Walajki kex tres mil jaʼaboʼobaʼ, juntúul poetaeʼ tu tsʼíibtaj: «Kin kiʼikiʼtʼantikech [...] tumen jakʼbeʼen óolal le [bix a beetmilenoʼ]» (Salmo 139:14). ¿Máasaʼ ku jaʼakʼal u yóol máak ken u yil bix u wíiniktal juntúul chaambal chéen tiʼ junpʼéel chan celula? Yaʼab máakeʼ ku creertik yaan Máax beetmil tuláakal le baʼaloʼob kuxaʼanoʼoboʼ. (Xok Salmo 139:13-17; Hebreoʼob 3:4.)

Le Máax beet le kaʼan yéetel le Luʼumaʼ letiʼ xan beet u yantal le kuxtaloʼ (Salmo 36:9). Letiʼeʼ tsʼoʼok u beetik ka kʼaj óoltaʼak tumen wíinik. (Xok Isaías 45:18.)

Le bix u meyaj k-wíinkliloʼ chíikaʼan tiʼ bix u meyaj u wíinklil le baʼalcheʼoboʼ. ¿Baʼaxten? Tumen juntúuliliʼ Máax beet tuláakal le baʼax kuxaʼan way Luʼumoʼ. Baʼaleʼ wíinikeʼ tiʼ luʼum beetaʼabiʼ maʼ tiʼ baʼalcheʼ u taaliʼ. (Xok Génesis 1:24; 2:7.)

Yaan kaʼapʼéel baʼax jelaʼankúuntikoʼon tiʼ le baʼalcheʼoboʼ. Yáaxeʼ ku béeytal k-kʼaj óoltik, k-yaabiltik yéetel k-respetartik le Máax beetmiloʼonoʼ. U kaʼapʼéeleʼ beetaʼaboʼon utiaʼal k-kuxtal mantatsʼ, baʼaleʼ le baʼalcheʼoboʼ maʼatech. ¿Baʼaxten túun k-kíimil? Tumen le yáax wíinikoʼ maʼ tu yóotaj u yuʼub u tʼaan Diosiʼ. (Xok Génesis 1:27; 2:15-17.)