Bix jeʼel k-áantik k-paalal u yaabiltoʼob Dios yéetel tuláakal u puksiʼikʼaloʼobeʼ

BEJLAʼEʼ maʼ chéen chʼaʼabil u jach biskuba máak yéetel Jéeobaiʼ (Salmo 16:8). Tumen jeʼex u yaʼalik le Bibliaoʼ kuxaʼanoʼon tiʼ «talam kʼiinoʼob», tuʼux óoliʼ tuláakal máakeʼ chéen ku yaabiltkoʼob «u kʼaakʼas tsʼíibolaloʼob» baʼaleʼ maʼatech u yaabilkoʼob Dios (2 Timoteo 3:1-5). Jach beyoʼ, bejlaʼeʼ óoliʼ mix máak u jach yaabiltmaj Dios.

Toʼon taatatsiloʼoneʼ maʼ tu páajtal k-páaʼtik chéen ka síijik tu puksiʼikʼal k-paalal u yaabiltkoʼob Diosoʼ. Baʼaxeʼ kʼaʼabéet k-áantkoʼob u yaabiltoʼob Dios yéetel tuláakal u puksiʼikʼaloʼob. ¿Bix jeʼel u páajtal k-beetkeʼ?

Kʼaʼabéet k-tsikbal tu yéeteloʼob

Chéen jeʼel u páajtal k-áantik k-paalaloʼob u yaabiltoʼob Dios yéetel tuláakal u puksiʼikʼaloʼob wa toʼon xan k-yaabiltmaj yéetel tuláakal k-puksiʼikʼaleʼ (Lucas 6:40). Le Bibliaoʼ ku yaʼalik: «Yaabilt Yuumtsil a [Dios] yéetel tuláakal a puksiʼikʼal, yéetel tuláakal a [kuxtal] bey xan yéetel tuláakal a muukʼ. Tʼilkúunt ta tuukul tuláakal le baʼaxoʼob tsʼoʼok in waʼaliktech bejelaʼaʼ. Kaʼambes mantatsʼ tiʼ a paalal» (Deuteronomio 6:4-7).

¿Baʼax túun unaj k-beetik utiaʼal k-áantik k-paalal u yaabiltoʼob Dios yéetel tuláakal u puksiʼikʼaloʼob? Unaj k-ilik baʼax yaan tu puksiʼikʼaloʼob yéetel k-eʼesiktiʼob baʼax yaan xan t-puksiʼikʼal.

Ka tu yiluba Jesús yéetel kaʼatúul u disipuloʼob táan u binoʼob tu kaajil Emauseʼ, tu kʼáatajtiʼob baʼax chiʼichnakkuntkoʼob. Ka tsʼoʼok u yuʼubik baʼax tu yaʼaloʼobeʼ, tu tsolaj u nuʼuktiʼob yéetel le Bibliaoʼ. Ka tsʼoʼokeʼ le disipuloʼobaʼ tu yaʼaloʼob: «¿Maʼ wa jaaj bey jumpʼéel kʼáakʼ tʼaʼab tiʼ k-puksiʼikʼal le ka tʼaanaj t-éetel teʼ bejoʼ[?]». Teʼ tsikbal tu beetoʼoboʼ cada utúuleʼ tu yeʼesaj baʼax yaan ichil u puksiʼikʼal (Lucas 24:15-32). Kux túun toʼon ¿bix jeʼel k-ilik jach baʼax yaan tu puksiʼikʼal k-paalaleʼ?

Maʼ sen úucheʼ, tiʼ jujuntúul taatatsiloʼob tu kaʼansaj u paalaloʼob u yaabiltoʼob Dioseʼ, kʼáataʼabtiʼob bix úuchik u kanik u yiloʼob baʼax jach yaan tu puksiʼikʼal u paalaloʼob. Glen, * utúul sukuʼun kajaʼan tu luʼumil Meejiko yéetel yaan kantúul u paalal tsʼoʼok u nojochtaloʼobeʼ, tu yaʼalaj: «Utiaʼal k-ojéeltik baʼax yaan tu puksiʼikʼal k-paalaleʼ yaan baʼaxoʼob kʼaʼabéet k-beetik. Teen yéetel in wataneʼ mantatsʼ kaʼach k-ilik jóoʼsik u súutukil utiaʼal k-antal yéetel k-paalal. Tu táankelmiloʼob kaʼacheʼ yaan kʼiineʼ, de áakʼabeʼ ku xáantal táan k-tsikbal tu yéeteloʼob tiʼ le baʼax u kʼáatoʼob tsikbaloʼ. Tu yorai táan k-janaleʼ, k-chʼenxikintik xan baʼax ku yaʼalikoʼob, yéetel wa k-tsʼáaik cuenta yaan upʼéel baʼax maʼ maʼalob ku beetkoʼobeʼ k-ilik tsolik u nuʼuktiʼob, yaan oraeʼ maʼatech u tsʼáaikoʼob cuenta wa táan k-tsolnuʼuktikoʼob».

