Smita, * juntúul koʼolel tu noj kaajil Daca (Bangladés) yaan 35 jaʼab tiʼeʼ, ojéelaʼan jach uts u modos yéetel x-meeyjil. U yaabiltmaj xan u yíicham yéetel ku yáantik uláakʼ máakoʼob u natsʼubaʼob tiʼ Dios. Baʼaleʼ Smitaeʼ téek kʼojaʼanchajeʼ ka kíimi. ¡Bukaʼaj wal yaachajik u yóol u láakʼtsiloʼob yéetel u amigoʼobeʼ! Maases tumen chéen junpʼéel semana máan ka kíimi.

James (yeims) yéetel u yataneʼ yaan kex 35 jaʼab tiʼob. Letiʼobeʼ jach utsoʼob xan. Juntéenjeakeʼ binoʼob u xíimbalt u amigoʼob kajaʼanoʼob jáal jaʼ tu chikʼinil Estados Unidos. Baʼaleʼ maʼ kaʼa suunajoʼob tu yotochoʼob teʼ Nueva Yorkoʼ. ¿Baʼaxten? Kíimoʼob tiʼ junpʼéel accidente teʼ bejoʼ. U láakʼtsiloʼob yéetel u yéet meyajoʼobeʼ jach muʼyajnajoʼob tu yoʼolal le baʼax úuchoʼ.

Jeʼex k-ilkoʼ tuláakal tuʼux yaan muʼyajil yéetel kʼasaʼanil. Teʼ baʼateltáambaloʼoboʼ maʼ chéen soldadoʼob ku kíimloʼobiʼ. Máakoʼob minaʼan u siʼipiloʼobeʼ ku yoklaʼaloʼob, ku kíimsaʼaloʼob wa ku beetaʼal loob tiʼob. Tiʼ jejeláas kaajoʼobeʼ mejen paalal yéetel nukuch máakoʼobeʼ ku kíimloʼob tiʼ accidenteʼob wa ku tsaʼayal kʼaakʼas kʼojaʼanil tiʼob, kex óotsiloʼob wa kex ayikʼaloʼob. Tuláakal tuʼux ku yúuchul yaayaj baʼaloʼob, jeʼex chak ikʼaloʼob yéetel uláakʼ nukuch loobiloʼob. Tsʼoʼoleʼ yaʼab tuʼuxeʼ ku pʼektaʼal máak yéetel ku beetaʼal baʼax maʼ unajiʼ. Maʼ xaaneʼ tak teech tsʼoʼok a muʼyaj yoʼolal le baʼaloʼobaʼ.

Le oʼolal maʼalob ka k-beet le kʼáatchiʼobaʼ:

• ¿Baʼaxten ku yúuchul baʼal kʼaas tiʼ le utsul máakoʼoboʼ?

• ¿Dios wa beetik u muʼyajoʼob?

• ¿Chéen wa ku yúuchul baʼal kʼaas, wa wíinik kaxtik?

• ¿Táan wa k-boʼotik le baʼaxoʼob kʼaastak k-beetmaj úuchjeakiloʼ?

• Wa nojoch u páajtalil Dioseʼ, ¿baʼaxten túun maʼ tu kanáantik le utsoʼoboʼ?

• ¿Yaan wa u xuʼulul le muʼyajil yéetel le kʼasaʼaniloʼ?

Utiaʼal k-ojéeltikeʼ táanileʼ kʼaʼabéet k-núukik le kaʼapʼéel kʼáatchiʼobaʼ: ¿Baʼaxten ku yúuchul baʼaloʼob kʼaastak? ¿Baʼax ken u beet Dios?