ANTICRISTOEʼ junpʼéel tʼaan úuch káajak u meyaj utiaʼal u yúuchul tʼaan tiʼ le papaʼob yanoʼob Romaoʼ bey xan tiʼ peliculaʼob. Le oʼolal yaʼab máak tuklik: ¿Máax le anticristooʼ? ¿Kʼaʼabéet wa k-ojéeltik máaxiʼ? Maʼalob ka k-ojéelte, tumen teʼ Bibliaoʼ cinco u téenel ku chíikpajal le tʼaanaʼ.

Ichil le máaxoʼob tsʼíibt le Bibliaoʼ chéen apóstol Juan tu chʼaʼchiʼitaj le tʼaan anticristooʼ. Tu yáax cartaeʼ tu yaʼalaj: «Lelaʼ letiʼe u tsʼoʼokbal le kʼiinoʼobaʼ, yéetel jeʼex a wuʼuymileʼexoʼ yaan u taal le anticristooʼ, baʼaleʼ beoraaʼ yaʼab anticristoʼob tsʼoʼok u chíikpajloʼob; tu yoʼolal lelaʼ k-ojel tiʼ yanoʼon tu tsʼoʼokbal le kʼiinoʼobaʼ. Letiʼobeʼ náachchajoʼob tiʼ toʼon, baʼaleʼ maʼ beyoʼob kaʼach jeʼex toʼoneʼ; tumen wa beyoʼob jeʼex toʼoneʼ jeʼel kaʼach u pʼáatloʼob t-éeteleʼ. Baʼaleʼ náachchajoʼob, utiaʼal beyoʼ ka jach chíikpajak maʼ tuláakloʼob beyoʼob jeʼex toʼoneʼ [...]. ¿Máax le ku tuus wa maʼ letiʼe máax ku yaʼalik de ke Jesuseʼ maʼ letiʼe Cristooʼ? Lelaʼ letiʼe anticristoaʼ: le máax u pʼekmaj le Taataoʼ bey xan le Paaloʼ» (1 Juan 2:18, 19, 22).

Jeʼex k-ilkoʼ apóstol Juaneʼ tu yaʼalaj «yaʼab anticristoʼob» yaan. Leloʼ ku yeʼesikeʼ le anticristooʼ maʼ chéen juntúul máakiʼ. Según Juaneʼ ichil le anticristooʼ táakaʼan le máaxoʼob ku kʼiʼitbeskoʼob tuusoʼoboʼ. Ku yaʼalikoʼobeʼ Jesuseʼ maʼ Cristoiʼ yéetel maʼ tu chaʼikoʼob ka ojéeltaʼak u jaajil yoʼolal Jesucristo yéetel u Taata. Le anticristo túunoʼ letiʼe máaxoʼob wa grupoʼob ku yaʼalikoʼob letiʼob le Cristooʼ wa ku yaʼalikoʼob túuxtaʼanoʼob tumen Cristo, baʼaleʼ chéen ku tuskoʼob le máakoʼob utiaʼal ka okokoʼob ichiloʼoboʼ. Juaneʼ ku yaʼalikeʼ le máakoʼobaʼ «náachchajoʼob tiʼ toʼon», u kʼáat u yaʼaleʼ maʼ tu yóotaj u kʼamoʼob le kaʼansajoʼob yaan teʼ Bibliaoʼ. K-ilik túuneʼ le máakoʼobaʼ yaniliʼob desde tu kʼiiniloʼob Juaneʼ. Maʼ xaaneʼ «u tsʼoʼokbal le kʼiinoʼob» tu yaʼalaj Juanoʼ letiʼe años maʼ yaʼab u bin u kíimil le u tsʼook apostoloʼ.

¿Baʼax uláakʼ tu yaʼalaj Juan yoʼolal le anticristooʼ? Tu yaʼaleʼ yaan u kaʼansik uláakʼ baʼaloʼob maʼ jaajtak minaʼan teʼ Bibliaoʼ. Tu tsʼíibtaj: «Baʼaleʼ jeʼel baʼalak kʼuben tʼaanil maʼ tu kʼamik Jesuseʼ, maʼ tiʼ Dios u taaliʼ. U jaajileʼ leloʼ letiʼe kʼuben tʼaan aʼalaʼabteʼex kun taasbil tumen le anticristooʼ, yéetel beoraaʼ tiʼ yaan teʼ yóokʼol kaabaʼ» (1 Juan 4:2, 3). Le ka tu tsʼíibtaj uláakʼ cartaeʼ tu yaʼalaj: «Yaʼab máakoʼob ku tuusoʼob tsʼoʼok u chíikpajloʼob teʼ yóokʼol kaabaʼ; letiʼobeʼ maʼ tu kʼamkoʼob wa Jesucristoeʼ taal bey wíinikeʼ. Le máax beetik lelaʼ letiʼe máax ku tuusoʼ yéetel letiʼe anticristooʼ» (2 Juan 7). Chíikaʼan u yilaʼaleʼ le anticristooʼ letiʼe máaxoʼob kʼiʼitbesik tuusoʼob yoʼolal Jesucristo bey xan yoʼolal le baʼaxoʼob tu kaʼansoʼ.

