Jesuseʼ láayliʼ tiʼ ku kʼaʼaytaj tu yáamil Perea yéetel Jerusaleneʼ. Juntúul táankelem máak ayikʼaleʼ taal u yáalkab tu yiknaleʼ ka xolaj tu táan. Maʼ xaaneʼ letiʼeʼ «juntúul u nojchil le sinagogaoʼ» wa juntúul tiʼ le máaxoʼob ku meyajoʼob teʼ Sanedrinoʼ. Letiʼeʼ tu kʼáataj: «Utsul j-Kaʼansaj, ¿baʼax kʼaʼabéet in beetik utiaʼal in kʼamik kuxtal minaʼan u xuul?» (Lucas 8:41; 18:18; 24:20).

Jesuseʼ tu yaʼalajtiʼ: «¿Baʼaxten ka waʼalik utsen? Mix máak uts, chéen Dios». Maʼ xaaneʼ meyajnajtiʼ le tʼaan «uts» utiaʼal u yeʼesik tsiikil, jeʼex u beetik le máaxoʼob kaʼansik le leyoʼ. Kex Jesús jach maʼalob u kaʼansajeʼ tu yaʼalaj tiʼ le máakoʼ chéen tiʼ Dios unaj u yaʼalaj «uts».

Jesuseʼ tu yaʼalajtiʼ: «Wa a kʼáat ka yanaktech le kuxtaloʼ, beet mantatsʼ baʼax ku yaʼalik u Ley Dios». Le xiʼipaloʼ tu yaʼalajtiʼ: «¿Máakalmáak?». Jesuseʼ tu kʼaʼajsajtiʼ cinco tiʼ le diez mandamientos le tuʼux ku yaʼalik maʼ unaj u kíimsik u yéet máakiliʼ, maʼ unaj u lúubul tiʼ adulterioiʼ, maʼ unaj u yookoliʼ, maʼ unaj u jaajkúuntik baʼax maʼ jaajiʼ yéetel unaj u yeʼesik tsiikil tiʼ u taata yéetel tiʼ u maama. Ka tsʼoʼokeʼ tu yaʼalajtiʼ: «Kʼaʼabéet a yaabiltik a wéet máakil jeʼex a yaabiltikabaeʼ» (Mateo 19:17-19).

Le xiʼipaloʼ tu yaʼalaj: «Tuláakal le jeʼeloʼobaʼ kin beetik; ¿baʼax túun ku bineltikten?» (Mateo 19:20). Maʼ xaaneʼ ku tuklik yaan uláakʼ baʼax jach maʼalob unaj u beetik utiaʼal u yantal le kuxtal minaʼan u xuul tiʼoʼ. Ka tu yuʼubaj Jesús baʼax ku yaʼalikeʼ tu paktaj yéetel yaabilaj (Marcos 10:21). Baʼaleʼ le xiʼipaloʼ yaan junpʼéel baʼax kʼatik u beel.

Letiʼeʼ jach u yaabiltmaj le baʼaxoʼob yaantiʼoʼ, le oʼolal aʼalaʼabtiʼ tumen Jesús: «Junpʼéel baʼax ku bineltik a beetik: Xeen, kon le baʼaxoʼob yaantechoʼ ka a tsʼáa tiʼ le óotsiloʼoboʼ, beyoʼ yaan u yantaltech ayikʼaliloʼob teʼ kaʼanoʼ; tsʼoʼoleʼ, koʼoten, ka taalakech tin paach». Letiʼeʼ jeʼel u páajtal u tʼoxik u taakʼin tiʼ le óotsiloʼob maʼ tu páajtal u sutkoʼob u jeel tiʼ utiaʼal u beetkuba disipuloil tiʼ Jesusoʼ. Baʼaleʼ okʼomchaj u yóoleʼ ka lukʼ yiknal Jesús. Tumen jach u yaabiltmaj le «baʼaloʼob yaan kaʼach» tiʼoʼ, maʼ tu yilaj u maʼalobil u tsaypachtik Jesusiʼ (Marcos 10:21, 22). Jesús túuneʼ tu yaʼalaj: «¡Jach túun yaan u talamtal tiʼ le máaxoʼob yaan taakʼin tiʼob u yookloʼob tu Reino Diosoʼ!» (Lucas 18:24).

Le disipuloʼoboʼ jaʼakʼ u yóoloʼob ka tu yuʼuboʼob u yaʼalik lelaʼ, le oʼolal Jesuseʼ tu yaʼalaj: «U jaajileʼ maas séeb jeʼel u máan juntúul camello tu chan joolil junpʼéel u púutsʼil chuuyeʼ, ke ka okok juntúul ayikʼal máak tu Reino Dios». Letiʼob túuneʼ tu kʼáatoʼob: «¿Máax túun jeʼel u páajtal u salvarkubaeʼ?». ¿Jach wa táaj talam tiʼ wíinik u beetik baʼax ku kʼáataʼal utiaʼal u páajtal u salvarkuba? Jesuseʼ tu paktoʼobeʼ ka tu yaʼalajtiʼob: «Le baʼaxoʼob maʼ tu páajtal u beetik wíinikeʼ Dioseʼ jeʼel u páajtal u beetkeʼ» (Lucas 18:25-27).

