼ. Le nuʼuktaj ku tsʼáaik le Bibliaoʼ jeʼel u yáantkech a aktáant le muʼyajiloʼ (Santiago 5:14).

Wa ka biskaba yéetel máaxoʼob jach yaan u fejoʼob tiʼ Dios yéetel tiʼ le baʼaxoʼob u yaʼalmaj u beetkoʼ, letiʼobeʼ jeʼel u yáantkechoʼobeʼ. Jeʼel u líiʼsik a wóol xan a wáantik le máaxoʼob lubaʼan u yóoloʼoboʼ. Tsikbalttiʼob tu yoʼolal Jéeoba yéetel tiʼ baʼaxoʼob ken u beete. Ilawil a beetik wa baʼax tu yoʼolal u maasil, maʼ a náachtal tiʼ máaxoʼob yaabiltmilech yéetel ku kaxtikoʼob a wutsiloʼ (Proverbios 18:1; 1 Corintios 15:58).

BEET LELAʼ:

• Tsikbalnen yéetel juntúul a amigo yéetel chaʼa u yáantkech

• Aʼal jach baʼaxoʼob kʼaʼabéettech