¿JEʼEL wa u chúukpajal u yóol wíinik u meyajt Dios kex ka u muʼyajt nukuch talamiloʼob yéetel kex ka u yil bey chéen kunel u beetkeʼ? Utúul máak tu kʼaabaʼtaj Jobeʼ anchaj u yeʼesik wa jeʼel u chúukpajal u yóol máakeʼ. Koʼox ilik bix úuchik u beetik.

Jobeʼ utúul u láakʼtsil Abraham, letiʼeʼ kajlaj tiʼ upʼéel luʼumil kʼaj óolaʼan bejlaʼa Arabiaeʼ, yéetel kuxlaj teʼ kʼiinoʼob tiʼ yaan le israelitaʼob tu luʼumil Egiptooʼ. Upʼéel kʼiineʼ le ka tu muchʼuba le angeloʼob teʼ kaʼanoʼ, Jéeobaeʼ tʼaanaj tiʼ bix u meyajtaʼal yéetel chúukaʼan óolal tumen Job. Ichil le angeloʼobaʼ tiʼ yaan xan Satanasiʼ. Tu táan tuláakaleʼ Jéeobaeʼ tu yaʼaleʼ minaʼan uláakʼ máak jach chúukaʼan u yóol meyajtik jeʼex Jobeʼ. Baʼaleʼ Satanaseʼ tu yaʼaleʼ Jobeʼ ku meyajtik Dios chéen tumen ayikʼalkúuntaʼan yéetel tumen jach ku kanáantaʼal. Tu yaʼaleʼ wa ka luʼsaʼak tuláakal le baʼaxoʼob yantiʼoʼ jeʼel u xuʼulul u meyajtik Dioseʼ.

Dios túuneʼ tu chaʼaj u luʼsaʼal tumen Satanás tuláakal baʼaxoʼob yaan tiʼ Job; kíimsaʼab u paalal yéetel beetaʼab u tsaʼayal upʼéel yaayaj kʼojaʼanil tiʼ. Jobeʼ maʼ u yojel wa Satanás beetik u muʼyajiʼ, le oʼolal maʼ tu naʼataj baʼaxten chaʼab u muʼyaj tumen Diosiʼ. Kex beyoʼ Jobeʼ maʼ tu xulaj u meyajtik Jéeobaiʼ.

Tu tsʼookeʼ, óoxtúul máakoʼob ku yaʼalikubaʼob u amigoʼob Jobeʼ bin u xíimbaltoʼob. Le baʼaxoʼob tu yaʼaloʼoboʼ tiʼ tsʼíibtaʼan tu libroi Jobeʼ, letiʼobeʼ tu yaʼaloʼobeʼ táan u castigartaʼal Job yoʼolal le baʼaxoʼob kʼaastak u beetmoʼ. Tu yaʼaloʼob xaneʼ Dioseʼ maʼatech u beetik u cuentai le máaxoʼob meyajtikoʼ yéetel maʼatech u confiar tiʼob. Baʼaleʼ Jobeʼ tu yaʼalajtiʼobeʼ maʼ kun xuʼulul u beetik baʼax utstutʼaan Dios tuláakal u kʼiinil u kuxtal.

U jaajileʼ maʼ maʼalob le úuchik u sen aʼalik Job mix baʼal kʼaas u beetmoʼ. Le oʼolaleʼ, Eliú, utúul táankelem xiʼipal uʼuy le baʼaxoʼob tu yaʼaloʼ, tu yáantaj u yil maas maʼalob ka u tsʼáa nojbeʼenil tiʼ u kʼaabaʼ Dios yéetel ka tʼaanak tiʼ le nojoch páajtalil yantiʼoʼ. Tsʼoʼoleʼ tu kʼeyaj le óoxtúul máakoʼob ku yaʼalikubaʼob u amigoʼob Joboʼ.

Ka tsʼoʼokeʼ Jéeobaeʼ tu yáantaj Job u kʼex bix u tuukul. Tʼaanaj tiʼ le nukuch meyajoʼob u beetmaj utiaʼal u yeʼesik maas nojoch u páajtalil tiʼ wíinikoʼ. Jobeʼ tu yeʼesaj kabal óolal yéetel tu kʼamaj le áantaj tsʼaʼabtiʼoʼ. Le oʼolaleʼ, tumen «jach nojoch u chʼaʼa óotsilil yéetel u yutsil» Jéeobaeʼ, tu tsʼakaj yéetel tu beetaj u yantaltiʼ u kaʼatéen tiʼ le bukaʼaj yaan kaʼach tiʼoʼ yéetel tu tsʼáaj uláakʼ diez utúulul u paalal (Santiago 5:11). Le úuchik u chúukpajal u yóol Job u meyajt Diosoʼ tu yeʼeseʼ maʼ jaaj le baʼax ku yaʼalik Satanasoʼ, yéetel chíikpajeʼ jeʼel u béeytal u chúukpajal u yóol wíinik u meyajt Dios kex ka muʼyajnakeʼ.

(Chʼaʼabaʼan tu libroi Job.)