JEʼEX binik u yaʼabtal u kajnáaliloʼob le Luʼumaʼ, bey úuchik u bin xan u chuʼupul yéetel baʼaloʼob kʼaastak. Maʼ xaaneʼ, chéen Enoc meyajtik Dios teʼ kʼiinoʼob jeʼeloʼ. Letiʼeʼ tu kʼaʼaytaj yaan u xuʼulsaʼal tiʼ le kʼasaʼan máakoʼoboʼ. Baʼaleʼ mix máak beet u cuentai le baʼaxoʼob tu yaʼaloʼ, baʼaxeʼ maas yaʼabchaj u beetaʼal baʼaloʼob kʼaastak. Tsʼoʼoleʼ yaan xan tiʼ le angeloʼoboʼ tu tsʼáajubaʼob tu contra Jéeoba, tu pʼatoʼob le meyaj tsʼaʼantiʼob teʼ kaʼanoʼ, tu sutubaʼob wíiniki, ka tsʼoʼok u beeloʼob yéetel le jaytúul koʼoleloʼob tu yóotoʼobeʼ. U paalaloʼobeʼ jach kaʼanchaj u baakeloʼob yéetel tsʼaʼab u kʼaabaʼtoʼob nefilim; letiʼob beet u maas yaʼabtal u beetaʼal baʼax kʼaas way Luʼumeʼ. Chéen tukult bukaʼaj yaachajik tu yóol Dios ka tu yilaj le baʼaxoʼob kʼaastak ku sen beetaʼaloʼ.

Ka kíim Enokeʼ yanchaj uláakʼ máax beet baʼax maʼalob, u kʼaabaʼeʼ Noé. Letiʼ yéetel u familiaeʼ tu yiloʼob u beetkoʼob baʼax utstutʼaan Dios. Upʼéel kʼiineʼ Jéeobaeʼ tu yaʼalaj yaan u taasik upʼéel búulkabal utiaʼal u xuʼulsik le máaxoʼob beetik baʼaloʼob kʼaastakoʼ. Baʼaleʼ maʼ u kʼáat kaʼach ka chʼéejek le baʼalcheʼoboʼ mix ka kíimik Noeiʼ. Le oʼolaleʼ, tu yaʼalajtiʼ ka u beet upʼéel arca, lelaʼ bey upʼéel nojoch cajaeʼ. Noé yéetel u familiaeʼ unaj u yookloʼob ichil yéetel unaj xan u yokskoʼob u jejeláasil baʼalcheʼobiʼ. Noeeʼ tu beetaj le arca jeʼel bix aʼalaʼabiktiʼ tumen Diosoʼ, tu bisajtiʼ kex cuarenta wa cincuenta jaʼaboʼob utiaʼal u tsʼoʼoksik. Le táan u beetik le meyaj jeʼelaʼ tu tsʼáaj xan ojéeltbil le baʼax ku taal u kʼiinoʼ (2 Pedro 2:5). Tu yaʼalaj tiʼ le máakoʼoboʼ natsʼaʼan u kʼiinil le Búulkabaloʼ, baʼaleʼ mix máak beet u cuentai. Ka kʼuch u kʼiinileʼ, Noé yéetel u familiaeʼ ookoʼob ichil le arcaoʼ yéetel tu yoksoʼob tuláakal u jejeláasil baʼalcheʼobiʼ. Dios túuneʼ tu kʼalaj u jool le arcaoʼ, ka káaj u kʼáaxal le jaʼoʼ.

Kʼáax upʼéel kʼaʼamkach jaʼ ich cuarenta kʼiinoʼob yéetel cuarenta áakʼaboʼob, bey búulik tuláakal le Luʼumaʼ. Le máaxoʼob beetik kaʼach baʼaloʼob kʼaastakoʼ láaj kíimoʼob. Jujumpʼíitil úuchik u bin u saʼapʼal le jaʼoʼ, le arca túunoʼ etsʼlaj yóokʼol upʼéel wits. Noé yéetel u familiaeʼ maas tiʼ u jaʼab tu beetoʼob ichil le arca ka jóokʼoʼoboʼ. Noé túuneʼ tu kʼubaj kíimsbil baʼalcheʼob tiʼ Jéeoba utiaʼal u tsʼáaik gracias tiʼ úuchik u salvartaʼaloʼob. Dios túuneʼ tu yaʼalajtiʼobeʼ mix bikʼin u kaʼa taasik upʼéel búulkabal utiaʼal u xuʼulsik tuláakal baʼax kuxaʼan way Luʼumeʼ. Utiaʼal u yeʼesik jach jaaj le baʼax tu yaʼaloʼ tu beetaj u chíikpajal upʼéel chéel. Cada ken ilaʼak le chéel tumen wíinikoʼ yaan u kʼaʼajaltiʼ le baʼax tu yaʼalaj Diosoʼ.

Le ka tsʼoʼok le Búulkabaloʼ Dioseʼ tu yaʼalaj jeʼel u páajtal u jaantaʼal u bakʼel le baʼalcheʼoboʼ, baʼaleʼ tu yaʼaleʼ maʼ unaj u jaantaʼal kʼiʼikʼiʼ. Tu yaʼalaj xaneʼ u kʼáat ka kʼiʼitpajak máak tiʼ tuláakal le Luʼumaʼ. Baʼaleʼ yaʼab máakoʼobeʼ maʼ tu beetoʼob le baʼax tu yaʼalaj Diosoʼ, tu muchʼubaʼob chéen tiʼ upʼéel kaaj ku kʼaabaʼtik Babel, yéetel ka máan kʼiineʼ tsʼaʼab u kʼaabaʼint Babilonia, teʼeloʼ letiʼobeʼ joʼopʼ u beetkoʼob upʼéel nojoch torre yáanal u nuʼuktaj Nimrod (Nemrod). Baʼaleʼ Dioseʼ maʼ tu chaʼaj u tsʼoʼokskoʼobiʼ. ¿Baʼax tu beetaj? Tu beetaj u xaʼakʼpajal u tʼaan le máakoʼoboʼ. Tumen pʼáat maʼ tu naʼatik u tʼaanoʼobeʼ, tu xulaj u beetkoʼob le meyajoʼ ka kʼiʼitpajoʼob.

(Chʼaʼabaʼan tiʼ Génesis capítulo 6 tak 11 yéetel Judas 14, 15.)