A paalaloʼobeʼ jeʼel u kanik u yaabiltoʼob Dios wa ka u yojéeltoʼob jach tu jaajil kuxaʼaneʼ. Unaj xan u yojéeltikoʼobeʼ yaabiltaʼanoʼob tumen Dios, tsʼoʼoleʼ kʼaʼabéet u kʼaj óoltikoʼob (1 Juan 4:8). Utiaʼal u kʼaj óoltikoʼob Dioseʼ unaj u yojéeltikoʼob baʼaxten tu beetaj wíinik, baʼaxten ku chaʼik k-muʼyaj yéetel baʼax ken u beet t-oʼolal. (Xok Filiposiloʼob 1:9.)

Utiaʼal u kanik a paalal u yaabiltoʼob Dioseʼ, táanil teech unaj a weʼesik a yaabilaj tiʼ Dios. Ken u yiloʼobeʼ yaan u xan beetkoʼob beyoʼ. (Xok Deuteronomio 6:5-7; Proverbios 22:6.)

U Tʼaan Dioseʼ jach yaan u páajtalil (Hebreoʼob 4:12). Le oʼolaleʼ kaʼans tiʼ a paalal le baʼaloʼob maas kʼaʼanaʼantak ku yaʼalik le Bibliaoʼ. Jesuseʼ utiaʼal u kʼuchul tu puksiʼikʼal le máakoʼoboʼ ku beetik kaʼach kʼáatchiʼob, ku yuʼubik baʼax ku núukikoʼob yéetel ku tsoliktiʼob baʼax ku yaʼalik le Kiliʼich Tsʼíiboʼ. (Xok Lucas 24:15-19, 27, 32.)

Le tsikbaloʼob yaan teʼ Bibliaoʼ jeʼel xan u yáantik a paalal u yaabiltoʼob Dioseʼ, tumen ku yeʼeskoʼob bix úuchik u biskuba Dios yéetel le máakoʼob úuchjeakiloʼ. Utiaʼal a tsikbaltik tiʼ a paalaleʼ, jeʼel u páajtal u meyajtech le jóoʼsaʼaniloʼob tsʼaʼan Internet teʼ www.mt1130.com/yua. (Xok 2 Timoteo 3:16.)