Le oracionoʼ

4 ¿Baʼaxoʼob unaj k-kʼáatik?

TIʼ TULÁAKAL le oracionoʼob ku beetaʼaloʼoboʼ, ku tuklaʼaleʼ le maas ku chʼaʼchiʼitaʼaloʼ letiʼe padrenuestro tu kaʼansaj Jesusoʼ. Baʼaleʼ letiʼe oración maases maʼatech u jach naʼataʼal xanoʼ. U millonesil máakoʼobeʼ yaʼab u téenel yéetel mantatsʼ ku yaʼalikoʼob le oracionaʼ kex maʼatech u naʼatkoʼob baʼax u kʼáat u yaʼale, baʼaleʼ Jesuseʼ maʼ bey tu yaʼalaj ka beetaʼakiʼ. ¿Baʼaxten k-aʼalik lelaʼ?

Tumen táanil tiʼ u kaʼansik le oracionaʼ Jesuseʼ tu yaʼalaj: «Kéen orarnakech túuneʼ maʼ a babal aʼalik junpʼéeliliʼ baʼal[iʼ]» (Mateo 6:7). Yéetel le baʼax tu yaʼalaj Jesusaʼ k-ilkeʼ, maʼ nukaʼaj kaʼach u kaʼans junpʼéel oración utiaʼal ka babal aʼalaʼak de memoriailiʼ. Baʼaxeʼ taak kaʼach u kaʼansik jujunpʼéel tiʼ le baʼaxoʼob unaj u yáax kʼáataʼal ken beetaʼak junpʼéel oracionoʼ. Le oracionaʼ tiʼ ku chíikpajal teʼ Mateo 6:9-13, koʼox ilik.

«K-Taata yanech teʼ kaʼanoʼ, santificartaʼak [wa kiliʼichkúuntaʼak] a kʼaabaʼ».

Yáaxeʼ Jesuseʼ tu yaʼalaj tiʼ u disipuloʼobeʼ chéen tiʼ Jéeoba unaj u oraroʼob. Baʼaleʼ ¿baʼaxten ku yaʼalik unaj u kiliʼichkúuntaʼal u kʼaabaʼ Dios?

Tumen desde ka beetaʼab wíinikeʼ tsʼoʼok u yaʼalaʼal baʼaloʼob maʼ jaajtak tu contra u kʼaabaʼ Diosiʼ. Satanás, u maas nojoch enemigo Dioseʼ, ku yaʼalikeʼ Jéeobaeʼ chéen táan u tuus, maʼatech u tuukul tu yoʼolal u maasil yéetel minaʼan u derechoil u gobernar (Génesis 3:1-6). Le máaxoʼob yanoʼob tu favor Satanasoʼ ku kaʼanskoʼobeʼ Dioseʼ maʼatech u chʼaʼik óotsilil, kʼasaʼan, ku vengarkuba, tsʼoʼoleʼ ku yaʼalikoʼob xaneʼ maʼ letiʼ beet tuláakal le baʼaloʼob yaan way Luʼumaʼ. Yanoʼob xaneʼ tsʼoʼok tak u luʼskoʼob u kʼaabaʼ Dios ichil le Bibliaoʼ yéetel tsʼoʼok u yaʼalikoʼob maʼ unaj u meyaj tiʼ máakiʼ.

Baʼaleʼ le Bibliaoʼ ku yaʼalikeʼ Dioseʼ yaan u xuʼulsik lelaʼ (Ezequiel 39:7). Yéetel ken u beeteʼ yaan xan u luʼsik le talamiloʼob ku aktáantik wíinikoʼ. ¿Bix ken u beetil? Jesuseʼ tu tsolaj bix ken u beetil jeʼex ken k-il beoraaʼ.

«Taalak a Reino».

Teʼ kʼiinoʼobaʼ le máaxoʼob nuʼuktik le religionoʼoboʼ maʼ junpʼéeliliʼ bix u naʼatkoʼob baʼax u Reino Diosiʼ. Lelaʼ maʼ bey úuch yéetel le judíoʼob tu kʼiiniloʼob Jesusoʼ. Letiʼobeʼ u yoojloʼob kaʼach le profecíaʼob ku tʼaanoʼob tiʼ le Mesías, le Salvador yéeyaʼan tumen Dios, kun gobernar yéetel yaan u taasik utsiloʼob way Luʼumeʼ (Isaías 9:6, 7; Daniel 2:44).  Le gobiernoaʼ utiaʼal u santificartik u kʼaabaʼ Dioseʼ yaan u yeʼesik maʼ jaaj le baʼaxoʼob ku yaʼalik Satanasoʼ, yaan u xuʼulsik tiʼ letiʼ yéetel tiʼ le baʼaxoʼob ku beetkoʼ. Yaan xan u xuʼulsik le baʼateltáambaloʼoboʼ, le kʼojaʼaniloʼ, le wiʼijiloʼ yéetel le kíimiloʼ (Salmo 46:9; 72:12-16; Isaías 25:8; 33:24). Le oʼolaleʼ cada ken k-kʼáat tiʼ Dios ka taalak u Reinoeʼ táan k-kʼáatik ka béeyak le baʼaxoʼob ku yaʼalikoʼ.

