Le máax kaʼanal u yichoʼ jeʼel u káajal u pʼektik u maasileʼ. Jeʼel tak u tuklik maas maʼalob tiʼ letiʼobeʼ. Le máaxoʼob beyaʼ ku mixbaʼalkúuntikoʼob uláakʼ máakoʼob. U jaajileʼ tiʼ tuláakal máak jeʼel u yúuchul lelaʼ. Le Encyclopædia Britannicaoʼ ku yaʼalik: «U maas yaʼabil le máakoʼoboʼ ku tuklikoʼobeʼ le bix u kuxtaloʼoboʼ, le baʼaxoʼob ku jaantikoʼoboʼ, le bix u vestirkubaʼoboʼ, le baʼaxoʼob suuk u beetkoʼoboʼ, le baʼaxoʼob ku creerkoʼob wa uláakʼ baʼaloʼoboʼ maas maʼalobtak tiʼ le baʼax ku beetik u maasiloʼ». ¿Baʼax jeʼel u yáantkoʼon utiaʼal maʼ k-tuukul beyaʼ?

«Yéetel kabal óolaleʼ ileʼex u maasil bey maas importanteʼob ke teʼexeʼ» (FILIPENSES 2:3).

¿Baʼax u kʼáat u yaʼale? Utiaʼal maʼ u kaʼantal k-icheʼ unaj k-eʼesik kabal óolal. Wa k-eʼesik lelaʼ yaan k-ilkeʼ yaan baʼaloʼob maas maʼalob ku beetik u maasil ke toʼon. Mix junpʼéel raza maas maʼalob tiʼ uláakʼ.

Koʼox ilik baʼax úuch tiʼ Stefan. Letiʼeʼ líikʼ tiʼ junpʼéel luʼumil tuʼux le gobierno tʼoxik u ayikʼalil le kaajoʼ (comunismo), le oʼolal káaj u pʼektik le uláakʼ kaajoʼob maʼ bey u gobiernoʼoboʼ. Chéen baʼaleʼ xuʼul u tuukul beyoʼ. Letiʼeʼ ku yaʼalik: «In waʼalikeʼ utiaʼal u xuʼulul k-pʼektik u maasileʼ unaj k-tuklikeʼ maas maʼalob  u maasil tiʼ toʼon. Teneʼ maʼ tuláakal baʼal in wojliʼ, le oʼolal yaʼab baʼal jeʼel in kanik tiʼ u maasileʼ».

Unaj a chʼaʼik en cuentaeʼ tak teech ka beetik baʼaloʼob maʼ maʼalobtakiʼ. Maʼalob xan ka a kan a wileʼ yaan baʼaloʼob maas maʼalob u beetik u maasil ke teech. Maʼ unaj a tuklik wa igual tuláakal máakiʼ.

Tu lugar a tuukul kʼaas tiʼ wa máaxeʼ, tukle:

• ¿Jach wa kʼaas le baʼax ku beetkoʼ wa chéen teen maʼ suuk in beetik beyoʼ?

• Le máakaʼ, ¿yaan wa baʼax maʼ maʼalob ku yilik xan in beetkiʼ?

• ¿Yaan wa baʼax maas maʼalob u beetik ke teen?

Wa ka núukik tu jaajil a wóoleʼ, jeʼel u xuʼulul a pʼektik u maasileʼ yéetel jeʼel tak a kaanbal tiʼ le baʼaxoʼob ku beetkoʼoboʼ.