LE PAAXOʼ jach importante kaʼach tu yúuchben kaajil Israel. Le Bibliaoʼ jach ku chʼaʼchiʼitik máakoʼob ku paxkoʼob junpʼéel u nuʼukulil paax wa ku kʼaayoʼob. Yaʼab tiʼ le libroʼob yaan teʼ Bibliaoʼ kʼaayoʼob. Por ejemploeʼ u libroil Salmos, El Cantar de los Cantares bey xan Lamentaciones. Junpʼéel libro ku tsolik bix u kuxtal le máakoʼob úuchjeakiloʼ ku yaʼalikeʼ le Bibliaoʼ jach claro u yeʼesikeʼ utiaʼal le israelitaʼob kaʼachoʼ jach importante le paax tiʼ tuláakal le baʼax ku beetkoʼob sáamsamaloʼ (Music in Biblical Life).

Le paax ku yuʼubikoʼob sáamsamaloʼ. Le israelitaʼoboʼ ku meyajtiʼob kaʼach le paax utiaʼal u yaʼalikoʼob bix u yuʼubikubaʼoboʼ (Isa. 30:29). Le koʼoleloʼoboʼ yéetel kiʼimak óolal ku kʼaayoʼob, ku yóokʼotoʼob yéetel ku paxkoʼob panderetaʼob le kéen coronartaʼak juntúul rey, le kéen u beetoʼob kʼiinbesajoʼob bey xan le kéen u ganartoʼob u enemigoʼob (Jue. 11:34; 1 Sam. 18:​6, 7; 1 Rey. 1:​39, 40). Le kéen kíimik xan juntúul máax u yaabiltmoʼobeʼ ku kʼaayoʼob utiaʼal u yeʼeskoʼob jach tristeʼob (2 Cró. 35:25). Junpʼéel libroeʼ ku yaʼalikeʼ «le hebreoʼoboʼ jach u yaabiltmoʼob kaʼach le paaxoʼ» (Cyclopedia, de McClintock y Strong).

Le reyoʼob kaʼachoʼ jach uts tu tʼaan u yuʼubikoʼob paax. Por ejemploeʼ rey Saúleʼ tu yéeyaj David tumen jach jatsʼuts u paxik le arpaoʼ (1 Sam. 16:​18, 23). Le ka tu beetuba reyil Davideʼ tu inventartaj u nuʼukuliloʼob paax, tu tsʼíibtaj jatsʼuts kʼaayoʼob yéetel tu muchʼaj máakoʼob utiaʼal u beetik junpʼéel orquesta utiaʼal ka paaxnak tu templo Jéeoba (2 Cró. 7:6; Amós 6:5). Ka máan kʼiineʼ rey Salomón xaneʼ tu tsʼáaj xiiboʼob yéetel koʼoleloʼob utiaʼal ka kʼaaynakoʼob teʼ palaciooʼ (Ecl. 2:8).

Le paaxoʼ ku meyaj kaʼach utiaʼal u adorartaʼal Jéeoba. Tu temploil Jerusaléneʼ yaan kaʼach 4,000 máakoʼob jach u yojloʼob paax, letiʼobeʼ ku paxkoʼob kaʼach címbaloʼob, u nuʼukuliloʼob paax yaan u cuerdailoʼob, arpaʼob bey xan trompetaʼob (1 Cró. 23:5; 2 Cró. 5:12). Chéen baʼaleʼ maʼ chéen letiʼob ku adorarkoʼob kaʼach Jéeoba yéetel kʼaayoʼobiʼ. Tumen yaʼab tiʼ le israelitaʼob kaʼachoʼ le kéen xiʼikoʼob Jerusalén utiaʼal le kʼiinbesajoʼoboʼ táan u bin u kʼaayoʼob teʼ bejoʼ. Táan u bin u kʼaykoʼob le kʼaay ku kʼaabaʼtik «Le kʼaay ku beetik le máaxoʼob táan u viajaroʼoboʼ» (Sal. 120-134). Tsʼoʼoleʼ jujunpʼéel tsʼíiboʼob judíoʼobeʼ ku yaʼalikoʼobeʼ le israelitaʼoboʼ le táan u cenail le Pascuaoʼ ku kʼaykoʼob le kʼaay Halleloʼ. a

Le paaxoʼ láayliʼ jach importante utiaʼal le máaxoʼob meyajtik Dios teʼ kʼiinoʼobaʼ (Sant. 5:13). K-kʼaay utiaʼal k-alabartik Jéeoba (Efe. 5:19). Le paaxoʼ ku tsʼáaiktoʼon u páajtalil k-múul adorartik Jéeoba yéetel ku tsʼáaiktoʼon xan u muukʼil utiaʼal k-aguantartik le problemasoʼoboʼ (Hech. 16:25; Col. 3:16). Tsʼoʼoleʼ ku yáantkoʼon xan k-eʼes yaan k-fe tiʼ Jéeoba yéetel jach k-yaabiltmaj.