¿Baʼax ku creertik yaʼab científicoʼob? Yaan kaʼapʼéel clase células: yaneʼ yaan baʼax tu tsʼuʼ ku kʼaabaʼtik núcleo yéetel tiʼ uláakʼoʼobeʼ minaʼan. Le células yaan tu wíinklil máak, tiʼ le baʼalcheʼob yéetel tiʼ le verdurasoʼ yaan u núcleoʼob, chéen baʼaleʼ tiʼ le células bacterianasoʼ minaʼan. Le yaan u núcleoʼoboʼ ku kʼaabaʼtik eucariotas yéetel le minaʼan u núcleʼoboʼ ku kʼaabaʼtik procariotas. Como le células procariotas minaʼan u núcleoʼoboʼ yaʼab máakeʼ ku tuklikeʼ le células yaan tiʼ le baʼalcheʼob yéetel tiʼ le verduraʼoboʼ ku taaloʼob tiʼ le células bacterianas wa procariotasoʼ.

Ku yaʼalikoʼob xaneʼ le células procariotasoʼ máan u millonesil años táan u lukʼikoʼob uláakʼ célulaʼob. Ka máan kʼiineʼ le células luʼukʼoʼ páajchaj u pʼáatloʼob ichil le uláakʼ célulaʼoboʼ. Le tiaʼanoʼob túun ichiloʼ kʼexpajoʼob yéetel káaj u yaʼabtaloʼob. *⁹

¿Baʼax ku yaʼalik le Bibliaoʼ? Le Bibliaoʼ ku yaʼalikeʼ le baʼaloʼob kuxaʼanoʼob yanoʼob way Luʼumeʼ juntúul máax yaan u naʼat beetmiloʼob. Le Bibliaoʼ jach claro u yaʼalik: «U jaajileʼ tuláakal najeʼ yaan máax beetmil, chéen baʼaleʼ le máax beet tuláakal le baʼaloʼoboʼ Dios» (Hebreos 3:4). Uláakʼ tekstoeʼ ku yaʼalik: «Jéeoba Dios, ¡yaʼab nukuch baʼaloʼob a beetmaj! Le baʼaxoʼob a beetmoʼ ku yeʼeskoʼob jach yaan a naʼat. Le luʼumaʼ chuup yéetel tuláakal le baʼaxoʼob a beetmoʼ. [...] Chuup yéetel baʼalcheʼob nuuktakoʼob yéetel mejentakoʼob» (Salmo 104:​24, 25).

¿Baʼax ku yeʼesik le pruebaʼoboʼ? Teʼ kʼiinoʼobaʼ tsʼoʼok u maas yilaʼal baʼax yaan ichil le células procariotasoʼ. Le científicoʼob creertik le evoluciónoʼ ku yaʼalikoʼobeʼ le yáax célulasoʼ chíikaʼanoʼob tiʼ le células procariotasoʼ.¹⁰

Wa jaaj le baʼax ku yaʼalaʼal yoʼolal le evoluciónoʼ jeʼel u páajtal u tsoʼolol bix formarnajik le yáax célula chéen beyoʼ. Chéen baʼaleʼ wa anchaj máax beet tuláakal baʼal kuxaʼaneʼ unaj chíikaʼan u yilaʼal tak tiʼ le baʼaloʼob maas chichantakoʼoboʼ. ¿Bix a wilik ka k-xakʼalt baʼax yaan tu tsʼuʼ junpʼéel célula procariota? Le táan k-xakʼaltikoʼ máans ta tuukul wa jeʼel u páajtal u yantal chéen beyoʼ.

Utiaʼal u yokol máak ichil junpʼéel célula procariotaeʼ kʼaʼabéet 100 u téenel maas chichan máak tiʼ le punto kʼalik le oraciónaʼ. Jeʼex junpʼéel pakʼ baʼpachtmil junpʼéel fábricaeʼ bey baʼpachtaʼanil le célula tumen junpʼéel baʼal bey u chan sóoleʼ (membrana), lelaʼ jach jaay. Utiaʼal u chukik u piimil junpʼéel hoja juʼuneʼ kʼaʼabéet diez mil u yáalal membranaʼob. Chéen baʼaleʼ le baʼax baʼpachtmil le célulaoʼ maas maʼalob beetaʼanil tiʼ junpʼéel pakʼ. ¿Baʼaxten k-aʼalik beyoʼ?

