Le Bibliaoʼ ku yaʼalikeʼ le kéen k-síi wa baʼaxeʼ unaj k-beetik yéetel kiʼimak óolal, beyoʼ maʼ chéen le máax kʼamik le siibal ku kiʼimaktal u yóoloʼ tak toʼon (Proverbios 11:25; Lucas 6:​38). Jesúseʼ tu yaʼalaj: «Maas ku taasik kiʼimak óolal u tsʼaʼabal wa baʼax ke u kʼaʼamal wa baʼax» (Hechos 20:35).

•  ¿Baʼax oʼolal unaj k-síik wa baʼax?

•  ¿Baʼax oʼolal maʼ unaj k-síik wa baʼaxiʼ?

•  Tekstoʼob ku tʼaanoʼob yoʼolal u siʼibil wa baʼax

 Wa t-puksiʼikʼal ku jóokʼol k-síik wa baʼaxeʼ ku taasik utsil. Le Bibliaoʼ ku yaʼalik: «Cada juntúuleʼ u beet jeʼex tsʼoʼok u chʼaʼtuklik ichil u puksiʼikʼaleʼ, maʼ yéetel kʼuuxiliʼ mix bey táan u obligartaʼaleʼ, tumen Dioseʼ u yaabiltmaj le máax ku síik wa baʼax yéetel kiʼimak óolaloʼ» (2 Corintios 9:7).

 Le kéen k-síi wa baʼaxeʼ Dioseʼ u kʼáat ka síijik t-puksiʼikʼal k-beetik (Santiago 1:​27). Le kéen k-áant le máaxoʼob óotsiloʼoboʼ táan k-múul meyaj yéetel Dios, tsʼoʼoleʼ letiʼeʼ yaan u boʼotiktoʼon le utsil k-eʼesik tiʼ u maasiloʼ (Proverbios 19:17). Wa k-beetik beyoʼ le Bibliaoʼ ku yaʼalikeʼ Dioseʼ yaan xan u bendecirkoʼon (Lucas 14:12-​14).

 Wa chéen utiaʼal k-kaxtik k-utsil. Por ejemploeʼ:

•   Chéen utiaʼal ka ilaʼakoʼon tumen u maasil (Mateo 6:2).

•   Utiaʼal u tsʼaʼabaltoʼon wa baʼax (Lucas 14:12-14).

•   Utiaʼal k-manik k-salvación (Salmo 49:6, 7).

 Utiaʼal u beetaʼal baʼax maʼ uts tu tʼaan Diosiʼ. Por ejemploeʼ maʼ unaj k-síik taakʼin tiʼ wa máax utiaʼal u apostar, u káaltal wa utiaʼal u drogarkubaiʼ (1 Corintios 6:​9, 10; 2 Corintios 7:1). Maʼ xan unaj k-síik taakʼin tiʼ máax maʼ tu meyaj chéen tumen maʼakʼóoliʼ (2 Tesalonicenses 3:10).

 Wa después maʼ tu páajtal k-tsʼáaik baʼax kʼaʼabéet tiʼ k-familiaiʼ. Le Bibliaoʼ ku yaʼalikeʼ u poolil le familiaoʼ unaj u tsʼáaik tuláakal baʼax kʼaʼabéet tiʼ u familia (1 Timoteo 5:8). Táanil kʼaʼabéet u tsʼáaik baʼax kʼaʼabéettiʼob ke tiʼ u maasil máakoʼob. Jesúseʼ tu yaʼaleʼ maʼ maʼalob ka u yaʼal máak u kʼubmaj tiʼ Dios tuláakal le baʼaxoʼob yaantiʼ chéen utiaʼal maʼ u tsʼáaik le baʼaxoʼob kʼaʼabéet tiʼ u taataʼob tsʼoʼok u chʼíijloʼoboʼ (Marcos 7:​9-​13).