U cinco tuus: Maríaeʼ u maama Dios

¿Bix úuchik u yantal le tuusaʼ? «U yilaʼal María bey u maama Dioseʼ upʼéel baʼax káaj u maas creertaʼal [...] ka maas yaʼabchaj le máaxoʼob kʼamik baʼaxoʼob maʼ jaajtak ku kaʼansaʼal kaʼachoʼ.» (The New Encyclopædia Britannica, 1988.) Le enciclopediaaʼ ku yaʼalik xaneʼ tumen tsʼoʼok u máan u milesi jaʼaboʼob joʼopʼok u adorartaʼal Maríaeʼ pʼáat maas séeb u creertaʼal le kaʼansajaʼ.

¿Baʼax ku kaʼansik le Bibliaoʼ? «A kaʼaj kʼojaʼantal tiʼ chaambal yéetel [...] Jesús kan a tsʼáa u kʼaabaʼinte. Letiʼeʼ yaan u jach nojochtal, bíin tʼaʼanak xan u Paal Jajal Dios [...], le beetik xaneʼ le kiliʼich chaambal kun síijiloʼ yaan u tʼaʼanal u Paal Jajal Dios.» (Lucas 1:31-35).

Jeʼex u yaʼalik le teksto tsʼoʼok k-xokikoʼ, Maríaeʼ maʼ u maama Diosiʼ, u maama «u Paal Jajal Dios». Le Bibliaoʼ ku yaʼalikeʼ «wa le kaʼan yéetel tuláakal u nojochil maʼ tu páajtal u [kʼalik]» Dioseʼ, ¿jeʼel wa túun u páajtal u yantal kaʼach tu jobnel Maríaeʼ? (1 Reyes 8:27.) Tsʼoʼoleʼ Maríaeʼ mix utéen tu yaʼalaj wa Dios u hijo. ¿Baʼaxten túun ku kaʼansaʼaleʼ Maríaeʼ u maama Dios? Lelaʼ tiʼ u taal xan tiʼ u kaʼansajil le Trinidadoʼ. U adorartaʼal Maríaeʼ káaj tu jaʼabil 431, ka beetaʼab upʼéel muchʼtáambal (Concilio de Éfeso) tu noj kaajil Éfeso, tuʼux aʼalaʼabeʼ, «Maríaeʼ u maama Dios», wa jeʼex úuchik u yaʼalaʼal ich griegoeʼ Theotokos, wa «le máax tu síijsaj Diosoʼ». Tu noj kaajil Éfeso tuʼux beetaʼab le muchʼtáambal yéetel chʼaʼatuklaʼab lelaʼ, jach suuk kaʼach u adorartaʼal Ártemis, le máax beetik u yantal kuxtaloʼ.

Yaʼab tiʼ le baʼaxoʼob ku beetaʼal utiaʼal u adorartaʼal María jeʼex le procesionoʼoboʼ, tiʼ u taal tiʼ le baʼaxoʼob ku beetaʼal kaʼach utiaʼal u adorartaʼal Ártemis, le máax ku tuklaʼal «kaʼan u taaloʼ» (Beetaʼanoʼob [Hechos] 19:35). Uláakʼ baʼax joʼopʼ u beetaʼal xaneʼ letiʼe u meyaj imagenoʼob utiaʼal u adorartaʼal Diosoʼ.

Xok le tekstoʼobaʼ: Mateo 13:53-56; Marcos 3:31-35; Lucas 11:27, 28.

U JAAJIL:

Maríaeʼ u maama u Hijo Dios. Le u yaʼalaʼal u maama Diosoʼ tiʼ u taal tiʼ u kaʼansajil le Trinidadoʼ.