Ken tsikbalnakoʼon yéetel k-paalaleʼ, kʼaʼabéet xan k-eʼesiktiʼob baʼax yaan t-puksiʼikʼal. Jesuseʼ tu yaʼalaj: «Juntúul máak utseʼ baʼaloʼob maʼalobtak ku yaʼalik, tumen le utsoʼ tiʼ yaan tu puksiʼikʼaleʼ [...]. Tumen ku yaʼalik yéetel u chiʼeʼ le baʼax chupmajil u puksiʼikʼaloʼ» (Lucas 6:45). Toshikieʼ yaan óoxtúul u paalal yéetel tu óoxtúulil táan u beetik u precursoriloʼob tu luʼumil Japón. Letiʼeʼ ku yaʼalik: «Teneʼ yaʼab utéenel tin tsikbaltajtiʼob baʼax áanten utiaʼal ka yanak in fe tiʼ Jéeoba, baʼax áanten in wil jach tu jaajil yaan Dios, baʼax áanten in tsʼáa cuenta le Bibliaoʼ jach tu jaajil tiʼ Dios u taal yéetel letiʼe baʼax maas maʼalob utiaʼal u nuʼuktik u kuxtal máakoʼ». Cindy, utúul maamatsil kajaʼan tu luʼumil Meejikoeʼ, tu yaʼalaj: «In wíichameʼ mantatsʼ ku payalchiʼ kaʼach yéetel k-mejen paalal, letiʼob túuneʼ ken u yuʼuboʼob tu jaajil u yóol ku payalchiʼeʼ, ku tsʼáaikoʼob cuenta jach tu jaajil yaan Jéeoba».

Kʼaʼabéet k-eʼesiktiʼob jach tu jaajil k-yaabiltmaj Dios

Maʼ chéen kʼaʼabéet k-aʼalik tiʼ k-paalal bukaʼaj k-yaabiltmai Diosiʼ, kʼaʼabéet xan k-eʼesiktiʼob.  Tuukulnakoʼon tiʼ baʼax tu beetaj Jesucristo. Le máakoʼoboʼ ken u yiloʼob kaʼach táan u tsʼoʼokbesik Jesús baʼax ku yaʼalik Jéeobaeʼ, ku tsʼáaikoʼob cuenta jach nojoch u yaabilaj tiʼ u Taata. Letiʼeʼ tu yaʼalaj: «Utiaʼal ka u yojéelt yóokʼol kaabeʼ teneʼ in yaabiltmaj le Taataoʼ yéetel táan in beetik le baʼax tu yaʼalaj ka in beetoʼ» (Juan 14:31).

Gareth, utúul sukuʼun yaan tu luʼumil Galeseʼ, ku yaʼalik: «K-paalaloʼobeʼ kʼaʼabéet u yilkoʼob jach tu jaajil k-yaabiltmaj Jéeoba yéetel mantatsʼ k-ilik beetik tuláakal baʼal jeʼex u kʼáateʼ. In paalaloʼobeʼ ku yilkoʼob kin éejemtik le baʼax maʼ maʼalob kin beetik yaan oraoʼ, tumen Jéeobaeʼ bey u yaʼalik ka beetaʼakoʼ. Bejlaʼeʼ letiʼobeʼ ku yilik u beetkoʼob xan beyoʼ».

Greg, utúul taatatsil australianoeʼ, ku yaʼalik: «K-kʼáat ka u yil k-paalal k-tsʼáaik táanil ichil k-kuxtal k-beetik baʼax u kʼáat Jéeoba. Wa yaan kʼiin kʼaʼabéet k-chʼaʼatuklik wa baʼax yoʼolal le meyaj wa yoʼolal le náaysaj óolaloʼ, táanil k-ilik wa maʼ tu luʼsiktoʼon u súutukil utiaʼal k-bin muchʼtáambal yéetel k-jóokʼol kʼaʼaytaj. Jach ku taasiktoʼon kiʼimak óolal k-ilik hija yaan 19 jaʼaboʼob tiʼ, ku beetik u precursora auxiliarileʼ bey xan suuk u beetikoʼ».

