U OLASIL u kʼáaʼnáabil le Atlanticooʼ táan u bin u jatsʼkuba tu niʼ le barco ku bin Europaoʼ. Juntúul tiʼ le máaxoʼob ku binoʼoboʼ George Young, letiʼeʼ ku kʼaʼajsik yéetel kiʼimak óolal le baʼaxoʼob tu beetaj utiaʼal u kʼaʼaytaʼal le maʼalob péektsil Brasiloʼ. * Baʼaleʼ le táan u binoʼ joʼopʼ u tuukul tiʼ le luʼumiloʼob tuʼux tsʼoʼok u túuxtaʼal kʼaʼaytajoʼ: España yéetel Portugal, teʼeloʼ óoliʼ maʼ kʼaʼaytaʼak le maʼalob péektsiloʼ. Kéen kʼuchkeʼ yaan u káajal u programartik baʼax kʼiin u máansik u tsoltʼaan le sukuʼun Joseph F. Rutherfordoʼ yéetel u tʼoxik 300 mil tratadoʼob.

Le sukuʼun Youngoʼ kʼuch tu kaajil Lisboa (Portugal) tu añoil 1925. Teʼ kʼiinoʼob jeʼeloʼ jach yaan talamiloʼobiʼ. Le gobierno republicanooʼ káaj u meyaj tu añoil 1910, beyoʼ luʼsaʼab le rey ku gobernaroʼ bey xan le páajtalil yaan tiʼ le religión Católica teʼ gobiernooʼ. Bey túunoʼ maas anchaj u páajtalil tiʼ le máakoʼob u beetkoʼob le baʼax u kʼáatoʼoboʼ, baʼaleʼ maʼ xuʼul u yantal talamiloʼob teʼ luʼumiloʼ.

Le ka kʼuch u kʼiinil u máansaʼal le tsoltʼaan tumen le sukuʼun Rutherfordoʼ, le gobiernooʼ tu tsʼáaj u leyil u beetaʼal le baʼax ku yaʼalik le soldadoʼoboʼ, tumen taakchaj u líikʼil le máakoʼob tu contra le gobiernooʼ. U secretarioil le Sociedad Bíblica Británica yéetel Extranjeraoʼ tu yaʼalaj tiʼ le sukuʼun Young yaan u líikʼil yaʼab máakoʼob tu contraoʼ. Kex beyoʼ tu kʼáataj wa jeʼel u páajtal u meyajtiʼ le gimnasio yaan teʼ Escuela Secundaria Camõesoʼ, ka tsʼaʼabtiʼ.

Tuláakal máak páaʼtik u kʼiinil 13 tiʼ mayo utiaʼal u máansaʼal le tsoltʼaanoʼ. Le anuncioʼob takʼaʼanoʼob teʼ najoʼob yéetel le jóoʼsaʼaboʼob tiʼ periodicooʼ ku yaʼalikoʼobeʼ u kʼaabaʼ le tsoltʼaanoʼ letiʼ lelaʼ: «Bix jeʼel u kuxtal máak mantatsʼ teʼ Luʼumaʼ». Le máaxoʼob yaanal u religionoʼob pʼekmiloʼonoʼ tu jóoʼsoʼob tu séebaʼanil teʼ periódico yaan u kʼuchul «maʼ jaajil profetaʼob» utiaʼal u yaʼalikoʼob tiʼ le máakoʼob maʼ u chaʼik u tuʼusloʼoboʼ. Tu tʼoxoʼob u milesil folletoʼob tu jool le gimnasio tuʼux ku yaʼalik maʼ jaaj le baʼax ken u kaʼans le sukuʼun Rutherfordoʼ.

Kex beyoʼ páajchaj u yokol óoliʼ dos mil máakoʼob u yuʼuboʼob le tsoltʼaanoʼ yéetel kex dos mil maʼ páajchaj u yookliʼ. Yanoʼobeʼ chéen teʼ escaleraʼob pʼáat u yuʼuboʼoboʼ yéetel uláakʼoʼobeʼ kulajoʼob teʼ nuʼukuloʼob tuʼux ku beetaʼal ejerciciooʼ.

Baʼaleʼ anchaj jujunpʼéel talamiloʼob. Le máaxoʼob u pʼeekoʼob le baʼax ku kaʼansaʼaloʼ joʼopʼ u yawatoʼob yéetel tu kaʼakaʼachoʼob yaʼab sillaʼob. Kex beyoʼ le sukuʼun Rutherfordoʼ maʼ tsʼíikilnajiʼ, baʼaxeʼ naʼak yóokʼol junpʼéel mesa utiaʼal ka uʼuyaʼak baʼax ku yaʼalik. Ka tsʼoʼokeʼ, kex tsʼoʼok maas tiʼ chúumuk áakʼabeʼ, maas tiʼ mil doscientos máakoʼob tu tsʼáaj u kʼaabaʼob yéetel u direccionoʼob utiaʼal ka túuxtaʼak le publicacionoʼob tiʼoboʼ. Ka sáaschaj tuláakʼ kʼiineʼ, le periódico O Séculooʼ tu jóoʼsaj le baʼax kaʼansaʼab teʼ tsoltʼaanoʼ.

