Yaan siibaloʼobeʼ jach kʼaʼanaʼan k-ilkoʼob tumen le máax siimiltoʼonoʼ yaan autoridad tiʼ wa jach ku lúubultoʼon utsil. Yaan hora xaneʼ kex maʼ koʼoj u tojoloʼobeʼ nojbaʼal k-ilik tumen juntúul k-láakʼtsil wa juntúul k-amigo siimiltoʼon. Jeʼex t-ilil teʼ xook máanoʼ, bey úuchik tiʼ Jordan yéetel le baʼax siʼibtiʼ tumen Russelloʼ. Chéen baʼaleʼ lelaʼ, ¿baʼax yaan yil yéetel le boʼol tu tsʼáaj Dios t-oʼolaloʼ?

Yáaxeʼ le Bibliaoʼ ku yaʼalikeʼ «Dioseʼ tu túuxtaj u juntúuliliʼ Paal teʼ yóokʼol kaabaʼ, utiaʼal beyoʼ ka yanaktoʼon kuxtal tu yoʼolal letiʼ» (1 Juan 4:9). Le oʼolal nojbaʼal k-ilik le siibalaʼ, tumen Dios tsʼáatoʼon, tsʼoʼoleʼ minaʼan uláakʼ máax maas yaan u páajtalil ke Dios. Juntúul salmistaeʼ tu yaʼaleʼ Jéeoba * Dioseʼ chéen letiʼ «le j-Sen Kaʼanal tu yóokʼol le luʼumaʼ» (Salmo 83:18). Minaʼan uláakʼ máax maas yaan u páajtalil ka u tsʼáatoʼon junpʼéel siibal jeʼex lelaʼ.

U kaʼapʼéeleʼ, Dioseʼ «k-taata» (Isaías 63:16). ¿Baʼaxten k-aʼalik leloʼ? Tumen letiʼ tsʼáatoʼon kuxtal. Tsʼoʼoleʼ ku kanáantkoʼon jeʼex juntúul maʼalob taatatsil ku kanáantik u paalaleʼ. Le ka tʼaanaj tiʼ junjaats u kaajaleʼ, Dioseʼ tu yaʼalaj: «U kaajil Efraíneʼ in tiaʼaleʼ juntúul in yaabilaj paal; [...] in puksiʼikʼaleʼ ku péek yóol, teneʼ kin sen chʼaʼik óotsil tiʼ» (Jeremías 31:20). Dioseʼ láayliʼ letiʼe baʼax ku yuʼubik yoʼolal le máaxoʼob meyajtik bejlaʼoʼ. Letiʼeʼ juntúul Dios yaan tuláakal páajtalil tiʼ yéetel letiʼ beetmil tuláakal baʼal, tsʼoʼoleʼ k-Taata yéetel k-Amigo. Le beetkeʼ jeʼel baʼaxak siibal ka u tsʼáatoʼoneʼ jach koʼoj u tojol.

Yaan siibaloʼobeʼ jach kʼaʼanaʼan k-ilkoʼob tumen le máax tsʼáatoʼonoʼ tu síiajtoʼon yoʼolal yaabilaj maʼ tumen wa obligartaʼabiʼ. Máax utseʼ ken u síi wa baʼaxeʼ maʼ tu páaʼtik ka siʼibik xan wa baʼax tiʼ.

Yoʼolal u yaabilajeʼ Dioseʼ tu tsʼáaj u Hijo t-oʼolal. Le Bibliaoʼ ku yaʼalik: «Tu yoʼolal lelaʼ eʼesaʼabtoʼon u yaabilaj Dios, tumen Dioseʼ tu túuxtaj u juntúuliliʼ Paal teʼ yóokʼol kaabaʼ». ¿Baʼaxten tu tsʼáaj le siibalaʼ? Utiaʼal «ka yanaktoʼon kuxtal tu yoʼolal letiʼ» (1 Juan 4:9). Dioseʼ minaʼan baʼax oʼolal u tsʼáaik kaʼach le siibalaʼ. «Le boʼol tu beetaj Cristo Jesusoʼ» junpʼéel bix tu yeʼesil Dios «u nojoch utsil» (Romailoʼob 3:24).

¿Baʼaxten le siibal tu tsʼáajtoʼon Diosoʼ ku yeʼesik «u nojoch utsil»? Le Bibliaoʼ ku yaʼalik: «Dioseʼ tu yeʼesajtoʼon u yaabilaj, tumen kex j-kʼeban máakoʼon kaʼacheʼ, Cristoeʼ kíim t-oʼolal» (Romailoʼob 5:8). Le yaabilajoʼ letiʼe baʼax péeks Dios u yáant le kʼeban wíinikoʼob minaʼan mix máak áantkoʼob kaʼachoʼ. Le siibal tu tsʼáajoʼ maʼ k-náajaltmiʼ yéetel mix bikʼin kun páajtal k-boʼotiktiʼ. Mix máak uláakʼ tsʼoʼok u yeʼesik u yaabilaj yéetel junpʼéel siibal jach jatsʼuts jeʼex le tu tsʼáajtoʼon Diosoʼ.

Yaan siibaloʼobeʼ jach koʼoj u tojoloʼob tumen le máax tsʼáaoʼ yaʼab baʼaxoʼob anchaj u beetik utiaʼal u síik. Wa juntúul máak jach uts tu tʼaan wa baʼax yaantiʼ chéen baʼaleʼ ku síiktoʼoneʼ, maas k-ilik k-kanáantik le baʼax tu síiajtoʼonoʼ.

