1, 2. 1) ¿Baʼax ku yaʼalik le máakoʼob yoʼolal le páajtalil tsʼaʼantoʼon utiaʼal k-chʼaʼtuklik baʼax unaj k-beetkoʼ? 2) ¿Baʼax ku yaʼalik le Biblia yoʼolal le páajtalil tsʼaʼantoʼonoʼ, yéetel baʼax kʼáatchiʼiloʼob unaj k-núukik?

JUNTÚUL koʼoleleʼ le táan u chʼaʼtuklik baʼax ken u beeteʼ, tu yaʼalaj tiʼ u amigo: «Maas séeb ka a waʼalten baʼax unaj in beetik, ke ka júupken in tukult teen». Jeʼex k-ilkoʼ letiʼeʼ u kʼáat ka aʼalaʼaktiʼ baʼax unaj u beetik, maʼ meyajnajtiʼ le páajtalil u tsʼaamaj Dios utiaʼal u chʼaʼtuklik tu juunal baʼax unaj u beetkoʼ. Kux túun toʼon, ¿uts t-tʼaan wa k-chʼaʼtuklik baʼax ken k-beete, wa k-chaʼik u beetik yaanal máak t-óolal? ¿Bix k-ilik le páajtalil tsʼaʼantoʼon utiaʼal k-chʼaʼtuklik wa baʼaxoʼ?

² Le máakoʼoboʼ jejeláas baʼax ku yaʼalikoʼob yoʼolal le páajtalil tsʼaʼan tiʼ máak utiaʼal u chʼaʼtuklik baʼax ken u beetoʼ. Yanoʼobeʼ ku yaʼalikoʼobeʼ maʼ u tsʼaamaj Dios tiʼ máak u páajtalil u chʼaʼtuklik baʼax unaj u beetkiʼ, tumen letiʼeʼ u yaʼalmiliʼ tuláakal baʼax ken k-beeteʼ. Uláakʼoʼobeʼ ku yaʼalikoʼobeʼ chéen jeʼel u meyajtoʼon le páajtalil tsʼaʼantoʼon wa ka páajchajak k-yéeyik t-juunal tuláakal baʼaloʼ. Chéen baʼaleʼ le Bibliaoʼ ku yaʼalikeʼ beetaʼaboʼon yéetel u páajtalil k-chʼaʼtuklik maʼalob baʼaxoʼob unaj k-beetik (xok Josué 24:15). Le Bibliaoʼ ku núukik le kʼáatchiʼobaʼ: ¿Yaan wa baʼaxoʼob maʼ chéen toʼon unaj k-chʼaʼtuklikiʼ? ¿Bix unaj u meyajtoʼon le páajtalil tsʼaʼantoʼon utiaʼal k-yéeyik baʼax unaj k-beetkoʼ? ¿Bix jeʼel k-eʼesik yaabilaj tiʼ Jéeoba ken k-chʼaʼtukult k-beetik  wa baʼaxeʼ? ¿Bix jeʼel k-eʼesik maʼatech k-criticartik baʼax ku chʼaʼtuklik u maasileʼ?

3. ¿Bix u meyaj tiʼ Jéeoba le páajtalil yaantiʼoʼ?

³ Chéen Jéeoba jeʼel u páajtal u beetik jeʼel baʼalak u kʼáateʼ. Chéen baʼaleʼ toʼoneʼ unaj k-kaanbal tiʼ bix u meyaj tiʼ Jéeoba le páajtalil yaantiʼoʼ. Por ejemploeʼ tiʼ Jéeobaeʼ meyajnaj le páajtalil yaantiʼ ka tu yéeyaj u kaajil Israel utiaʼal u beetkuba «chéen u tiaʼal[oʼ]» (Deu. 7:6-8). Letiʼeʼ tu yéeyoʼob tumen u kʼáat ka béeychajak le baʼax u yaʼalmaj tiʼ Abrahán, u amigooʼ (Gén. 22:15-18). Jéeobaeʼ cada ken u yéey baʼax ken u beeteʼ, ku yeʼesik yaabilaj bey xan u justicia. Lelaʼ bey tu beetil le ka lúub tiʼ baʼax kʼaas le israelitaʼoboʼ. Le ka tu yeʼesoʼob jach tsʼoʼok u arrepentiroʼobeʼ, Jéeobaeʼ tu yeʼesaj yaabilaj tiʼob yéetel chʼaʼ óotsilil. Letiʼeʼ tu yaʼalajtiʼob: «Bíin in kaʼaj in tsʼakoʼob tiʼ u j-maʼ uʼuyajtʼaaniloʼoboʼ; bíin in kaʼaj in yaabiltoʼob kex maʼ tu náajmatikoʼob» (Ose. 14:4). Jéeobaeʼ ku tsʼáaiktoʼon junpʼéel maʼalob ejemplo tumen kex tiʼ letiʼ yaan u páajtalil u beetik jeʼel baʼalakeʼ mantatsʼ ku yilik u yáantik u maasil.