Tu mesil septiembre tiʼ 1925, káaj u jóoʼsaʼal ich portugués u revistail La Torre del Vigía, bejlaʼeʼ  U Pʼíich Tulumil Kanan (teʼ kʼiinoʼob jeʼeloʼ tu luʼumil Brasileʼ ku jóoʼsaʼal ich portugués xaniʼ). Virgílio Ferguson, juntúul j-Xoknáal tiʼ le Biblia kajaʼan kaʼach Brasiloʼ, tu chʼaʼtuklaj u bin áantaj utiaʼal u kʼaʼaytaʼal le maʼalob péektsil Portugaloʼ. Letiʼ yéetel George Youngueʼ, tsʼokaʼaniliʼ u yáax múul meyajoʼob tu najil Betel Brasileʼ. Virgílio yéetel Lizzie, u yataneʼ, tu chʼaʼajoʼob junpʼéel barco utiaʼal u binoʼob Portugal. Lelaʼ jach maʼalob úuchik u beetkoʼob, tumen le sukuʼun Youngoʼ tsʼoʼok u túuxtaʼal kʼaʼaytaj Unión Soviética yéetel tuláakʼ tuʼuxoʼob.

Baʼaleʼ joʼopʼ u maas talamtal le ka líikʼ le máakoʼob tu contra le gobierno yéetel ka joʼopʼ u maas chʼaʼpachtaʼal le sukuʼunoʼoboʼ. Baʼaleʼ le sukuʼun Fergusonoʼ maʼ tu xulaj u meyajtik Diosiʼ. Tu yilaj u kanáantik le u chan múuchʼ j-Xoknáaloʼob tiʼ le Bibliaoʼ, le oʼolal tu kʼáataj permiso tiʼ le autoridadoʼob utiaʼal u beetik muchʼtáambaloʼob tu yotochoʼ. Tu mesil octubre tiʼ 1927, tsʼaʼab le permiso tiʼoʼ.

Le yáax año u tsʼaamuba le máakoʼob tu contra le gobiernooʼ, kex cuatrocientos cincuenta máakoʼob tu kʼáatoʼob ka túuxtaʼaktiʼob u revistail La Torre del Vigía. Tsʼoʼoleʼ yoʼolal le tratadoʼob yéetel folletoʼoboʼ kʼaʼaytaʼab le maʼalob péektsil tu kaajil Angola, Azores, Cabo Verde, Goa (India), Madeira, Mozambique yéetel Timor Oriental.

Tu añoil 1929, kʼuch Manuel da Silva Jordão tu kaajil Lisboa, letiʼeʼ jardinero yéetel ku tʼanik portugués. Le tiaʼan kaʼach Brasiloʼ, tu yuʼubaj u tsoltʼaan sukuʼun Young. Tu séebaʼanileʼ tu tsʼáaj cuenta letiʼe u jaajiloʼ, ka taakchaj u bin u yáant le sukuʼun Ferguson utiaʼal u kʼaʼaytikoʼob le maʼalob péektsil tiʼ le máakoʼoboʼ. Le oʼolal Manueleʼ tu beetaj u colportoril, le bix kʼaj óolaʼanil kaʼach le precursoroʼoboʼ. Tumen jach tu yorail ku imprimirtaʼal yéetel ku tʼoʼoxol le publicacionoʼoboʼ jach séebaʼan úuchik u nojochtal le múuchʼulil yaan Lisboaoʼ.

Le sukuʼun Ferguson yéetel u yatanoʼ suunajoʼob Brasil tu añoil 1934. Baʼaleʼ tsʼoʼok xan u kʼaʼaytaʼal le maʼalob péektsil Portugaloʼ. Kex yaʼab talamiloʼob anchaj Europa yoʼolal le baʼateltáambal anchaj España bey xan le u Kaʼapʼéel Nojoch Baʼateltáambaloʼ, le u chan múuchʼ sukuʼunoʼob yanoʼob Portugaloʼ maʼ xuʼul u meyajtikoʼob Diosiʼ. Ichil junpʼéel tiempoeʼ beyoʼob kaʼach junlóochʼ chúukeʼ. Baʼaleʼ káaj u tóochʼ u kʼáakʼil tu añoil 1947 le ka kʼuch John Cooke, le yáax misionero teʼ luʼumiloʼ, letiʼeʼ xooknajaʼan tu escuelail Galaad. Desde teʼ kʼiinoʼob jeʼeloʼ joʼopʼ u maas yaʼabtal le j-kʼaʼaytajoʼoboʼ. Maʼ xuʼul u yaʼabtaloʼob kex prohibirtaʼab le kʼaʼaytaj tumen le gobierno tu añoil 1962. Baʼaleʼ tu mesil diciembre tiʼ 1974, kʼaʼam u religión u j-jaajkunajoʼob Jéeoba teʼ luʼumiloʼ, teʼ kʼiinoʼob jeʼeloʼ yaan maas tiʼ trece mil j-kʼaʼaytajoʼobiʼ.

Bejlaʼeʼ yaan maas tiʼ cincuenta mil sukuʼunoʼob ku kʼaʼaytajoʼob Portugal bey xan tu islail Azores yéetel Madeira tuʼux ku tʼaʼanal portugués. Ichiloʼobeʼ tiaʼan tak u yáabil le máaxoʼob uʼuy le tsoltʼaan tu máansaj le sukuʼun Rutherford tu añoil 1925.

Jach k-tsʼáaik u graciasil tiʼ Jéeoba bey xan tiʼ le sukuʼunoʼob maʼ sajakchajoʼob u pakʼoʼob u semillail le Reinooʼ. Jeʼex tu yaʼalil Pabloeʼ letiʼobeʼ u palitsiloʼob Cristo Jesús utiaʼal u yáantkoʼob le j-táanxel luʼumiloʼoboʼ (Rom. 15:15, 16). (Le baʼaxoʼob k-líiʼsmaj Portugaloʼ.)