Jeʼex le pakʼ kanáantik le fábricaoʼ, le chan sóol xanoʼ ku kanáantik le célula tiʼ baʼaloʼob jeʼel u kʼaskúuntikoʼ. Chéen baʼaleʼ le chan sóolaʼ maʼ chichiʼ tumen ku chaʼik u jóokʼol yéetel u yokol moléculas áantik le célula jeʼex le oxígenooʼ. Tsʼoʼoleʼ maʼ tu chaʼik u yokol moléculas kʼaskúuntik le célulaoʼ. ¿Bix túun u beetik tuláakal le baʼaloʼobaʼ?

Koʼox kaʼa tʼaan tiʼ le fábricaeʼ, tu joonajiloʼobeʼ yaan máaxoʼob kanáantik le baʼaxoʼob ku yoksaʼal yéetel ku jóoʼsaʼaloʼ. Láayliʼ bey xan u yúuchul yéetel le membranaoʼ tumen yaantiʼ proteínas kanáantik baʼax ku yokol yéetel baʼax ku jóokʼol teʼ célulaoʼ.

Jujunpʼéel tiʼ le proteínasoʼ (1) yaan u jooloʼob tu chúumuk, leloʼ ku chaʼik u yokol yéetel u jóokʼol jujunpʼéel moléculas. Uláakʼoʼobeʼ jeʼekʼaboʼob tiʼ junpʼéel tséel yéetel kʼaalal tiʼ uláakʼ tséel (2), tsʼoʼoleʼ chéen junpʼéeliliʼ clase baʼal ku chaʼik u yokol yéetel u jóokʼol (3). Le kéen okok le moléculaoʼ le proteínaoʼ ku jeʼepajal utiaʼal u kʼáatmáan teʼ membranaoʼ (4). Tuláakal lelaʼ letiʼe baʼax ku yúuchul tu paach jeʼel máakalmáak célulaeʼ.

Koʼox aʼalikeʼ le «máax kanáantik» le fábricaoʼ tsʼoʼok u chaʼik k-máan. Ichil le célula procariotaoʼ yaan junpʼéel líquido ku meyajtiʼ utiaʼal u beetik tuláakal le baʼax kʼaʼabéet tiʼoʼ. Jeʼex junpʼéel fábrica maʼalob bix nuʼuktaʼanileʼ le célula xanoʼ maʼalob u nuʼuktik le baʼaxoʼob ku yokol ichiloʼ.

Junpʼéel célulaeʼ yaʼab tiempo ku máansik táan u beetik proteínas. ¿Bix túun u beetik? Yáaxeʼ ku beetik kex 20 u clasesil aminoácidos, kéen tsʼoʼokokeʼ ku túuxtik tiʼ le ribosomasoʼ (5). Le ribosomas túunoʼ ku nupik le aminoácidos utiaʼal u páajtal u formarkoʼob junpʼéel clase proteínaoʼ. Jeʼex junpʼéel fábrica ku nuʼuktaʼal tumen junpʼéel computadoraeʼ le células xanoʼ ku nuʼuktaʼaloʼob tumen junpʼéel baʼal kʼaj óolaʼan bey ADN (6). Le ADN ku yaʼalik tiʼ le ribosomas baʼax clase proteína unaj u beetkoʼoboʼ yéetel bix ken u beetiloʼob (7).

U jaajileʼ jach táaj maʼalob bix u meyaj le célulasoʼ. Cada proteínaeʼ ku nupkuba yéetel uláakʼoʼob utiaʼal u chʼaʼikoʼob le forma (8) eʼesik baʼax meyajil ken u beetoʼoboʼ. * Tuukulnen tiʼ junpʼéel fábrica tuʼux ku beetaʼal motoroʼob, cada piezaeʼ unaj u beetaʼal maʼalob yéetel tu pʼiis utiaʼal ka meyajnak maʼalob le motoroʼ. Bey túun xanoʼ utiaʼal ka meyajnak maʼalob le célulaoʼ le proteínaoʼ unaj u beetaʼal maʼalob yéetel tu pʼiis.

¿Bix túun u yojéeltik le proteína tuʼux unaj u binoʼ? Cada junpʼéeleʼ bey tsʼaʼan u «marca» utiaʼal u kʼuchul teʼ tuʼux unaj u binoʼ. Beyoʼ kex ka beetaʼak u milesileʼ mix junpʼéel ku saʼatliʼ, tuláakloʼob ku kʼuchloʼob teʼ tuʼux unajoʼ.