Kʼaʼabéet k-áantik k-paalaloʼob u kʼaj óoltoʼob Dios tubeel

Wa maʼ k-kʼaj óol tubeel wa máaxeʼ maʼ tu páajtal k-yaabiltik mix k-kʼubik óol tiʼ. Le oʼolal ka ilaʼab tumen apóstol Pablo kʼaʼabéet u maas yaabiltaʼal Jéeoba tumen le sukuʼunoʼob kajaʼanoʼob Filiposoʼ, tu yaʼalajtiʼob: «Kin kʼáatik ich payalchiʼeʼ ka xiʼik u bin u yaʼabtal a yaakunajeʼex yéetel yaʼab kʼaj óolalil yéetel naʼatil tiʼ tuláakal baʼal» (Filiposiloʼob 1:9). Falconerio, utúul sukuʼun kajaʼan tu luʼumil Perú, táan u líiʼsik kantúul u paalaleʼ, ku yaʼalik: «Sáamsamal kin wilik in xakʼalxoktik le Biblia tu yéeteloʼoboʼ, lelaʼ ku beetik u jach muʼukʼantal u fejoʼob. Ken pʼáatak maʼatech in beetkeʼ kin wilik ku pʼáatal bey maʼ jach u yaabiltmoʼob Dioseʼ». Gary, utúul taatatsil kajaʼan Australiaeʼ ku yaʼalik: «Kin tsikbaltik tiʼ in paalal le baʼaxoʼob eʼesik táan u béeytal le profecíaʼob yaan teʼ Bibliaoʼ. Yéetel mantatsʼ kin waʼaliktiʼob u kʼaʼananil u nuʼuktik u kuxtal máak yéetel le baʼax ku yaʼalik le Bibliaoʼ. K-ilik k-xook mantatsʼ tu yéeteloʼobeʼ tsʼoʼok u beetik u muʼukʼantal u fejoʼob».

Wa le kaʼansaj ku tsʼaʼabal yéetel kiʼimak óolal bey xan yéetel tsiikiloʼ, le chan paaloʼ maas séeb jeʼel u kanik yéetel u kʼuchul tu puksiʼikʼal  le baʼax ku kaʼansaʼaltiʼoʼ (Santiago 3:18). Tu luʼumil Gran Bretaña, Shawn yéetel Pauline yaan kantúul u paalaloʼobeʼ, ku yaʼalikoʼob: «Ken múul xooknakoʼon yéetel k-paalaloʼobeʼ kex tumen yaan ora óoliʼ maʼatech u jetsʼtaloʼobeʼ k-ilik maʼ k-jáan tsʼíikiltkoʼob. Tsʼoʼoleʼ k-ilik xan kʼexik bix k-xook tu yéeteloʼob. Yaan kʼiineʼ k-kʼáatiktiʼob tiʼ baʼax u kʼáatoʼob ka xooknakoʼon. Ku meyaj xan toʼon videoʼob beetaʼan tumen u kaajal Jéeoba; yaan kʼiineʼ utiaʼal k-tsikbaltik baʼax ku kaʼanskoʼobtoʼoneʼ k-jeʼelsik le videooʼ wa k-jel chaʼantik le xóotʼ k-kʼáatoʼ». Uláakʼ utúul maamatsil britanica ku kʼaabatik Kimeʼ, ku yaʼalik: «Kin wilik in líiʼskimba tubeel utiaʼal in xook yéetel in paalal, beyoʼ jeʼel u páajtal in beetik kʼáatchiʼ tiʼob utiaʼal in beetik u tuukuloʼobeʼ. Le súutukiloʼob beyaʼ jach ku taasiktoʼon kiʼimak óolal yéetel ku beetikoʼob k-cheʼej».

Kʼaʼabéet k-áantik u yéeyoʼob máax yéetel unaj u biskubaʼob

Wa k-paalaloʼob ku biskubaʼob yéetel máaxoʼob u yaabiltmoʼob Jéeobaeʼ, maʼ xaaneʼ jeʼel u kʼuchul xan u yaabiltoʼob yéetel u yilkoʼob kʼaʼanan u meyajtikoʼobeʼ. Kex tumen maʼ chéen chʼaʼabil k-áantkoʼob u yéeyoʼob máax yéetel unaj u biskubaʼobeʼ, baʼaleʼ wa k-beetkeʼ yaan u taasik yaʼab utsiloʼob. Maʼalob xan ka k-il u biskubaʼob yéetel máaxoʼob jach u tsʼaama u yóoloʼob u meyajtoʼob Jéeoba. Le sukuʼunoʼobaʼ tsʼoʼok u yáantkoʼob yaʼab táankelem paalal utiaʼal xan ka u maas meyajtoʼob Jéeoba. Utúul kiik kʼuch u beetuba misioneraileʼ ku yaʼalik: «In taataʼobeʼ suuk kaʼach u invitarkoʼob le precursoroʼob janal t-otochoʼ. Ken in wil kaʼach jach kiʼimak u yóoloʼob táan u meyajtikoʼob Dioseʼ ku taaktal xan kaʼach in beetik in precursorai».