4, 5. 1) ¿Tiʼ máax yáax tsʼaʼab tumen Dios u páajtalil u yéeyik baʼax u kʼáat u beete, yéetel bix tsʼoʼok u meyajtiʼ? 2) ¿Tiʼ baʼax kʼáatchiʼil maʼalob ka tuukulnakoʼon?

⁴ Jéeobaeʼ tu chʼaʼtuklaj u beetik wíinik bey xan le angeloʼob yéetel u páajtalil u yéeyikoʼob baʼax u kʼáat u beetoʼoboʼ. Le máax tu yáax beetoʼ, Jesús, yéetel jeʼex u yaʼalik le Bibliaoʼ letiʼeʼ «u yoochel Dios» (Col. 1:15). ¿Bix tsʼoʼok u meyaj tiʼ Jesús le páajtalil tsʼaʼantiʼ tumen Jéeobaoʼ? Táanil tiʼ u taal way Luʼumeʼ, Jesuseʼ tu chʼaʼtuklaj u chúukpajal u yóol tiʼ Dios yéetel maʼ tu tsʼáajuba tu tséel Satanás le ka bin tu contra Jéeobaoʼ. Ka taal Jesús way Luʼumeʼ tu yéeyaj xan maʼ u beetik le baʼaloʼob kʼaastak ku yaʼalaʼal kaʼach tiʼ tumen Satanasoʼ (Mat. 4:10). Le áakʼab táanil tiʼ u kíimiloʼ, Jesuseʼ tu yaʼalaj tiʼ u Taata yaan u beetik tuláakal le baʼax kun aʼalbiltiʼoʼ. Letiʼeʼ tu yaʼalaj: «In Yuum, wa a kʼáateʼ luʼsten le copaaʼ. Baʼaleʼ maʼ u beetaʼal baʼax in kʼáat, baʼaxeʼ beetaʼak baʼax a kʼáat» (Luc. 22:42). Jeʼex tu beetil Jesusoʼ, ¿jeʼel wa xan u meyajtoʼon le páajtalil u tsʼaamajtoʼon Jéeoba utiaʼal k-alabartik yéetel k-beetik baʼax uts tu tʼaanoʼ?

⁵ Jéeobaeʼ tu beetoʼon xan jeʼex letiʼeʼ, le oʼolaleʼ jeʼel u páajtal k-beetik xan jeʼex Jesuseʼ (Gén. 1:26). Chéen baʼaleʼ yaan baʼaxoʼob maʼ toʼon k-yéeyik bix kun beetbiliʼ, baʼaxeʼ Jéeoba aʼalik. Le Bibliaoʼ ku yeʼesikeʼ Dioseʼ tsʼoʼok u yaʼalik bix kun beetbil jujunpʼéel baʼaloʼob yéetel toʼoneʼ unaj k-beetik wa k-kʼáat ka xiʼiktoʼon utsil. Por ejemploeʼ le Bibliaoʼ ku yaʼalikeʼ le atantsiloʼoboʼ unaj u tsʼáaikubaʼob yáanal u nuʼuktaj u yíichamoʼob, le paalaloʼoboʼ unaj u yuʼubikoʼob u tʼaan u taataʼob (Efe. 5:22; 6:1). Le oʼolaleʼ tuukulnakoʼon tiʼ lelaʼ, ¿kiʼimak wa k-óol yéetel le bukaʼaj páajtalil u tsʼaamajtoʼon Jéeobaoʼ? Le bix k-núukik le kʼáatchiʼaʼ yaan u yeʼesik wa k-kʼáat kuxtal teʼ túumben Luʼumoʼ.

6. Tsʼáa junpʼéel ejemplo eʼesik baʼaxten ku kanáantkoʼon Jéeoba ken u yaʼaltoʼon bix unaj k-beetik jujunpʼéel baʼaloʼob.