Dioseʼ «tu tsʼáaj u juntúuliliʼ Paal» (Juan 3:16). Tiʼ tuláakal u paalaleʼ Dioseʼ tu tsʼáaj le máax maas u yaabiltmoʼ. Ichil le u millonesil años táan u beetik Dios tuláakal baʼaloʼ, Jesuseʼ múul meyajnaj tu yéetel. Letiʼeʼ kʼuch u beetuba «u sayabil u kiʼimak óolal» Jéeoba (Proverbios 8:30). Jesuseʼ letiʼe ‹Paal jach yaabiltaʼanoʼ› yéetel «u yoochel le Dios maʼ tu páajtal u yilaʼaloʼ» (Colosasiloʼob 1:13-15). Minaʼan uláakʼ máaxoʼob tsʼoʼok u jach biskubaʼob maʼalob jeʼex letiʼobeʼ.

Kex bukaʼaj u yaabiltmil u Hijoeʼ, «Dioseʼ maʼ tu yaʼalaj wa maʼ tu tsʼáaiktoʼon[iʼ]» (Romailoʼob 8:32). Tiʼ tuláakal le baʼaxoʼob yaantiʼoʼ, Jéeobaeʼ tu tsʼáajtoʼon u maas maʼalobil. Minaʼan uláakʼ siibal tsʼoʼok u maas tojoltiktiʼ.

Yaan siibaloʼobeʼ jach kʼaʼanaʼantak tumen jach kʼaʼabéetoʼob teʼ súutukoʼ. Koʼox aʼalikeʼ, jach kʼojaʼanech yéetel kʼaʼabéettech junpʼéel tsʼaak jeʼel u salvartikecheʼ, baʼaleʼ jach koʼoj yéetel maʼ tu páajtal a boʼotik. Teʼ súutukoʼ juntúul máakeʼ ku yaʼaliktech jeʼel u boʼotikeʼ. ¿Máasaʼ jach jeʼel a tsʼáaik u diosboʼotikil tiʼ yoʼolal le baʼax tu beetoʼ?

«Jeʼex tu yoʼolal Adán tuláakal máak táan u kíimileʼ, tu yoʼolal Cristo xaneʼ tiʼ tuláakal máak kun tsʼaabil kuxtal.» (1 Corintoiloʼob 15:22.) Tumen tuláakloʼon k-taal tiʼ Adaneʼ k-kíimil. Toʼoneʼ maʼ tu páajtal k-púutsʼul tiʼ le kʼojaʼaniloʼoboʼ mix tiʼ le kíimiloʼ. Chéen t-juunaleʼ maʼ tu páajtal k-kaʼa bisikba yéetel Dios mix k-lúubul utsil tu táan. Tsʼoʼoleʼ maʼ tu páajtal k-salvartikba mix k-salvartik uláakʼ máak. Le Bibliaoʼ ku yaʼalik: «Mix máak jeʼel u páajtal u [salvartikuba] tu juunal u yóoleʼ mix tu páajtal u boʼotik tiʼ Yuum [Dios] utiaʼal ka toʼokok u kuxtal [...] juntúul máak» (Salmo 49:7, 8). Kʼaʼabéet k-séeb áantaʼal tumen wa máax, tumen chéen t-juunaleʼ maʼ tu páajtal k-tsʼáaik le boʼol kʼaʼabéetoʼ.

Jéeobaeʼ yoʼolal u yaabilajeʼ tu boʼotaj yéetel kiʼimak óolal le «tsʼaak» kʼaʼabéettoʼonoʼ, beyoʼ «tu yoʼolal Cristo xaneʼ tiʼ tuláakal máak kun tsʼaabil kuxtal». ¿Bix u tsʼáaiktoʼon kuxtal le boʼoloʼ? Le Bibliaoʼ ku yaʼalik: «U kʼiʼikʼel Jesús, le u Paaloʼ, táan u pʼoʼik tuláakal k-kʼeban». K-tsʼáaik fe tiʼ u kʼiʼikʼel Jesús tu wekoʼ ku beetik u perdonartaʼal k-kʼeban yéetel ku beetik u yantaltoʼon kuxtal minaʼan u xuul (1 Juan 1:7; 5:13). ¿Baʼax utsil  ken u taas le boʼol tiʼ le máaxoʼob k-yaabiltmaj tsʼoʼok u kíimloʼoboʼ? Le Bibliaoʼ ku yaʼalik: «Jeʼex le kíimil kʼuch antal tu yoʼolal juntúul máakoʼ, le u kaʼa kuxkíintaʼal le kimenoʼoboʼ ku béeytal xan tu yoʼolal juntúul máak [Jesús]» (1 Corintoiloʼob 15:21). *

U kuxtal Jesús tu kʼuboʼ letiʼe siibal maas nojoch tsʼoʼok k-kʼamkoʼ tumen letiʼe máax maas yaan u páajtalil tsʼáatoʼonoʼ, yéetel tu beetaj tumen jach u yaabiltmoʼon. Mix máak u tsʼáatoʼon junpʼéel nojoch siibal jeʼex le tu tsʼáaj Jéeoba Diosoʼ. Minaʼan xan uláakʼ siibal jeʼel u béeytal u tokikoʼon tiʼ le kʼeban yéetel tiʼ le kíimiloʼ. Bey túunoʼ le boʼol wa le siibal tu tsʼáajtoʼon Diosoʼ maʼ tu páajtal u keʼetel yéetel mix baʼal.