Baʼaleʼ k-ojel xaneʼ, yaan máaxoʼob jeʼel u beetik u bin kʼaasil tiʼ k-paalal wa ka u bisubaʼob tu yéeteloʼobeʼ. Le oʼolal kʼaʼabéet k-kanáantkoʼob tiʼ máakoʼob beyaʼ, baʼaleʼ lelaʼ maʼ chéen chʼaʼabil u beetaʼaliʼ (1 Corintoiloʼob 15:33). Kʼaʼabéet k-kanik kaʼans tiʼ k-paalal maʼ u jach biskubaʼob yéetel máaxoʼob maʼ u yaabiltmoʼob yéetel maʼ u kʼaj óoloʼob Jéeobaiʼ (Proverbios 13:20). Shawn, le máax tiʼ tsʼoʼok k-yáax tʼaaneʼ, ku yaʼalik: «T-kaʼansaj tiʼ k-paalaloʼob unaj u biskubaʼob tubeel yéetel u yéet xookoʼob tak le tuʼux ku yilkoʼob kʼaʼabéeteʼ. Letiʼobeʼ ku naʼatkoʼob kaʼach baʼaxten maʼ maʼalob ka táakpajkoʼob tiʼ baʼaloʼob mix baʼal yaan yil yéetel u xookoʼob bey xan tiʼ le ketlan báaxaloʼob ku beetaʼal teʼ escuelaoʼ».

Le utsiloʼob ku taasik le maʼalob kaʼansajoʼ

Wa k-kaʼansik k-paalal ka tʼaanakoʼob tiʼ baʼax ku creertikoʼobeʼ, yaan u yeʼeskoʼob u yaabilajoʼob tiʼ Dios yéetel kiʼimak óolal. Mark, utúul sukuʼun kajaʼan Estados Unidoseʼ, tu yaʼalaj: «K-kʼáat ka u yil k-paalal jeʼel u taasiktiʼob kiʼimak óolal u tʼaanoʼob jeʼel baʼalak súutukil tiʼ baʼax ku creertikoʼobeʼ, maʼ chéen ken jóoʼkoʼob kʼaʼaytajiʼ. Le oʼolal ken xiʼikoʼon parque, jáal jaʼ wa tuláakʼ tuʼuxoʼobeʼ, k-bisik bibliaʼob yéetel uláakʼ jóoʼsaʼaniloʼob utiaʼal k-tsikbal yéetel le máakoʼoboʼ. K-paalaloʼobeʼ utstutʼaan u kʼaʼaytajoʼob beyaʼ. Ken u yiloʼob táan k-tsikbal yéetel wa máaxeʼ letiʼobeʼ ku táakpajloʼob xan teʼ tsikbaloʼ».

Apóstol Juaneʼ tu yáantaj yaʼab máakoʼob utiaʼal ka u yaabiltoʼob Dios yéetel tuláakal u puksiʼikʼaloʼob. Tu tsʼook kʼiiniloʼob u kuxtaleʼ, tu tsʼíibtaj yoʼolal le máaxoʼob tu yáantaj u kʼaj óoltoʼob Diosoʼ: «Minaʼan uláakʼ baʼal ka u tsʼáa teen maas kiʼimak óolal le in wojéeltik in paalaloʼobeʼ táan u kuxtaloʼob jeʼel bix u kaʼansik le jaajoʼ» (3 Juan 4). Wa k-kaʼansik k-paalaloʼob u yaabiltoʼob Dios yéetel tuláakal u puksiʼikʼaloʼobeʼ yaan xan u kiʼimaktal k-óol jeʼex le apóstol Juanoʼ.

[Tsolajiloʼob]

[U tsolajil le oochel teʼ táan juʼun 13]

❖ Kʼaʼabéet k-jóoʼsik u súutukil utiaʼal k-tsikbal yéetel k-paalal tiʼ baʼax ku yaʼalik Jéeoba

[U tsolajil le oochel teʼ táan juʼun 14]

❖ Kaʼans a paalal u yeʼesoʼob u yaabiltmoʼob Dios

[U tsolajil le oochel teʼ táan juʼun 14]

Gentileza de Green Chimneys Farm