Yaʼab máakeʼ ku tuklikeʼ chéen kunel u orar, tumen mix máak uʼuyik. Uláakʼeʼ ku orar baʼaleʼ ku tuklikeʼ mix bikʼin kun núukbiltiʼ. Juntúul ateoeʼ tu beetaj bey ku creertik Dioseʼ ka orarnaji: «Aʼalten wa baʼax, kex chéen tin xikin». Pero ku yaʼalikeʼ Dioseʼ «pʼáat bey tootchajaʼaneʼ».

Le Bibliaoʼ ku yaʼalikeʼ jach tu jaajil ku yuʼubaʼal k-oración, wa k-payalchiʼ, tumen Dios. Teʼ Bibliaoʼ tsʼíibtaʼan baʼax aʼalaʼab tiʼ junpʼéel úuchben kaaj: «[Dioseʼ] bíin u chʼaʼtech óotsilil le ken u yuʼub táan a wawat táan [a] kʼáatik áantaj tiʼ, chéen pʼel u yuʼubikeʼ, bíin u núuke» (Isaías 30:19). Tuláakʼ tekstoeʼ ku yaʼalik: «Yuumtsileʼ [...] ku kʼamik yéetel utsil óolal u payalchiʼ le [toj u] kuxtaloʼoboʼ» (Proverbios 15:8).

Le Bibliaoʼ ku yaʼalik xan bix uʼuyaʼabik jujunpʼéel oracionoʼob. Junpʼéel tekstoeʼ ku yaʼalikeʼ «sen kʼáat óolnaj [Jesús] yéetel tuláakal u puksiʼikʼal tiʼ le Máax jeʼel u páajtal u salvartik tiʼ le kíimiloʼ; [...] tsʼoʼoleʼ chʼenxikintaʼab[i]» (Hebreoʼob 5:7). Yaan uláakʼ tekstoʼob beyoʼ, jeʼex Daniel 9:21 yéetel 2 Crónicas 7:1.

¿Baʼaxten túun yaan máakoʼobeʼ ku tuklikoʼob mix máak uʼuyik le oracionoʼ? Wa k-kʼáat ka uʼuyak k-oración tumen Jéeoba * Dioseʼ, kʼaʼabéet k-orar chéen tiʼ letiʼ, tiʼ mix máak uláakʼ. Tsʼoʼoleʼ Jéeobaeʼ ku yaʼalikeʼ le bix k-orar yéetel le baʼax k-kʼáatkoʼ kʼaʼabéet «jeʼex uts tu tʼaaneʼ». Wa k-beetik beyoʼ «letiʼeʼ yaan u yuʼubik» (1 Juan 5:14). Utiaʼal túun u yuʼubaʼal k-oracioneʼ kʼaʼabéet k-kʼaj óoltik Dios yéetel k-beetik baʼax ku yaʼalik.

Yaʼab máax u yojleʼ le oracionoʼ maʼ chéen junpʼéel baʼal suuk u beetaʼal teʼ religionoʼoboʼ, baʼaxeʼ jach tu jaajil ku yuʼubaʼal yéetel ku núukaʼal tumen Dios. Isaak, kajaʼan Keniaeʼ, ku yaʼalik: «Orarnajen utiaʼal ka áantaʼaken in naʼat le Bibliaoʼ. Chéen ka tin wilaj u náatsʼal juntúul máakeʼ ka tu yaʼalajten jeʼel u yáantkeneʼ». Hilda, kajaʼan Filipinaseʼ, taakchaj u pʼatik le chamaloʼ. Yaʼab u téenel tu intentarnaj, pero maʼ béeychajiʼ. Ka aʼalaʼabtiʼ tumen u yíicham: «¿Baʼaxten maʼ ta orar tiʼ Dios utiaʼal u yáantkech?». Ka tsʼoʼok u orareʼ, Hildaeʼ tu yaʼalaj: «Péeknaj in wóol ka tin wilaj bix tu yáantilen Dios. Pʼáat minaʼanten u ganasil in tsʼuʼutsʼ. Tu tsʼookeʼ béeychaj in pʼatik le chamaloʼ».

Wa le baʼax ka kʼáatik maʼ tu bin tu contra baʼax u kʼáat Diosoʼ, letiʼeʼ jach jeʼel u yáantkecheʼ.