⁶ Wa yaan tiʼ baʼaxoʼob Jéeoba aʼalik bix unaj u beetaʼaloʼobeʼ, ¿jach wa túun tu jaajil pʼataʼan t-kʼab k-yéeyik jeʼel baʼaxak k-kʼáat beeteʼ? Jeʼel u páajtal u yaʼalaʼal de ke beyoʼ. ¿Baʼaxten k-aʼalik? Tumen le baʼaxoʼob ku yaʼaliktoʼon Jéeoba ka k-beetoʼ ku kanáantkoʼon. Koʼox ketik beyaʼ: Máans ta tuukuleʼ táan a viajar tiʼ junpʼéel náanach kaaj pero teʼ carreteraoʼ maʼ tsʼaʼan mix junpʼéel letrero wa mix baʼal ka u yaʼal bix unaj u manejar máakiʼ. Le máakoʼoboʼ jeʼel u binoʼob teʼ carretera jeʼex u yóotkoʼobeʼ yéetel le bukaʼaj chichil u kʼáatoʼobeʼ. Wa ka úuchuk lelaʼ, ¿máasaʼ jeʼel k-sajaktal viajareʼ? Lelaʼ ku yeʼesikeʼ le u yaʼalaʼaltoʼon bix unaj k-beetik jujunpʼéel baʼaloʼobeʼ jeʼel u kanáantkoʼoneʼ. Koʼox ilik jujunpʼéel ejemploʼob yaan teʼ Biblia eʼesik lelaʼ.

7. 1) ¿Baʼaxten jelaʼan le bix úuchik u beetaʼal Adán tiʼ le baʼalcheʼoboʼ? 2) ¿Bix úuchik u meyaj tiʼ Adán le jatsʼuts páajtalil tsʼaʼabtiʼoʼ?

 ⁷ Jéeobaeʼ le ka tu beetaj Adán, le yáax máakoʼ, tu tsʼáajtiʼ u páajtalil u yéeyik baʼax ken u beete, jeʼel bix tu beetil yéetel le angeloʼoboʼ. Chéen baʼaleʼ Dioseʼ maʼ bey úuchik u beetik yéetel le baʼalcheʼoboʼ. ¿Bix úuchik u meyaj maʼalob tiʼ Adán le páajtalil tsʼaʼabtiʼoʼ? Letiʼeʼ tu kʼamaj yéetel kiʼimak óolal le meyaj tsʼaʼabtiʼoʼ. Lelaʼ letiʼe u tsʼáaik u kʼaabaʼ tuláakal le baʼalcheʼoboʼ. Dios túuneʼ «tu bisaj tiʼ le wíinik utiaʼal u tsʼáa u kʼaabaʼob[oʼ]». Ka tsʼoʼok u jach ilik Adán bix cada baʼalcheʼeʼ tu tsʼáaj le kʼaabaʼ maas maʼalob tiʼ cada juntúuloʼ. Jéeobaeʼ maʼ tu kʼexaj mix junpʼéel tiʼ le kʼaabaʼob tu yéeyaj Adanoʼ, «le kʼaabaʼ tu tsʼáajtiʼoboʼ, le pʼáattiʼob» (Gén. 2:19-20).

8. ¿Bix tu yeʼesil Adán maʼ maʼalob bix úuchik u meyajtiʼ le páajtalil tsʼaʼabtiʼoʼ, yéetel bix biniktiʼ?

⁸ Jéeobaeʼ tu kʼubéentaj tiʼ Adán u sutik Paraísoil le Luʼumoʼ. Letiʼeʼ tu yaʼalajtiʼ: «Ka yaʼabchajak a paalaleʼex; chupeʼex le yóokʼol kaaboʼ, méekʼtáanteʼex xan, yanak a páajtalileʼex yóokʼol le kayoʼoboʼ, le chʼíichʼoʼoboʼ bey xan yóokʼol tuláakal le baʼalcheʼob ku jíiltikubaʼoboʼ» (Gén. 1:28). Chéen baʼaleʼ Adaneʼ tu chʼaʼtuklaj u jaantik u yich le cheʼ u yaʼalmaj Dios maʼ u jaantikoʼ. Úuchik u beetkeʼ tu yeʼesaj píitmáan tiʼ le páajtalil tsʼaʼantiʼoʼ. Tu yoʼolal le baʼax tu beetaʼ, le máakoʼoboʼ desde úuch joʼopʼok u muʼyajoʼob (Rom. 5:12). Wa k-tuukul tiʼ le bix binik tiʼ Adán yoʼolal le baʼax tu beetoʼ yaan u yáantkoʼon utiaʼal maʼ k-píitmáan tiʼ le páajtalil u tsʼaamajtoʼon Diosoʼ.

