Le Bibliaoʼ ku yaʼalikeʼ letiʼe taatatsiloʼob unaj u tsikbaltik tiʼ u paalaloʼob le baʼaloʼob yaan yil yéetel sexooʼ. Yaʼab taatatsiloʼobeʼ tsʼoʼok u yáantaʼaloʼob tumen le consejoʼobaʼ:

•   Maʼ a suʼlaktal. Teʼ Bibliaoʼ ku yúuchul tʼaan tiʼ le sexooʼ bey xan tiʼ u partes juntúul xiib wa juntúul koʼolel. Dioseʼ tu yaʼalaj tiʼ u kaajil Israeleʼ tak tiʼ «le mejen paalaloʼob» kʼaʼabéet u tsoʼolol baʼax u kʼáat u yaʼal le baʼaloʼobaʼ (Deuteronomio 31:12; Levítico 15:2, 16-19). Le oʼolaleʼ le kéen tʼaanakech yéetel a paalal yoʼolal le relaciones sexuales wa yoʼolal u xiibil wa u x-chʼuupil máakeʼ maʼ unaj a suʼlaktal a waʼaltiʼ jach bix u kʼaabaʼobiʼ. Beyoʼ a paalaleʼ maʼ túun suʼlaktaloʼob tʼaan ta wéetel tiʼ le baʼaloʼobaʼ.

•   Jujunpʼíitil ka a tsoltiʼob. Maas maʼalob ka a tsol tiʼ a paalal baʼaloʼob yaan yil yéetel sexualidad jeʼex u bin u nojochtaloʼoboʼ, maʼ a páaʼtik u táankelemtaloʼob wa u x-lóoʼbayantaloʼob utiaʼal ka a láaj tsoltiʼobiʼ (1 Corintios 13:11).

•   Kaʼanstiʼob baʼax ku yaʼalik Dios yoʼolal le sexualidadoʼ. Teʼ escuelaʼoboʼ ku tsoʼolol tiʼ le paalaloʼob baʼaloʼob yaan yil yéetel le sexooʼ. Chéen baʼaleʼ le Bibliaoʼ ku yaʼalikeʼ le taatatsiloʼoboʼ unaj u kaʼansik tiʼ u paalaloʼob baʼax le relaciones sexualesoʼ yéetel baʼax ku tuklik Dios tu yoʼolal (Proverbios 5:1-23).

•   Uʼuy baʼax ku yaʼaliktech a paalal. Maʼ u jaʼakʼal a wóol mix a jáan tuukul kʼaas tiʼ a paalal wa ku kʼáatkoʼobtech baʼaloʼob yaan u yil yéetel le relaciones sexualesoʼ. Maas maʼalob ka a beet jeʼex u yaʼalik le Bibliaoʼ uʼuy baʼax ku yaʼalaʼaltech, pero maʼ a séeb núukik (Santiago 1:19).

Bix jeʼel a kanáantik a paalal tiʼ le máaxoʼob taak u abusaroʼob tiʼ letiʼoboʼ

•   Informartaba. Ojéelt baʼax suuk u beetik le máakoʼob ku abusaroʼob tiʼ le mejen paalaloʼoboʼ (Proverbios 18:15, ilawil le xook 32 tiʼ le yáax libro ich español Lo que los jóvenes preguntan. Respuestas prácticas).

•   Kanáant a paalal. Maʼ a chaʼik u kanáantaʼal a paalal tumen chéen jeʼel máaxakeʼ. Maʼalob ka a wil wa jeʼel u páajtal a confiar tiʼ le máax kun kanáantkoʼoboʼ. Tsʼoʼoleʼ ilawil maʼ a chaʼik u beetik «chéen jeʼel baʼaxak u kʼáat» a paalaloʼoboʼ (Proverbios 29:15).

•   Kaʼanstiʼob maʼ unaj u beetkoʼob jeʼel baʼaxak ka aʼalaʼaktiʼobeʼ. Le paalaloʼoboʼ unaj u yuʼubikoʼob u tʼaan u taataʼoboʼ (Colosenses 3:20). Wa ka kaʼansiktiʼob mantatsʼ kʼaʼabéet u yuʼubikoʼob u tʼaan jeʼel máaxakeʼ maʼ xaaneʼ jeʼel tak u violartaʼaloʼobeʼ. Le taatatsiloʼob meyajtik Diosoʼ jeʼel u páajtal u yaʼalikoʼob tiʼ u paalaloʼob lelaʼ: «Wa yaan máax ku yaʼaliktech ka a beet baʼax kʼaas tu táan Dioseʼ maʼ a beetik» (Hechos 5:29).

•   Ensayart tu yéeteloʼob bix jeʼel u kanáantkubaʼobeʼ. Kaʼans tiʼ a paalaloʼobeʼ wa tu juunal yaniloʼob yéetel yaan máax taak u abusar tiʼ letiʼobeʼ kʼaʼabéet u yaʼalikoʼob lelaʼ: «¡Maʼ a machken! ¡Yaan in takik a pool tiʼ in papáʼob!». Tsʼoʼoleʼ aʼaltiʼobeʼ tu séebaʼanil kʼaʼabéet u lukʼloʼob tu yiknal. Wa ka ensayar antes tu yéeteloʼobeʼ kéen kʼaʼabéetchajkeʼ yaan u kanik u defendertubaʼob. Taatatsileʼex, maʼ u tuʼubulteʼex mantatsʼ kʼaʼabéet a sen kʼaʼajsikeʼex tiʼ a paalaleʼex bix unaj u kanáantkubaʼob (Deuteronomio 6:7).