Beoraaʼ tsʼoʼok óoxpʼéel kʼiin káajak u tsaypachtaʼal Jesús tumen Natanael, juntúul tiʼ le yáax disipuloʼoboʼ. Jesuseʼ bin tu yéeteloʼob tu xamanil u luʼumil Galilea, le tuʼux nuukchajoʼoboʼ. Letiʼobeʼ binoʼob tu chan kaajil Caná, u kaajal Natanael. Canaeʼ tiaʼan tu xaaman u witsiloʼob Nazaret, le tuʼux nojochchaj Jesusoʼ. Letiʼobeʼ invitartaʼaboʼob utiaʼal junpʼéel tsʼoʼokol beel beetaʼab tu kaajil Caná.

U maama Jesuseʼ bin xan teʼ tsʼoʼokol beeloʼ. Maʼ xaaneʼ Maríaeʼ ku biskuba yéetel u láakʼtsiloʼob le noviotsiloʼoboʼ, tumen táan u yáantaj teʼ meyajoʼob ku beetaʼaloʼ. Le oʼolal séebaʼan úuchik u tsʼáaik cuenta yaan baʼax ku xuʼupul, ka tu yaʼalaj tiʼ Jesús: «Minaʼan vino tiʼob» (Juan 2:3).

Maríaeʼ bin u yaʼal tiʼ Jesús ka u beet wa baʼax tumen tsʼoʼok u xuʼupul le vinooʼ. Utiaʼal u yeʼesik Jesús mix baʼal yaan u yil yoʼolal leloʼ, tu yaʼalajtiʼ: «Koʼolel, ¿baʼaxten ka waʼalikten leloʼ?» (Juan 2:4). Tumen Dios yéeymil utiaʼal u beetik u Reyileʼ, chéen letiʼ jeʼel u páajtal u yaʼalik tiʼ Jesús baʼax unaj u beetkeʼ, maʼ u láakʼtsiloʼobiʼ mix u amigoʼobiʼ. Maríaeʼ tu pʼataj tu kʼab u hijo utiaʼal ka u yil baʼax ken u beete, baʼaleʼ tu yaʼalaj tiʼ le máakoʼob ku meyajoʼoboʼ: «Beeteʼex tuláakal baʼax ken u yaʼalteʼex» (Juan 2:5).

Teʼeloʼ yaan kaʼach 6 u pʼéelel tinajaʼobiʼ, cada junpʼéeleʼ jeʼel u bisik kex cuarenta litros jaʼeʼ. Jesuseʼ tu yaʼalaj tiʼ le máakoʼob ku meyajoʼoboʼ: «Chupeʼex yéetel jaʼ le tinajaʼoboʼ». Tsʼoʼoleʼ ka tu yaʼalajtiʼob: «Beoraaʼ jóoʼseʼex junpʼíiteʼ ka a biseʼex tiʼ le máax tsʼaʼan u yil le festejooʼ» (Juan 2:7, 8).

Le máax tsʼaʼan u yil le festejooʼ jach kiʼ úuchik u yuʼubik le vinooʼ, baʼaleʼ maʼ u yojel wa yéetel junpʼéel milagro beetaʼabiʼ. Le oʼolal tu tʼanaj le noviotsiloʼ ka tu yaʼalajtiʼ: «Tuláakal máakeʼ yáaxeʼ ku tsʼáaik le maʼalob vinooʼ, yéetel ken káalchajak le máakoʼoboʼ, ku tsʼáaik le maʼ maʼaloboʼ; baʼaleʼ techeʼ ta wilaj ka yanak maʼalob vino tak beoraaʼ» (Juan 2:10).

Lelaʼ letiʼe yáax milagro tu beetaj Jesusoʼ. Le ka ilaʼab tumen u yáax disipuloʼob lelaʼ tu maas tsʼáaj u fejoʼob tiʼ letiʼ. Ka tsʼoʼokeʼ Jesús, u maama yéetel u majan íitsʼinoʼobeʼ binoʼob tu noj kaajil Capernaum, tu xaman-chikʼinil u kʼáaʼnáabil Galilea.