9. ¿Baʼax jatsʼuts páajtalil tsʼaʼab tiʼ le israelitaʼoboʼ, yéetel baʼax tu yaʼaloʼob?

⁹ Tumen u paalaloʼon Adán yéetel Evaeʼ tuláakloʼon j-kʼebanoʼon yéetel k-kíimil. Kex beyoʼ Jéeobaeʼ láayliʼ tu tsʼáajtoʼon u páajtalil k-yéeyik baʼax ken k-beeteʼ. Lelaʼ bey u yeʼesik le bix tu tratartil le israelitaʼoboʼ. Letiʼeʼ tu tsʼáajtiʼob u páajtalil u yéeyikoʼob wa u kʼáatoʼob kʼuchul u beetubaʼob u kaajal wa maʼ (Éxo. 19:3-6). Letiʼobeʼ tu yaʼaloʼobeʼ jeʼel u chaʼik u nuʼuktaʼaloʼob tumen Jéeobaeʼ yéetel jeʼel u beetkoʼob tuláakal le baʼax kun aʼalbiltiʼoboʼ, tu yaʼaloʼob: «Bíin k-beet tuláakal le baʼax tsʼoʼok u yaʼalik Yuumtsiloʼ» (Éxo. 19:8). Chéen baʼaleʼ ka máan kʼiineʼ letiʼobeʼ maʼ seguernaj u beetkoʼobiʼ. Le baʼax tu beetoʼoboʼ ku kaʼansiktoʼoneʼ maʼ unaj k-mixbaʼalkúuntik le páajtalil u tsʼaamajtoʼon Diosoʼ, maʼ unaj k-náachtal tiʼ letiʼiʼ yéetel mantatsʼ unaj k-beetik baʼax ku yaʼalik (1 Cor. 10:11).

10. ¿Baʼax ejemploʼob yaan teʼ capítulo 11 tiʼ Hebreoʼob eʼesik jeʼel u meyajtoʼon le páajtalil tsʼaʼantoʼon utiaʼal k-alabartik Jéeobaoʼ? (Ilawil le dibujo yaan tu káajbal le xookaʼ.)

¹⁰ Le capítulo 11 tiʼ u cartail Hebreoʼoboʼ ku tʼaan tiʼ 16 u túulal máakoʼob tu chʼaʼtuklaj u respetarkoʼob le bukaʼaj páajtalil tsʼaʼabtiʼob tumen Jéeobaoʼ. Yoʼolal le baʼax tu beetoʼobaʼ tu kʼamoʼob yaʼab bendicionoʼob yéetel yaantiʼob xan junpʼéel jatsʼuts esperanza. Jeʼex Noeeʼ tu yeʼesaj jach nojoch u fe yéetel tu chʼaʼtuklaj u yuʼubik u tʼaan Jéeoba. Letiʼeʼ tu beetaj le arca utiaʼal u salvartaʼal u láakʼtsiloʼoboʼ bey xan le u maasil máakoʼob kun síijloʼoboʼ (Heb. 11:7). Abrahán yéetel Saraeʼ yéetel kiʼimak óolal tu yuʼuboʼob u tʼaan Dios yéetel binoʼob teʼ Luʼum Aʼalaʼan u Tsʼaʼabaltiʼoboʼ. Kex «jeʼel u páajtal kaʼach u suutoʼob» tu kaajil Ureʼ, letiʼobeʼ maas tu chʼikaj u paakatoʼob tiʼ le baʼaxoʼob u yaʼalmaj Dios u tsʼáaiktiʼoboʼ. Le Bibliaoʼ ku yaʼalikeʼ letiʼobeʼ tu yiloʼob «u tiaʼalintikoʼob junpʼéel kúuchil maas maʼalob» (Heb. 11:8, 9, 13, 15, 16). Moiseseʼ tu chʼaʼtuklaj u pʼatik tuláakal le ayikʼaliloʼob yaan kaʼach Egiptooʼ, yéetel «maas tu yóotaj ka maltratartaʼak paʼteʼ yéetel u kaajal Dios ke ka u kiʼimakkúunt u yóol junsúutuk yéetel le kʼebanoʼ» (Heb. 11:24-26). Toʼoneʼ unaj k-eʼesik le fe anchaj tiʼ le máaxoʼob meyajt Diosoʼ yéetel unaj k-beetik baʼax u kʼáat Dios, beyoʼ k-eʼesik nojoch baʼal k-ilik le páajtalil u tsʼaamajtoʼonoʼ.