¿Baʼax ku yeʼesik le baʼaxoʼob tsʼoʼok u beetaʼaloʼ? Mix junpʼéel molécula jeʼel u páajtal u yaʼabtal chéen tu juunaleʼ. Wa minaʼanoʼob ichil le célulaoʼ ku kʼastaloʼob, pero wa tiaʼanoʼob ichileʼ maʼ. Chéen baʼaleʼ kʼaʼabéet u yáantaj uláakʼ moléculaʼob utiaʼal u yaʼabtaloʼob. Por ejemploeʼ utiaʼal u yantal junpʼéel molécula ku kʼaabaʼtik trifosfato de adenosinaeʼ (ATP) kʼaʼabéettiʼ enzimas. Pero utiaʼal u yantal enzimaseʼ kʼaʼabéettiʼ ATP wa trifosfato de adenosina. Bey xan u yúuchul yéetel le ADN, le ADN ku yáantaj utiaʼal ka yanak enzimas yéetel le enzimasoʼ ku yáantaj utiaʼal ka yanak ADN (teʼ jaats tresoʼ yaan u maas tsoʼolol baʼax le ADN). Yaan proteínaseʼ chéen ku páajtal u beetaʼal tumen le célulaoʼ, pero le célula xanoʼ chéen ku páajtal u beetaʼal tumen le proteínasoʼ. *

Radu Popa, juntúul microbiólogo maʼ tu creertik wa yaan máax beetmil tuláakal baʼaleʼ, tu añoil 2004, tu yaʼalaj: «Wa toʼon maʼ páajchajak k-beetik u yantal kuxtal yéetel tuláakal le experimentos tsʼoʼok k-beetkoʼ, ¿bix túun jeʼel u páajtal u yantal kuxtal chéen beyoʼ?».¹³ Tu yaʼalaj xan: «Jach táaj yaʼab baʼaloʼob kʼaʼabéet utiaʼal ka páajchajak u yantal junpʼéel célula kuxaʼan, le oʼolaleʼ jach difícil u creertaʼal chéen bey úuchik u yantaloʼ».¹⁴

Techeʼ, ¿baʼax ka tuklik? Le máaxoʼob creertik le evoluciónoʼ ku kíimskuba u tsoloʼobeʼ le kuxtal yaan way yóokʼol kaabeʼ chéen bey úuchik u yantaloʼ. Pero jeʼex u bin u maas xakʼaltik le científicoʼob baʼax beetik u yantal le kuxtaloʼ maas maʼ tu páajtal u tsolkoʼob bix úuchik u yantal chéen beyoʼ. Yoʼolal leloʼ jujuntúul científicoʼobeʼ ku yaʼalikoʼobeʼ le evoluciónoʼ deporsi maʼ tu tsolik bix káajik le kuxtaloʼ. Chéen baʼaleʼ, ¿techeʼ bix a wilik le baʼax ku yaʼalikoʼobaʼ?

Le evoluciónoʼ ku kaʼansikeʼ le kuxtaloʼ chéen bey úuchik u yantaloʼ, tsʼoʼoleʼ ku yaʼalik xaneʼ chéen bey úuchik u yantal le jejeláas baʼaloʼob kuxaʼanoʼoboʼ. Chéen baʼaleʼ wa maʼ tu páajtal u probartik le científicoʼob de ke jach jaaj le baʼax ku kaʼansik le evoluciónoʼ, ¿bix túun kun páajtal u tsolkoʼob le uláakʼ baʼaxoʼob ku yaʼalikoʼoboʼ? Wa maʼ maʼalob u cimientoil junpʼéel nuxiʼ edificioeʼ séeb jeʼel u lúubuleʼ. Bey túun xanoʼ wa maʼ tu tsolik le evolución bix káajik le kuxtaloʼ séeb kun tsʼaabil cuentaeʼ chéen tuus.

Beora tsʼoʼok k-xakʼaltik bix u meyaj junpʼéel célula simpleeʼ, ¿techeʼ baʼax ka tuklik? ¿Chéen bey anchajikoʼ wa yaan máax beete? Wa todavía maʼ a wojel baʼax ken a núukeʼ koʼox xakʼaltik le «baʼax beetik u meyaj» tuláakal le célulaʼoboʼ.