Le yaʼab u bin u tsʼíibtik Juan u cartaʼobeʼ, Jesuseʼ tu yaʼalaj tiʼ u disipuloʼob: «Kanáantabaʼex tiʼ  le maʼ jaajil profetaʼob ku taaloʼob ta wiknaleʼex bey tamanoʼobeʼ, baʼaleʼ u jaajileʼ loboʼob maʼatech u yuʼubik u naʼajtaloʼob» (Mateo 7:15). Apóstol Pablo xaneʼ tu yaʼalaj tiʼ le cristianoʼob yaan Tesalónicaoʼ: «Mix máak ka u náachkunteʼex tiʼ le bejoʼ, tumen le kʼiin jeʼeloʼ maʼ kun taal wa maʼ yáax táanil yaan máaxoʼob kun líikʼloʼob tu contra Diosiʼ, yéetel wa maʼ yáax táanil yaan u yeʼesaʼal máax le ku bin tu contra u ley Diosoʼ; lelaʼ u paal le xuʼulsajiloʼ» (2 Tesalonicailoʼob 2:3).

Lelaʼ ku yeʼesikeʼ desde teʼ yáax siglooʼ yaniliʼ maʼ jaajil profetaʼob yéetel máaxoʼob maʼ tu kaʼanskoʼob u jaajileʼ. Letiʼobeʼ chéen u kʼáat kaʼach u xuʼulsoʼob u fe le jaajil cristianoʼoboʼ. Le máaxoʼob kʼiʼitbes tuusoʼob yoʼolal Cristo bey xan yoʼolal baʼax tu kaʼansoʼ táakaʼanoʼob ichil le «anticristo» tu yaʼalaj Juanoʼ. Le ka tu yaʼalaj Pablo «u paal le xuʼulsajiloʼ», tu yeʼesaj baʼax ku tuklik Jéeoba yoʼolal le anticristooʼ.

¿Tak wa bejlaʼa yaan le anticristooʼ? Jaaj, tumen láayliʼ yaan máaxoʼob ku tsʼáaikubaʼob tu contra Jesús yéetel tu contra le baʼaxoʼob tu kaʼansoʼ. Letiʼobeʼ u yóoliliʼ u kaʼanskoʼob baʼaloʼob maʼ jaajtak tu yoʼolal Jéeoba, le Taataoʼ, bey xan yoʼolal Jesús, le Hijooʼ. Koʼox ilik kaʼapʼéeliʼ.

Le Iglesiaʼoboʼ úuch káajak u kaʼanskoʼob le Trinidadoʼ. Ku yaʼalikoʼobeʼ le Taata yéetel le Hijooʼ juntúuliliʼob. Jeʼel u páajtal u yaʼalaʼal anticristo tiʼ le Iglesiaʼobaʼ tumen maʼ tu kaʼanskoʼob u jaajil yoʼolal Dios yéetel Jesusiʼ. Yoʼolal lelaʼ yaʼab máak maʼ tu páajtal u kuxtal jeʼex tu kaʼansil Jesucristooʼ mix u natsʼkuba tiʼ Dios jeʼex u yaʼalik le Bibliaoʼ (1 Corintoiloʼob 11:1; Santiago 4:8).

Le Iglesiaʼoboʼ tsʼoʼok xan u luʼskoʼob u kʼaabaʼ Jéeoba ichil le Biblia ku meyajtiʼoboʼ yéetel ku tʼaanoʼob kʼaas tiʼ le máaxoʼob tsʼáaik u kʼaabaʼ Jéeoba teʼ Bibliaoʼ. Jach kʼaas baʼax ku beetkoʼob, tumen ka yáax tsʼíibtaʼab le Bibliaoʼ 7,000 u téenel ku chíikpajal u kʼaabaʼ Jéeobaiʼ. Tu culpa le Iglesiaʼoboʼ yaʼab máax maʼ u yojel máax jach tu jaajil Diosiʼ.

Baʼaleʼ u yojéeltaʼal u kʼaabaʼ Dios, Jéeobaeʼ, tsʼoʼok u yáantaj utiaʼal u natsʼkuba yaʼab máak tu yiknal. Bey úuch tiʼ Richardoʼ. Letiʼeʼ maʼ tu tuʼubsik ka tsikbalnaj yéetel kaʼatúul u j-jaajkunajoʼob Jéeoba. Tu yaʼalaj: «Tu yeʼesoʼobten teʼ Bibliaoʼ u kʼaabaʼ Dioseʼ Jéeoba. Jaʼakʼ in wóol ka tin wojéeltaj yaan u kʼaabaʼ Dios». Desde teʼ súutukoʼ káaj u tsʼáaik ichil u kuxtal le baʼax tu kanaj teʼ Bibliaoʼ. Tu tsʼookeʼ Richardeʼ tu yaʼalaj: «In wojéeltik u kʼaabaʼ Dioseʼ tu yáanten in natsʼinba tu yiknal».

Le anticristooʼ úuch joʼopʼok u pʼatik ich «éeʼjochʼeʼenil» u millonesil máakoʼob. Baʼaleʼ wa ka k-xok le Bibliaoʼ yaan k-ilik máax jach tu jaajil le anticristooʼ, beyoʼ maʼ tun seguer u tuskoʼon (Juan 17:17).