11. 1) ¿Máakalmáak junpʼéel tiʼ le utsiloʼob ku taasik k-yéeyik baʼax ken k-beetoʼ? 2) ¿Tiʼ baʼax maas maʼalob ka meyajnaktoʼon le páajtalil tsʼaʼantoʼonoʼ?

¹¹ Maʼ xaaneʼ maas séeb ka aʼalaʼaktoʼon baʼax  unaj k-beetik ke ka k-chʼaʼtukulte. Chéen baʼaleʼ wa yaanal máax yéeyik baʼax ken k-beeteʼ, maʼ kun béeytal k-ilik le utsiloʼob ku taasik k-chʼaʼtuklik t-juunal baʼax unaj k-beetik. ¿Tiʼ baʼax táan k-tʼaan? Tiʼ le baʼax ku tsolik le Biblia teʼ Deuteronomio 30:19 yéetel 20 (xoke). Teʼ versículo 19, ku yaʼalikeʼ Dioseʼ tu tsʼáaj tiʼ le israelitaʼob u páajtalil u yéeyikoʼob baʼax u kʼáat u beetoʼoboʼ. Tsʼoʼoleʼ le versículo 20, ku yaʼalikeʼ yéetel le baʼax ken u chʼaʼtukloʼoboʼ jeʼel u páajtal kaʼach u yeʼeskoʼob tiʼ Jéeoba bukaʼaj u yaabiltmiloʼobeʼ. Tiʼ toʼon xaneʼ tsʼaʼantoʼon u páajtalil k-yéeyik wa k-kʼáat adorart Jéeoba. Wa k-chʼaʼtuklik k-beetik lelaʼ yaan u meyajtoʼon le páajtalil u tsʼaamajtoʼon utiaʼal k-alabartikoʼ yéetel utiaʼal k-eʼesik bukaʼaj k-yaabiltmil.

12. ¿Baʼax maʼ k-kʼáat beet yéetel le páajtalil u tsʼaamajtoʼon Diosoʼ?

¹² Koʼox aʼalikeʼ toʼoneʼ k-tsʼáaik junpʼéel nojoch siibal tiʼ juntúul k-amigo. ¿Bix jeʼel k-uʼuyikba wa ka u puleʼ? ¿Bix jeʼel k-uʼuyikba wa ka meyajnaktiʼ utiaʼal u beetik loob tiʼ u maasileʼ? ¿Máasaʼ jeʼel u yaatal k-óoleʼ? Jéeobaeʼ tu tsʼáajtoʼon u páajtalil k-yéeyik baʼax ken k-beete, chéen baʼaleʼ letiʼeʼ ku yaatal u yóol ken u yil yaan máaxoʼob ku chʼaʼtuklikoʼob u beetkoʼob baʼaloʼob kʼaastak wa ku meyajtiʼob le páajtalil utiaʼal u beetkoʼob loob tiʼ u maasiloʼ. Le Bibliaoʼ ku yaʼalikeʼ teʼ «tu tsʼook kʼiinoʼob[aʼ]» le máakoʼoboʼ maʼ ken u tsʼáaʼob u diosboʼotikil yoʼolal mix baʼal (2 Tim. 3:1, 2). Chéen baʼaleʼ toʼoneʼ maʼ k-kʼáat beet baʼax kʼaasiʼ mix k-eʼesik beyoʼon jeʼex u maasiloʼ. Le oʼolaleʼ, ¿bix jeʼel k-eʼesik k-tsʼáaik u graciasil tiʼ Dios yoʼolal le páajtalil u tsʼaamajtoʼonoʼ? ¿Bix jeʼel u meyajtoʼon le páajtalil utiaʼal k-beetik baʼax maʼaloboʼ?

13. ¿Bix jeʼel u meyajtoʼon maʼalob le páajtalil u tsʼaamajtoʼon Diosoʼ?

