«Seguernak [...] a perdonarkabaʼex ta baatsileʼex yéetel u jaajil a wóoleʼex kex wa yaan baʼax oʼolal u tʼaan máak tu contra uláakʼ» (COLOSENSES 3:13).

Tumen kʼebanoʼoneʼ jeʼel k-beetik u yaatal u yóol wa máax yoʼolal baʼax k-aʼalik wa yoʼolal baʼax k-beetkeʼ, yéetel yaan horaeʼ jeʼel xan u beetaʼal tiʼ toʼoneʼ. Le oʼolal unaj k-perdonar utiaʼal ka perdonartaʼakoʼon. Wa k-perdonareʼ ku xuʼulul k-chʼaʼkʼuxtik le máax ofendertoʼonoʼ, maʼatech k-sutik u jeel mix tech k-kʼaʼajsiktiʼ láalaj hora (Romanos 12:17). Pero ¿kux túun wa k-uʼuyik jach maʼ tu tuʼubultoʼon le baʼax beetaʼabtoʼonoʼ? Wa bey k-uʼuyikbaoʼ maas maʼalob ka tsikbalnakoʼon yéetel le máax ofendertoʼonoʼ, lelaʼ unaj k-beetik yéetel respeto. Le baʼax k-kaxtik le kéen tsikbalnakoʼonoʼ letiʼe k-utskíintik le problemaoʼ maʼ letiʼe u maas nojochtaloʼ (Romanos 12:18).

«Yéetel kabal óolaleʼ ileʼex u maasil bey maas importanteʼob ke teʼexeʼ» (FILIPENSES 2:3).

Wa k-eʼesik kabal óolal yéetel k-eʼesik respetoeʼ u maasileʼ yaan u taaktal u biskubaʼob t-éetel. Tsʼoʼoleʼ wa yaan hora k-beetik baʼax maʼ maʼalobeʼ ku naʼatkoʼob maʼ k-óoliliʼ k-beetiʼ. Wa ku joʼopʼol k-tuklik maas importanteʼon ke u maasileʼ maʼ ken k-tratartoʼob tubeel yéetel tu lugar k-utskíintik junpʼéel problemaeʼ yaan u taaktal k-baʼateʼel. Tsʼoʼoleʼ wa maʼ  t-tratarkoʼob tubeeleʼ maʼ ken u yóotoʼob u bisubaʼob t-éetel.

«Dioseʼ mix máak jelaʼan u paktik, baʼaxeʼ tiʼ tuláakal kaajeʼ ku kʼamik jeʼel máaxak ku beetik baʼax maʼalobeʼ yéetel jeʼel máaxak u chʼaʼamaj saajkilil tiʼeʼ» (HECHOS 10:34, 35).

Dioseʼ ku tratartik maʼalob tuláakal máak kex jeʼel tuʼuxak u taaleʼ, kex jeʼel baʼalak idiomail ku tʼankeʼ, kex óotsil wa ayikʼal bey xan jeʼel máakalmáak u color u yootʼeleʼ. Le Bibliaoʼ ku yaʼalik: «Chéen yéetel juntúul wíinikeʼ tu beetaj tuláakal u kajnáaliloʼob le luʼumaʼ» (Hechos 17:26). Lelaʼ u kʼáat u yaʼaleʼ tuláakal le máaxoʼob kajaʼanoʼob way Luʼumoʼ k-láakʼtsiloʼob. Wa k-tratartik maʼalob tuláakal máakeʼ letiʼobeʼ yaan u kiʼimaktal u yóoloʼob, toʼon xaneʼ yaan u kiʼimaktal k-óol tsʼoʼoleʼ tak Dioseʼ yaan u kiʼimaktal u yóol.

‹Eʼeseʼex jeetsʼel óolal› (COLOSENSES 3:12).

Wa maʼ t-séeb pʼuʼujuleʼ u maasileʼ yaan u taaktal u biskubaʼob t-éetel. Yaan tak u yantaltiʼob confianza utiaʼal u tsikbaltikoʼob baʼax ku yúuchultiʼob, yéetel maas fácil jeʼel k-tsolnuʼuktaʼal wa ku kʼaʼabéettaleʼ. Utiaʼal maʼ u píitmáan u pʼuʼujul máax ku kʼeykoʼoneʼ jach jeʼel u yáantaj wa maʼ t-kʼakʼatnúuktik u tʼaaneʼ. Proverbios 15:1, ku yaʼalik: «Utsul tʼaaneʼ ku beetik u xuʼulul kʼuuxil, pero tʼaan yaj u yuʼubaʼaleʼ ku beetik u maas pʼuʼujul máak».

«Maas ku taasik kiʼimak óolal u tsʼaʼabal wa baʼax ke u kʼaʼamal wa baʼax» (HECHOS 20:35).

Yaʼab máakoʼobeʼ chéen ku tuukuloʼob tu yoʼolaloʼob yéetel ku taaktal u yantaltiʼob yaʼab baʼaloʼob. Pero wa k-eʼesik utsil tiʼ u maasileʼ yaan u kiʼimaktal k-óol (Lucas 6:38). Le máaxoʼob utsoʼoboʼ jach ku kiʼimaktal u yóoloʼob le kéen u síiʼob wa baʼax tiʼ u maasil tumen maas u yaabiltmoʼob máak ke le baʼaxoʼob yaantiʼoboʼ (Colosenses 3:15). Tukle: «¿Yéetel máax uts tin tʼaan in biskinba?, ¿yéetel máax tsʼuʼut?, ¿yéetel máax maʼ suuk u tsʼáaik u graciasiliʼ? wa ¿yéetel le máaxoʼob utsoʼob yéetel suuk u tsʼáaikoʼob u graciasiloʼ?». Le bix a kʼáat ka tratartaʼakecheʼ bey unaj a tratartik u maasiloʼ (Mateo 7:12).