Junjaats máakoʼobeʼ lakʼin u taaloʼob. Letiʼobeʼ astrologoʼob, le máakoʼob beyaʼ ku yaʼalikoʼobeʼ le estrellaʼoboʼ yaan baʼax u yiloʼob ichil u kuxtal máak (Isaías 47:13). Le tiaʼanoʼob tu yotochoʼoboʼ tu yiloʼob junpʼéel «estrella» nuʼuktoʼob ich yaʼab kilómetros tak tu kaajil Jerusalén, maʼ tu kaajil Beleniʼ.

Le ka kʼuch le astrologoʼoboʼ, tu yaʼaloʼob: «¿Tuʼux yaan u rey le judíoʼob tsʼoʼok u síijiloʼ? Tumen le tiaʼanoʼon teʼ Lakʼinoʼ t-ilaj u estrellaeʼ, ka túun taaloʼon chintal tu táan» (Mateo 2:1, 2).

Ka tu yuʼubaj rey Herodes le baʼax aʼalaʼaboʼ jach péeknaj u yóol. Ka tu tʼanaj u nuuktakil le sacerdoteʼob yéetel le escribaʼoboʼ ka tu kʼáatajtiʼob tuʼux aʼalaʼan kun síijil le Cristooʼ. Ka tu yiloʼob le baʼax ku yaʼalik le Kiliʼich Tsʼíiboʼoboʼ tu yaʼaloʼobtiʼ: «Tu kaajil Belén» (Mateo 2:5; Miqueas 5:2). Herodes túuneʼ tʼaanaj junpáayil yéetel le astrologoʼoboʼ ka tu yaʼalajtiʼob: «Xeeneʼex yéetel kaxteʼex tubeel le chan xiʼipaloʼ, yéetel ken a wileʼex tuʼux yaneʼ suuneneʼex a waʼaleʼexten, utiaʼal ka xiʼiken xan chintal tu táan» (Mateo 2:8). Baʼaleʼ Herodeseʼ chéen u kʼáat u kaxt le chan paal utiaʼal u kíimsoʼ.

Le ka jóokʼ u binbal le astrologoʼoboʼ úuch junpʼéel baʼal jelaʼan. Le «estrella» tu yiloʼob le tiaʼanoʼob teʼ lakʼinoʼ joʼopʼ u bin táanil tiʼob. Lelaʼ ku yeʼesikeʼ maʼ chéen wa baʼax estrellailiʼ, baʼaxeʼ tsʼaʼab utiaʼal u nuʼuktaʼaloʼob. Le astrologoʼoboʼ binoʼob tu paach, le «estrella» túunoʼ jeʼel yóokʼol le naj tuʼux yaan José, María yéetel Jesús, u chan hijo.

Le ka ook le astrologoʼob ichil le najoʼ tu yiloʼob María yéetel chan Jesús. Le astrologoʼob túunoʼ chinlajoʼob tu táan Jesús. Ka tu síijoʼob oro, incienso yéetel mirra tiʼ. Baʼaleʼ le jach taʼaytak u suutoʼob u yaʼaloʼob tiʼ Herodes tuʼux yaan le chan paaloʼ, aʼalaʼabtiʼob ichil junpʼéel wayakʼ tumen Dios maʼ u binoʼobiʼ. Le oʼolal tu chʼaʼajoʼob yaanal bej utiaʼal u binoʼob tu luʼumoʼob.

¿Máax a tuklik tsʼáa le «estrella» utiaʼal u nuʼuktik le astrologoʼoboʼ? Kʼaʼajaktecheʼ maʼ juntaatsʼ nuʼuktaʼabikoʼob yiknal Jesús tu kaajil Beleniʼ. Baʼaxeʼ yáax nuʼuktaʼaboʼob tu kaajil Jerusalén utiaʼal ka xiʼikoʼob yiknal Herodes, le máax taak u kíimsik Jesusoʼ. Tsʼoʼoleʼ wa maʼ úuchik u yaʼalaʼal tiʼ le astrologoʼob tumen Dios maʼ u binoʼob u yaʼaloʼob tiʼ Herodes tuʼux yaan Jesuseʼ, tsʼoʼok kaʼach u kíimskeʼ. Lelaʼ ku yeʼesikeʼ Satanás, u enemigo Dios, beet u chíikpajal le «estrella» utiaʼal u beetik u kíimsaʼal kaʼachoʼ.