¹³ Tuláakloʼon jeʼel u páajtal k-yéeyik k-amigoʼobeʼ, bix ken k-vestirtba bey xan baʼax yéetel ken k-náays k-óol. Chéen baʼaleʼ unaj k-kanáantikba tumen maʼ xaaneʼ jeʼel k-tuklikeʼ como yaantoʼon u páajtalil k-yéeyik baʼax k-kʼáateʼ jeʼel u páajtal k-beetik tak baʼaxoʼob maʼ uts tu tʼaan Dioseʼ wa jeʼel k-beetik xan le baʼaxoʼob ku beetik u máakiloʼob le yóokʼol kaabaʼ (xok 1 Pedro 2:16). Tu lugar u meyajtoʼon le páajtalil tsʼaʼantoʼon tumen Dios utiaʼal k-beetik baʼaloʼob kʼaastakeʼ unaj k-ilik bey junpʼéel baʼal jeʼel u yáantkoʼon k-beet tuláakal baʼal «utiaʼal u nojbeʼenil Dios[eʼ]» (1 Cor. 10:31; Gal. 5:13).

14. Ken meyajnaktoʼon le páajtalil tsʼaʼantoʼonoʼ, ¿baʼaxten unaj k-confiar tiʼ Jéeoba?

¹⁴ Jéeobaeʼ ku yaʼalik: «Teen Yuumtsil a  [Dios]; teen kaʼanbesik tiʼ teech baʼax unaj a beetik utiaʼal a wutsil, teen eʼesik tiʼ teech, tuʼux bejil unaj a bin» (Isa. 48:17). Wa k-kʼubik óol tiʼ Jéeobaeʼ yaan u kiʼimaktal k-óol yéetel le bukaʼaj páajtalil u tsʼaamajtoʼon utiaʼal k-beetik jujunpʼéel baʼaloʼoboʼ yéetel yaan k-chʼaʼtuklik k-beetik baʼaloʼob maʼalobtak. Yéetel kabal óolal xaneʼ yaan k-tsʼáaik cuenta jaaj baʼax ku yaʼalik le Bibliaaʼ: «Yuumtsil, teneʼ in wojleʼ xiibeʼ maʼ u yuumil u kuxtaliʼ, minaʼan u páajtalil u yéeyik bix ku bin [u] xuʼulul» (Jer. 10:23). Adán bey xan le israelitaʼob tu beetoʼob baʼaloʼob kʼaastakoʼ maʼ tu respetartoʼob le bukaʼaj páajtalil tsʼaʼabtiʼob tumen Jéeobaoʼ, maas tu chaʼaj u nuʼuktaʼaloʼob tumen le baʼax ku tuklikoʼoboʼ. Toʼoneʼ maʼ unaj k-beetik jeʼex letiʼobeʼ. Baʼaxeʼ unaj k-kʼubik k-óol tiʼ Jéeoba yéetel tuláakal k-puksiʼikʼal, maʼ tiʼ le baʼaxoʼob k-tuklik maas maʼaloboʼ (Pro. 3:5).

15. ¿Baʼax ku kaʼansiktoʼon Galaciailoʼob 6:5?

¹⁵ Toʼoneʼ unaj k-respetartik xan le baʼaxoʼob ku chʼaʼtuklik u beetik u maasiloʼ. ¿Baʼaxten? Tumen tiʼ tuláakloʼon u tsʼaamaj Jéeoba u páajtalil k-yéeyik baʼax ken k-beete. Yaan horaeʼ le baʼax k-chʼaʼtuklik k-beetkoʼ maʼ letiʼe baʼax ku yéeyik u beet uláakʼ sukuʼunoʼ. Lelaʼ maases bey u yilaʼal tiʼ le modos k-eʼesikoʼ bey xan tiʼ le bix k-meyajtik Diosoʼ. Toʼoneʼ mantatsʼ unaj k-kʼaʼajsik le baʼax ku yaʼalik Galaciailoʼob 6:5 (xoke). Le tekstoaʼ ku kaʼansiktoʼoneʼ cada juntúul tiʼ toʼoneʼ yaan u bisik u kuch wa yaan u kʼubik cuenta yoʼolal baʼax ku beetik. Wa k-naʼatik lelaʼ, yaan k-respetartik le páajtalil tsʼaʼan tiʼ cada juntúul utiaʼal u yéeyik baʼax ken u beetoʼ.

