U semillail le lool diente de leónoʼ junpʼéel tiʼ le semillaʼob jach ku náachtal u bisaʼaloʼob tumen le iikʼoʼ. Le kéen jaʼatsʼak le lool tumen le iikʼoʼ le semillaʼoboʼ ku káajal u bisaʼaloʼob tumen le iikʼ bey jeʼex junpʼéel chan paracaídaseʼ. Kex bey taʼaytak u jáayal teʼ luʼumoʼ jujunpʼéel semillaʼobeʼ kéen bisaʼakoʼob tumen iikʼeʼ kex junpʼéel kilómetro ku náachtaloʼob wa maas tiʼ. ¿Baʼaxten maʼ tu séeb jáayal? Maʼ úucheʼ ilaʼabeʼ kantéen u maas maʼalobil tiʼ junpʼéel paracaídas.

 Tuukulnen tiʼ lelaʼ: Le kéen láakak cada junpʼéel tiʼ le semillaʼob tiʼ le chan looloʼ ku yilaʼal bey chʼuyukbal tiʼ junpʼéel chan cheʼ (pappus) yaan mejen baʼaloʼob bey tsoʼots tu puntaeʼ. Le baʼax bey mejen tsoʼotsoʼoboʼ ku meyajoʼob bey junpʼéel paracaídas utiaʼal u bisaʼal le semilla tumen le iikʼoʼ.

 Pero yaan uláakʼ baʼax áantik volar, le táan u bisaʼal tumen le iikʼoʼ ku káajal u pirinsuut jeʼex u beetik junpʼéel mosóneʼ. Uláakʼ baʼax áantik utiaʼal maʼ u séeb lúubul luʼumeʼ letiʼe u páajtalil u pʼuʼukik iikʼoʼ. Le iikʼ ku pʼuʼukikoʼ le áantik utiaʼal u pirinsuut yéetel utiaʼal maʼ u jáan jáayal luʼum.

 Tsʼoʼoleʼ le u chan cheʼil le semillaoʼ maʼ tu jáan chʼuʼulul kex ka kʼáaxak jaʼ tumen yáalal ku beetik le jaʼ tiʼoʼ. Le chan cheʼaʼ maas maʼalob tiʼ junpʼéel paracaídas yéetel maas jejetsʼkil u bin. Jach sáal, le oʼolal chéen chʼaʼabil u bisaʼal tumen iikʼ.

 Le científicoʼoboʼ táan u yilkoʼob wa jeʼel u béeytal u beetkoʼob mejen dronoʼob sáaltakoʼob jeʼex le diente de leónoʼ utiaʼal ka séebchajak u bisaʼaloʼob tumen iikʼ.

 Techeʼ, ¿bix a wilik? Le bix u náachtal u semillail le diente de leónoʼ, ¿chéen wa bey anchajikoʼ wa yaan máax beete?