Jeʼex aʼalaʼabik tumen Jesuseʼ, Pedro yéetel Juaneʼ binoʼob Jerusalén utiaʼal u listokíintkoʼob tuláakal utiaʼal le Pascuaoʼ. Tsʼoʼoleʼ Jesús yéetel uláakʼ diez apostoloʼoboʼ binoʼob xaniʼ. Tsʼoʼok u tardechajal, le kʼiinoʼ tsʼoʼok u káajal u chíinil le táan u taal u yéemel Jesús tu puʼukil le Olivoʼoboʼ. Lelaʼ letiʼe u tsʼook úuchik u taal Jesús Jerusalenoʼ, hasta u kaʼa kuxtaleʼ ku suutiʼ.

Maʼ xáanchaj ka kʼuch Jesús yéetel u apostoloʼob tu kaajil Jerusaleniʼ, ka binoʼob teʼ naj tuʼux beetaʼan u jaanlil le Pascuaoʼ. Ka kʼuchoʼobeʼ naʼakoʼob teʼ cuarto yaan kaʼanaloʼ. Ka ookoʼobeʼ tu yiloʼobeʼ láaj listo utiaʼal le kʼiinbesajoʼ. Jesuseʼ úuch joʼopʼok u páaʼtik le kʼiin jeʼelaʼ, letiʼeʼ tu yaʼalaj: «¡Bukaʼaj in tsʼíiboltmil in jaantik le Pascua ta wéeteleʼex táanil tiʼ in muʼyajoʼ!» (Lucas 22:15).

Yaʼab jaʼaboʼob táanil tiʼ lelaʼ, suukchaj u yuʼukʼul vino tumen tuláakal le máaxoʼob kʼiinbesik le Pascuaoʼ. Ka tu chʼaʼaj junpʼéel copa vinoeʼ tu yaʼalaj: «Chʼaʼex lelaʼ ka a máanseʼex ta baatsileʼex, tumen kin waʼalikteʼex: Desde bejlaʼeʼ maʼ ken in wukʼ tu kaʼatéen u kʼaab le uvaoʼ tak ken kʼuchuk u Reino Dios» (Lucas 22:17, 18). Lelaʼ tu yaʼalaj tumen tsʼoʼok u kʼuchul u kʼiinil u kíimil.

Junpʼéel súutuk le táan u jaanloʼoboʼ úuch junpʼéel baʼax jelaʼan. Líikʼ Jesuseʼ ka tu tsʼáaj juntséelil u yáal u nookʼ. Tu chʼaʼaj xan junpʼéel toalla yéetel tu láalaj jaʼ tiʼ junpʼéel palangana. U suukileʼ le máax ku invitar utiaʼal junpʼéel janaloʼ ku pʼoʼik u yook le máaxoʼob u invitartmoʼ wa ku yaʼalik tiʼ u palitsil ka u beete (Lucas 7:44). Baʼaleʼ teʼ kʼiin jeʼeloʼ maʼ invitartaʼanoʼob tumen mix máakiʼ, le oʼolal líikʼ Jesús u beete. Jeʼel máakalmáak tiʼ le apostoloʼob jeʼel u páajtal kaʼach u beetkoʼoboʼ, baʼaleʼ mix juntúul tiʼ letiʼob beetiʼ. Maʼ xaaneʼ tumen láayliʼ maʼatech u jach biskubaʼobeʼ. Kex beyoʼ, suʼlakchajoʼob ka tu yiloʼob Jesús kun pʼoʼik u yookoʼob.

Ka kʼuch Jesús yiknal Pedroeʼ, tu yaʼalaj: «Techeʼ jach junpuliʼ maʼ ken a pʼoʼ in wook». Jesuseʼ tu yaʼalajtiʼ: «Wa maʼ tin pʼoʼik a wookeʼ, techeʼ maʼ táakpajaʼanech ichil le máaxoʼob in tiaʼaloʼoboʼ». Simón Pedroeʼ tu yaʼalajtiʼ: «Yuumtsil, maʼ chéen in wookiʼ, baʼaxeʼ tak in kʼaboʼob yéetel in pool». Jesús túuneʼ tu yaʼalajtiʼ: «Le máax tsʼoʼok u yichkíileʼ chéen u yook kʼaʼabéet u pʼoʼik tumen limpio tuláakal u wíinklil. Teʼexeʼ limpioʼex, baʼaleʼ maʼ tuláakleʼexiʼ» (Juan 13:8-10).

Jesuseʼ tu pʼoʼaj u yook le 12 apostoloʼoboʼ, tak Judas Iscariote. Ka tsʼoʼok túun u pʼoʼik u yookoʼob, u kaʼa takik le u yáal u nookʼ yéetel u kaʼa kutal tu yiknal le mesaoʼ, tu yaʼalajtiʼob: «¿Ka  naʼatkeʼex wa baʼaxten tin beetaj lelaʼ? Teʼexeʼ ka waʼalikeʼexten ‹j-Kaʼansaj› yéetel ‹Yuumtsil›, jach jaaj baʼax ka waʼalikeʼex, tumen j-Kaʼansajen yéetel Yuumtsilen. Le oʼolaleʼ wa teen kex Yuumtsilen yéetel j-Kaʼansajen tsʼoʼok in pʼoʼik a wookeʼexeʼ, teʼex xaneʼ unaj a pʼoʼik a wookeʼex ta baatsileʼex. Tumen teneʼ tsʼoʼok in weʼesikteʼex bix unaj a beetkeʼex; jeʼex tsʼoʼok in weʼesikteʼexoʼ, teʼex xaneʼ bey unaj a beetkeʼexoʼ. Jach tu jaajil kin waʼalikteʼex: Le palitsiloʼ maʼ maas nojoch tiʼ u tsʼuuliliʼ, le máax ku túuxtaʼal xanoʼ maʼ maas nojoch tiʼ le máax túuxtikoʼ. Beora tsʼoʼok a wojéeltikeʼex le baʼaloʼobaʼ, kiʼimak a wóoleʼex wa ka beetkeʼex» (Juan 13:12-17).

¿Máasaʼ jach jatsʼuts úuchik u kaʼansiktiʼob u yeʼesoʼob kabal óolal? U disipuloʼob Jesuseʼ maʼ unaj u kaxtikoʼob chéen u yutsiloʼob utiaʼal ka meyajtaʼakoʼobiʼ. Baʼaxeʼ unaj u beetkoʼob jeʼex Jesuseʼ. Lelaʼ maʼ u kʼáat u yaʼal wa yaan u paklan pʼoʼik u yookoʼobiʼ, baʼaxeʼ unaj u yeʼeskoʼob kabal óolal tuláakal súutukil.