16, 17. 1) ¿Baʼax ku yúuchul kaʼach ichil le corintoiloʼoboʼ? 2) ¿Bix tu yáantil Pablo le sukuʼunoʼobaʼ, yéetel baʼax k-kanik tiʼ le baʼax úuchaʼ?

¹⁶ Koʼox ilik junpʼéel baʼax eʼesik baʼaxten unaj k-respetartik le baʼaxoʼob ku chʼaʼtuklik u beetik uláakʼ sukuʼunoʼoboʼ. Le cristianoʼob yanoʼob Corintooʼ maʼ tu tsʼáaikubaʼob kaʼach de acuerdo tu yoʼolal wa jeʼel u páajtal u jaantkoʼob le bakʼ kʼubaʼan tiʼ beetbil diosoʼob ku koʼonol teʼ mercadooʼ. Jujuntúuloʼobeʼ ku jaantkoʼob le bakʼaʼ tumen u concienciaʼobeʼ ku yeʼesiktiʼobeʼ le beetbil diosoʼoboʼ mix baʼal u biilaloʼob. Chéen baʼaleʼ le máaxoʼob suuk kaʼach u adorartikoʼob beetbil diosoʼob antes tiʼ u beetkubaʼob cristianoʼoboʼ ku tuklikoʼob kaʼacheʼ wa ka u jaantoʼob le bakʼoʼ bey ka u adorartoʼob le diosoʼobaʼ (1 Cor. 8:4, 7). Le baʼax ku yúuchul kaʼachaʼ jeʼel tak u jatsik le sukuʼunoʼob teʼ múuchʼuliloʼ. ¿Baʼax tu beetaj Pablo utiaʼal u yáantik le sukuʼunoʼobaʼ?

¹⁷ Yáaxeʼ Pabloeʼ tu kʼaʼajsaj tiʼ le cristianoʼob yanoʼob Corintooʼ de ke le jaanloʼ maʼatech u meyaj utiaʼal u maas biskuba máak yéetel Dios (1 Cor. 8:8). Tsʼoʼoleʼ tu yaʼalajtiʼobeʼ, kex yaantiʼob u páajtalil u yéeyikoʼob baʼax ken u beetoʼobeʼ unaj u kanáantkoʼob maʼ u beetkoʼob u tʼóochpajal le máaxoʼob maʼ muʼukʼaʼan yaniloʼoboʼ (1 Cor. 8:9). Tiʼ le máaxoʼob maʼ muʼukʼaʼan yaniloʼoboʼ tu yaʼalaj xaneʼ maʼ unaj u juzgartikoʼob le sukuʼunoʼob ku chʼaʼtuklik u jaantkoʼob le bakʼoʼ (1 Cor. 10:25, 29, 30). Jeʼex k-ilkoʼ lelaʼ junpʼéel baʼal yaan u yil kaʼach yéetel u meyajtaʼal Jéeoba, le oʼolaleʼ cada juntúul cristiano unaj kaʼach u chʼaʼtuklik baʼax ken u beete. Teʼ kʼiinoʼobaʼ, ¿máasaʼ unaj xan k-respetartik le páajtalil tsʼaʼan tiʼ le sukuʼunoʼob utiaʼal u yéeyikoʼob baʼax u kʼáat u beetoʼob tak tiʼ baʼaxoʼob mejentakoʼoboʼ? (1 Cor. 10:32, 33).

18. ¿Bix jeʼel k-eʼesik nojoch baʼal k-ilik le páajtalil tsʼaʼantoʼonoʼ?

¹⁸ Jéeobaeʼ u tsʼaamajtoʼon u páajtalil k-yéeyik baʼax ken k-beete, leloʼ junpʼéel jach jatsʼuts siibal tumen jeʼel u páajtal u yaʼalaʼaleʼ jáalkʼaboʼon utiaʼal k-chʼaʼtuklik baʼax maʼalob (2 Cor. 3:17). Toʼoneʼ k-eʼesik nojoch baʼal k-ilik le siibalaʼ tumen ku chaʼik k-eʼesik bukaʼaj k-yaabiltmil Jéeoba. Le oʼolaleʼ koʼox chʼaʼtuklik k-beetik baʼaxoʼob utiaʼal k-alabartik Jéeoba yéetel koʼox respetartik le baʼax ku chʼaʼtuklik u maasiloʼ.