WA TSʼOʼOK u kíimil juntúul a láakʼtsileʼ a wojel bukaʼaj u yaatal u yóol máak, ka wuʼuyik mix baʼal ku páajtal a beetik, ka wuʼuyikaba ta juunal, maʼ xaaneʼ hasta ka wuʼuyik bey tiʼ teech anchaj u culpaileʼ. Jeʼel tak a tuklik minaʼan u biilal a kuxtaleʼ.

U jaajileʼ maʼ kʼaas u yoʼtik máak le máax kíimoʼ, lelaʼ maʼ u kʼáat u yaʼal wa séebaʼan u yokʼol máakiʼ. Baʼaxeʼ ku yeʼesikeʼ jach a yaabiltmaj le máax kíimoʼ. Koʼox ilik jujunpʼéel baʼaloʼob jeʼel u yáantkecheʼ.

Wa láayliʼ jach yaachajaʼan a wóol yoʼolal baʼax úuchtecheʼ, ilawil jujunpʼéel baʼaloʼob jeʼel u yáantkecheʼ:

MAʼ A SUʼLAKTAL OKʼOL

Cada máakeʼ jelaʼan bix u yuʼubikuba kéen kíimik máax u yaabiltmaj, yaneʼ ku xáantal yaachajaʼan u yóol yéetel yaneʼ maʼatech. Yaan máaxeʼ ku yuʼubikuba maʼalobil kéen tsʼoʼokok u yokʼol. Vanesa, le máax t-aʼalaj tu káajbal le xookaʼ, ku yaʼalik: «Jach tu yáanten úuchik in wokʼol teʼ súutukoʼob jach yaj baʼax ku kuup tin puksiʼikʼaloʼ». Sofía, juntúul máax séeb kíimik u kiikeʼ, ku yaʼalik: «Jach yaachaj tin wóol le baʼax úuchoʼ. Tin wuʼuyaj bey jeʼex ka chich maʼachken utiaʼal u pʼoʼobol le tuʼux yaj tenoʼ. Kex minaʼan u xuul u yajileʼ, jach kʼaʼabéet u beetaʼal utiaʼal u káajal u yutstal.

AʼAL TIʼ U MAASIL BIX A WUʼUYIKABA

Yaan kʼiineʼ hasta maʼ taak a tsikbal yéetel mix máakiʼ, chéen baʼaleʼ maʼ a chaʼik u kuup ta puksiʼikʼal  le baʼax ka muʼyajtikoʼ. Jared, diecisiete años yaantiʼ ka kíim u taataeʼ, ku yaʼalik: «In waʼalikeʼ yaan kʼiineʼ tin waʼalaj baʼaloʼob hasta maʼ tu jach naʼataʼal, kex beyoʼ jach tu yáanten úuchik in tsikbaltik bix in wuʼuyikinba». Janice, le máax t-aʼalaj teʼ yáax xookoʼ, ku yaʼalik: «Jach tu yáanten in tsikbaltik tiʼ u maasil bix in wuʼuyikinba. Tin wileʼ yaan uláakʼ máaxoʼob bey xan u yuʼubikubaʼob jeʼex tenoʼ».

CHAʼA A WÁANTAʼAL

Juntúul doctoraeʼ ku yaʼalik: «Le máaxoʼob ku kíimil wa máax tiʼob yéetel ku chaʼik u yáantaʼaloʼob tumen u láakʼtsiloʼob wa u amigoʼoboʼ, maas chan séebaʼan u kaʼa chʼaʼik bej u kuxtaloʼob». Aʼal tiʼ a amigoʼob bey baʼaxoʼob jeʼel u páajtal u beetkoʼob ta woʼolaleʼ. Maʼ xaaneʼ letiʼobeʼ taak u yáantkechoʼob, chéen baʼaleʼ maʼ u yojloʼob bix jeʼel u beetkoʼobeʼ (Proverbios 17:17).

NATSʼABA TIʼ DIOS

Tinaeʼ ku yaʼalik: «In wíichameʼ séeb úuchik u kíimil yoʼolal cáncer, desde ka úuch leloʼ pʼáat minaʼan máax uʼuyik bix in wuʼuyikinba, le oʼolal káaj in tsikbaltik tiʼ Dios baʼax ku yúuchulten. Cada kéen aajkeneʼ kin kʼáatik tiʼ Dios ka u tsʼáaten u muukʼil utiaʼal in beetik tuláakal le baʼaxoʼob kʼaʼabéet teʼ kʼiinoʼ. Dioseʼ jach yaʼab bix úuchik u yáantken». Tarshaeʼ, veintidós años yaantiʼ ka kíim u maama, letiʼeʼ ku yaʼalik: «Jach tu líiʼsaj in wóol in xokik le Biblia sáamsamaloʼ. Lelaʼ tu beetaj in tuukul tiʼ baʼaloʼob jatsʼutstak».

TUKULT YAAN A KAʼA ILIK A LÁAKʼTSIL

Tinaeʼ ku yaʼalik: «Kex in wojel yaan u kaʼa líiʼsaʼal le kimenoʼoboʼ, tu káajbaleʼ maʼ tu yáanteniʼ, tumen teen yéetel in paalaleʼ jach kʼaʼabéetchajtoʼon u yáantaj in wíicham. Bejlaʼaʼ tsʼoʼok cuatro años kíimkeʼ, kin wuʼuyik jach ku líiʼsik in wóol le jatsʼuts esperanza yaantenoʼ. Lelaʼ ku yáantken utiaʼal maʼ u jach lúubul in wóol. In tuukul tiʼ le kʼiin kéen in kaʼa il in wíichamoʼ ku kiʼimakkúuntik in wóol yéetel ku yáantken in wuʼuyinba chan maʼalobil».

Maʼ xaaneʼ jeʼel tak a wuʼuyik bey maʼ tun kaʼa líikʼil a wóoleʼ, baʼaleʼ kʼaʼajaktech baʼax ku yaʼalik Vanesa, letiʼeʼ ku yaʼalik: «Kex maʼ u béeytal a tuʼubsik le baʼax úuchoʼ, chéen baʼaleʼ jujunpʼíitil kun kaʼa líikʼil a wóol».

Kʼaʼajaktech lelaʼ: «Kex bejlaʼaʼ minaʼan ta wiknal le máax a yaabiltmoʼ, yaan baʼax oʼolal u seguer a kuxtal». Dioseʼ jach u yaabiltmech yéetel u kʼáat ka kiʼimakchajak a wóol le táan a biskaba yéetel le máaxoʼob u yaabiltmechoʼoboʼ, leloʼ yaan u tsʼáaik u biilal a kuxtal. Maʼ tun xáantaleʼ Dioseʼ yaan u kaʼa líiʼsik le kimenoʼoboʼ, letiʼeʼ u kʼáat ka yanakech yéetel le máaxoʼob a yaabiltmoʼ. Kéen úuchuk lelaʼ yaan u jach kiʼimaktal a wóol.