¿Máasaʼ kéen a kʼaj óolt wa máaxeʼ yáax táanil ka kʼáatik bix u kʼaabaʼ? Wa ka a kʼáat tiʼ Dios bix u kʼaabaʼeʼ, ¿baʼax jeʼel u núukikeʼ?

«Teneʼ Jéeobaen, letiʼe in kʼaabaʼoʼ» (Isaías 42:8, TNM).

Dioseʼ u kʼáat ka kʼaj óoltaʼak. Letiʼ yéeymil u kʼaabaʼ. Jéeobaeʼ ku yaʼalik: «Lelaʼ letiʼ in kʼaabaʼ utiaʼal mantatsʼ yéetel tuláakal jaʼaboʼob minaʼan u xuul» (Éxodo 3:15). Tiʼ letiʼeʼ ku yaʼalaʼal xan «le Dios yaan tuláakal páajtalil tiʼoʼ», «Taata», «Kiʼichkelem Yuum», «Yuumtsil» wa «Dios». Chéen baʼaleʼ u kʼaabaʼeʼ maas yaʼab u téenel ku chíikpajal teʼ Bibliaoʼ. Maas yaʼab u téenel ku chíikpajal tak tiʼ u kʼaabaʼ Abrahán, Moisés, David yéetel Jesús. Jéeobaeʼ jach u kʼáat ka k-kʼaj óolt u kʼaabaʼ. Le Biblia Traducción del Nuevo Mundo de las Santas Escriturasoʼ ku yaʼalik: «Ka u yojéelt le máakoʼoboʼ, a kʼaabaʼeʼ Jéeoba, chéen teech le Maas Nojoch Dios yaan tu yóokʼol tuláakal le luʼumoʼ» (Salmo 83:18, TNM).

Jesuseʼ u kʼáat ka kʼaj óoltaʼak Jéeoba. Tu oracionil le padrenuestrooʼ, Jesuseʼ tu kaʼansaj tiʼ u disipuloʼob bix unaj u oraroʼob tiʼ Dios: «K-Taata yanech teʼ kaʼanoʼ, kiliʼichkúuntaʼak [wa santificartaʼak] a kʼaabaʼ» (Mateo 6:9). Tsʼoʼoleʼ tu yaʼalaj xan ich oración: «In Yuum, nojbeʼenkúunt a kʼaabaʼ» (Juan 12:28). Jesuseʼ mantatsʼ tʼaanaj tiʼ u kʼaabaʼ Dios, le oʼolal tu yaʼalajtiʼ: «Teneʼ tsʼoʼok in tsʼáaik u kʼaj óoltoʼob a kʼaabaʼ, yéetel yaan u seguer in tsʼáaik kʼaj óoltbil» (Juan 17:26).

 Unaj k-kʼaj óoltik u kʼaabaʼ Dios. Le máaxoʼob meyajt Dios úuchjeakiloʼ tu yiloʼob bix u yáantaʼaloʼob yéetel bix u kanáantaʼaloʼob tumen Jéeoba. Juntúuleʼ tu yaʼalaj tu yoʼolal: «U kʼaabaʼ Jéeobaeʼ bey junpʼéel nuxiʼ torreeʼ, tiʼ ku bin áalkabil le utsul máak utiaʼal ka kanáantaʼakoʼ» (Proverbios 18:10, TNM). Uláakʼeʼ tu yaʼalaj xan: «Tuláakal máax kun chʼaʼchiʼitik u kʼaabaʼ Jéeobaeʼ yaan u salvartaʼal» (Joel 2:32, TNM). Le Bibliaoʼ ku yaʼalikeʼ le máaxoʼob meyajtik Diosoʼ yaan u kʼaj óoltaʼaloʼob yoʼolal u kʼaabaʼ: «U chúukaʼan kaajoʼoboʼ ku yuʼubajtʼantikoʼob u [diosoʼob], baʼaleʼ toʼoneʼ mantatsʼ bíin k-uʼuyajtʼant Yuumtsil [k-Dios]» (Miqueas 4:5; Baʼaxoʼob [Hechos] 15:14).

Chéen Dios náajmatik le kʼaabaʼaʼ. Yaʼab máaxoʼob kaʼanchajaʼan u xookoʼobeʼ ku yaʼalikoʼobeʼ le kʼaabaʼ Jéeobaoʼ u kʼáat u yaʼal «Letiʼ Beetik u Yúuchul». Le baʼax tu yaʼalaj Jéeoba le ka tsikbalnaj yéetel Moisesoʼ ku yáantkoʼon k-naʼat baʼax u kʼáat u yaʼale. Letiʼeʼ tu yaʼalaj: «Teneʼ Yaan in Kʼuchul in Beetinba le Baʼax Ken in Yéey in Beetkinbaoʼ» (Éxodo 3:14, TNM). Jeʼex k-ilkoʼ u kʼaabaʼeʼ maʼ chéen u kʼáat u yaʼal letiʼ beetmil tuláakal baʼaliʼ. Baʼaxeʼ u kʼáat xan u yaʼal letiʼeʼ jeʼel u kʼuchul u beetuba le baʼax kʼaʼabéet, wa jeʼel u meyajtiʼ le baʼaxoʼob u beetmaj utiaʼal ka béeyak le baʼax u tukultmoʼ. Kex jejeláas bix kʼaj óolaʼanil Dioseʼ, chéen u kʼaabaʼ eʼesik jach bix letiʼ yéetel baʼaxoʼob jeʼel u kʼuchul u beeteʼ.

Dioseʼ u kʼáat ka náatsʼkoʼon tu yiknal. Le baʼax u kʼáat u yaʼal u kʼaabaʼ Diosoʼ ku yeʼesik le yaabilaj ku yuʼubik yoʼolal wíinikoʼ bey xan yoʼolal tuláakal le baʼaxoʼob u beetmoʼ. Letiʼeʼ u kʼáat ka k-kʼaj óolte, le oʼolal desde úuch u yaʼal bix u kʼaabaʼ. Letiʼeʼ jach tu jaajil yaan, tsʼoʼoleʼ u kʼáat ka náatsʼkoʼon tu yiknal (Salmo 73:28).

Meyajnaktoʼon u kʼaabaʼ utiaʼal k-eʼesik k-amigo. ¿Bix jeʼel a wuʼuyikaba wa juntúul a amigo maʼ tu tʼankech ta kʼaabaʼeʼ? ¿Máasaʼ jeʼel a tuklik maʼ jach u kʼáat u bisuba ta wéeteliʼ? Jéeoba xaneʼ tsʼoʼok u yaʼaliktoʼon bix u kʼaabaʼ yéetel u kʼáat ka meyajnaktoʼon, wa k-beetkeʼ k-eʼesik k-kʼáat náatsʼal tu yiknal. Le Bibliaoʼ ku yaʼalikeʼ Jéeobaeʼ u kʼaj óol máaxoʼob ku tuukuloʼob tiʼ u kʼaabaʼ (Malaquías 3:16).

Utiaʼal k-kʼaj óoltik Dioseʼ táanil kʼaʼabéet k-ojéeltik bix u kʼaabaʼ. Chéen baʼaleʼ yaan uláakʼ baʼaxoʼob unaj k-ojéeltik tu yoʼolal, jeʼex bix letiʼ yéetel bix u modos.