«Beetaʼak baʼax a kʼáat, jeʼex u beetaʼal teʼ kaʼanoʼ bey xan ka beetaʼak way luʼumeʼ».

Le tʼaanoʼobaʼ ku yeʼesikeʼ yaan u béeychajal le baʼax u tukulmaj Dios utiaʼal le Luʼumaʼ, jeʼex béeychajik teʼ kaʼan le ka puʼul Satanás yéetel u angeloʼob way Luʼumeʼ (Apocalipsis 12:9-12). Le baʼax tu yaʼalaj Jesusaʼ ku yeʼesikeʼ unaj k-tuukul tiʼ baʼax u kʼáat u beet Dios, maʼ tiʼ le baʼaxoʼob k-kʼáatoʼ. Tumen le baʼax ken u beet Diosoʼ yaan u taasik yaʼab utsiloʼob. Tak Jesús juntúul máak minaʼan u kʼebaneʼ tu yaʼalaj: «Maʼ u beetaʼal baʼax in kʼáat, baʼaxeʼ beetaʼak baʼax a kʼáat» (Lucas 22:42).

«Tsʼáa k-oʼoch waaj utiaʼal le kʼiinaʼ».

Jesuseʼ tu yaʼaleʼ jeʼel u páajtal k-kʼáatik jujunpʼéel baʼaxoʼob kʼaʼabéettoʼoneʼ. Jeʼex k-ilkoʼ maʼ kʼaas ka k-kʼáat tiʼ Dios le baʼaloʼobaʼ. Wa k-beetik beyaʼ k-eʼesik creertik Jéeoba «tsʼáaik kuxtal, iikʼ yéetel tuláakal baʼal tiʼ máak» (Hechos 17:25). Le Bibliaoʼ ku ketik Dios yéetel juntúul taatatsil jach uts ku tsʼáaik tuláakal baʼax kʼaʼabéet tiʼ u paalal. Baʼaleʼ kex ku tsʼáaik baʼax ku kʼáataʼaltiʼeʼ , maʼ tu tsʼáaik tiʼ máak junpʼéel baʼax jeʼel u beetik u bin kʼaasil tiʼeʼ.

«Perdonart k-pʼaax».

¿Baʼaxten unaj u perdonartikoʼon Jéeoba? Kex yaʼab máax aʼalik minaʼan le kʼeban, wa maʼatech u taasik talamiloʼ, le Bibliaoʼ ku yaʼalikeʼ ku taasik yaʼab talamiloʼob, junpʼéel tiʼ lelaʼ letiʼe kíimiloʼ. Tsʼoʼoleʼ tumen desde ken síijikoʼon kʼebanoʼoneʼ k-beetik baʼaloʼob maʼ maʼalobtak tu táan Diosiʼ. Bey túunoʼ wa k-kʼáat kuxtal minaʼan u xuuleʼ kʼaʼabéet u perdonartiktoʼon Dios le baʼaloʼob maʼ maʼalobtak k-beetkoʼ (Romanos 3:23; 5:12; 6:23). Le Bibliaoʼ ku yaʼalikeʼ Jéeobaeʼ jach uts yéetel u kʼáat u perdonartoʼon (Salmo 86:5).

«Maʼ a chaʼik k-lúubul tiʼ baʼax kʼaas».

Bejlaʼeʼ maases unaj k-kanáantaʼal tumen Dios. Maʼ xaaneʼ yaʼab máaxoʼob aʼalikeʼ minaʼan Satanás. Baʼaleʼ Jesuseʼ tu yaʼaleʼ yaan, yéetel tu yaʼalaj xaneʼ letiʼ u gobernanteil le yóokʼol kaabaʼ (Juan 12:31; 16:11). Tsʼoʼoleʼ Satanaseʼ maʼ chéen taak u kʼaskúuntik le yóokʼol kaabaʼ, u kʼáat xan ka k-beet baʼax maʼ maʼalob utiaʼal k-náachtal tiʼ Jéeoba (1 Pedro 5:8). Baʼaleʼ maʼ unaj k-chʼaʼik saajkiliʼ, tumen Dioseʼ maas yaan u páajtalil yéetel ku kanáantik máaxoʼob meyajtik.

Baʼaleʼ yaan uláakʼ baʼaloʼob jeʼel páajtal u kʼáataʼal tiʼ Dioseʼ. Lelaʼ bey u yeʼesik le baʼax ku yaʼalik 1 Juan 5:14: «Jeʼel baʼalak ka k-kʼáat tiʼ Dioseʼ, wa maʼ tu bin tu contra u voluntadeʼ, letiʼeʼ yaan u yuʼubik». U kʼáat u yaʼaleʼ jeʼel u páajtal k-láaj aʼalik tiʼ Dios baʼax chiʼichnakkúuntkoʼoneʼ, tumen k-ojel ku yuʼubkoʼon (1 Pedro 5:7).

Baʼaleʼ ¿tiʼ baʼax súutukil yéetel tuʼux unaj k-orar? ¿Yaan wa baʼax ku yaʼalik le Biblia tu yoʼolaloʼ? U núukil le kʼáatchiʼobaʼ teʼ ken k-il teʼ tuláakʼ xookoʼ.