MÁANS ta tuukuleʼ juntúul a amigo jach jatsʼuts u modoseʼ tu beetaj junpʼéel baʼal maʼ a wojel baʼaxteniʼ. Yaneʼ ku yaʼaliktecheʼ tu beetaj tumen kʼasaʼan. ¿Yaan wa a jáan creertik le baʼax ku yaʼalaʼaloʼ wa yaan a páaʼtik baʼax ken u yaʼal a amigo? ¿Kux túun wa minaʼan teʼeloʼ? ¿Jeʼel wa a páaʼtik u taal utiaʼal a wuʼuy baʼax ken u yaʼaleʼ?

Táanil tiʼ a tuklik baʼax ken a beeteʼ, maʼ xaaneʼ maʼalob ka a tukle: «¿Jach wa tu jaajil in kʼaj óol in amigo? ¿Baʼaxten jatsʼuts in wilik u modos?». Wa bey k-beetik yéetel juntúul k-amigoeʼ, ¿maʼ wa bey xan unaj k-beetik táanil tiʼ k-aʼalik kʼasaʼan Diosoʼ?

Maʼ xaaneʼ talam a naʼatik baʼaxten tu beetaj Dios jujunpʼéel baʼaloʼob, wa baʼaxten ku chaʼik u yúuchloʼob. Yaan máax jeʼel u kaxtik bix u yoksik ta tuukuleʼ Dioseʼ kʼasaʼan yéetel kʼaas baʼax ku beetik. ¿Jeʼel wa a páaʼtik a wuʼuy baʼax ken u yaʼal Dioseʼ? Táanileʼ maʼalob ka a tukult wa a kʼaj Dios tubeel. Tukle: «¿In wojel wa bukaʼaj baʼaloʼob maʼalobtak tsʼoʼok u beetik tin woʼolal?».

Wa tsʼoʼok a jach muʼyajeʼ maʼ xaaneʼ jeʼel a tuklikeʼ maʼ u beetmaj Dios mix baʼal ta woʼolaliʼ. Baʼaleʼ jáan tukult lelaʼ: ¿Jach wa jaaj Dios beet u yúuchultech le baʼaloʼob kʼaastakoʼ? ¿Kux túun le baʼaloʼob maʼalobtakoʼ? ¿Máax tsʼáatech túun? Jeʼex tsʼoʼok k-ilkoʼ «u gobernanteil le yóokʼol kaabaʼ» Satanás, maʼ Jéeobaiʼ (Juan 12:31). Le oʼolaleʼ Satanás beetik u yúuchul yaʼab tiʼ le baʼaloʼob kʼaastak k-muʼyajtikoʼ. Yaan hora xaneʼ k-muʼyaj tumen kʼeban wíinikoʼon wa tumen chéen ku jáan úuchul wa baʼax.

¿Kux túun Dios? ¿Baʼax u beetmaj letiʼ? Ilawil baʼax ku yaʼalik le Bibliaoʼ: «[Dioseʼ] tu beetaj le kaʼanoʼ bey xan le luʼumoʼ», ku yaʼalik xaneʼ «jakʼbeʼen óolal» le bix u beetmiloʼonoʼ, tsʼoʼoleʼ ku yaʼalikeʼ «tu kʼab [Jéeoba] yaan u kuxtal» tuláakal máak (Salmo 124:8, Los Salmos en Maya; 139:14; Daniel 5:23). ¿Baʼax u kʼáat u yaʼal leloʼ?

U kʼáat u yaʼaleʼ chéen tu yoʼolal Dios kuxaʼanoʼon, tumen letiʼ beetmiloʼon (Baʼaxoʼob 17:28). U kʼáat u yaʼal xaneʼ Dios siimiltoʼon le kuxtaloʼ: le jatsʼuts baʼaxoʼob yaan t-baʼpachoʼ, u páajtalil k-uʼuyik yaabilaj, k-uʼuyik u kiʼil wa u kiʼibokil wa baʼax, k-uʼuyik bix yanil le baʼaxoʼob k-machikoʼ bey xan k-uʼuyik jatsʼuts paaxoʼob yéetel kʼaayoʼob (Santiago 1:17). Le baʼax u beetmaj Dios t-oʼolaloʼ, ¿máasaʼ ku yeʼesikeʼ jach tu jaajil juntúul amigo jeʼel u páajtal k-yaabiltik yéetel k-kʼubik k-óol tiʼeʼ?

Yaan máaxeʼ ku tuklik maʼ tu páajtal u jach kʼubik u yóol tiʼ Dios. Wa bey u yúuchultechoʼ maʼ a tuklik. Teʼ xookoʼobaʼ maʼ tu páajtal k-láaj tsolik baʼaxten yaan máaxoʼob aʼalik kʼasaʼan Dios. Baʼaleʼ ¿maʼ wa maʼalob ka maas kaanbalnakech tiʼ Diosiʼ? * Wa ka beetkeʼ yaan a wojéeltik u jaajil yoʼolal Dios. Letiʼeʼ maʼ kʼasaʼaniʼ. U jaajileʼ «Dioseʼ yaabilaj» (1 Juan 4:8).