Pedroeʼ tu yaʼaleʼ letiʼobeʼ tsʼoʼok u beetkoʼob junpʼéel baʼax jelaʼan tiʼ le tu beetaj le táankelem ayikʼaloʼ. Tu yaʼalaj: «Ile, toʼoneʼ tsʼoʼok k-pʼatik tuláakal le baʼaxoʼob yaantoʼon kaʼachoʼ yéetel tsʼoʼok k-taal ta paach; ¿baʼax túun kun tsʼaabiltoʼon?». Jesuseʼ tu yaʼalajtiʼob baʼax utsil ken u kʼamoʼob úuchik u beetkoʼob leloʼ: «Ken túumbenkuntaʼak tuláakal baʼal yéetel ken kulak u Paal máak tu kiʼichkelem tronoeʼ, teʼex taaleʼex tin paacheʼ yaan xan a kutaleʼex tiʼ doce tronoʼob yéetel yaan a juzgartikeʼex u doce chʼiʼibaloʼob Israel» (Mateo 19:27, 28).

Jesuseʼ táan u tʼaan tiʼ le kʼiin ken utskíintaʼak tuláakal baʼal utiaʼal u pʼáatal jeʼex kaʼach tu jardinil Edeneʼ. Pedro yéetel u maasil disipuloʼoboʼ yaan u tsʼaʼabal u jatsʼuts páajtalil u gobernaroʼob yéetel Jesús yóokʼol le Luʼum ken suʼutuk paraísoiloʼ. Lelaʼ junpʼéel siibal ku náajmatik u beetik máak tuláakal le ku páajtal utiaʼal ka u kʼameʼ.

Baʼaleʼ maʼ chéen teʼ kʼiinoʼob ku taal ken u kʼamoʼob utsiloʼoboʼ. Le disipuloʼoboʼ tsʼoʼok u káajal u kʼamkoʼob yaʼab utsiloʼob. Jesuseʼ tu yaʼalajtiʼob: «Mix máak tsʼoʼok u pʼatik u yotoch, u yatan, u sukuʼunoʼob, u taataʼob wa u paalaloʼob tu yoʼolal u Reino Dios, wa maʼ u kʼamik u maas yaʼabil teʼ kʼiinoʼobaʼ, yéetel teʼ túumben yóokʼol kaaboʼ, kuxtal minaʼan u xuul» (Lucas 18:29, 30).

Jach beyoʼ, jeʼel tuʼuxak ka xiʼik le disipuloʼoboʼ yaan u yilkoʼob uláakʼ máaxoʼob adorartik Dios ku maas eʼeskoʼob yaabilaj tiʼ le ku yeʼesik jach u láakʼtsil máakoʼ. Baʼaleʼ le táankelem ayikʼaloʼ maʼ ken u kʼam le bendicionoʼobaʼ mix le kuxtal minaʼan u xuul yáanal u Reino Diosoʼ.

Jesuseʼ tu yaʼalaj: «Baʼaleʼ yaʼab tiʼ le máaxoʼob yanoʼob táaniloʼ yaan u pʼáatloʼob tu tsʼook, yéetel yaʼab tiʼ le yanoʼob tu tsʼookoʼ yaan u máanoʼob táanil» (Mateo 19:30). ¿Baʼax tu yóotaj u yaʼal yéetel lelaʼ?

Le táankelem ayikʼaloʼ tiaʼan kaʼach ichil le yanoʼob ‹táaniloʼ›, tumen tiaʼan ichil u nuuktakil le judíoʼoboʼ. Tumen jach u kʼaj óol u Ley Dioseʼ, yaʼab baʼaxoʼob ku páaʼtaʼal ka u beete. Baʼaleʼ letiʼeʼ tu tsʼáaj táanil chéen le ayikʼaliloʼob ichil u kuxtaloʼ. Baʼaleʼ u maasil máakoʼoboʼ tu kʼamoʼob le u jaajil ku kaʼansik Jesusoʼ yéetel tu tsaypachtoʼob. Letiʼobeʼ «tu tsʼook» kaʼach yanoʼob, baʼaleʼ beoraaʼ tsʼoʼok «u máanoʼob táanil». Letiʼobeʼ jeʼel u páaʼtkoʼob u kutaloʼob reinar yéetel Cristo teʼ kaʼan yóokʼol le Luʼum kun sutbil paraísoiloʼ.