Jameseʼ ku yaʼalik: «Yaan kʼiineʼ kin kanáantik baʼax kin waʼalik, baʼaleʼ yaan kʼiin xaneʼ kin waʼalik baʼaloʼob minaʼan u cuentail».

 Marieeʼ ku yaʼalik: «Wa chiʼichnakeneʼ yaʼab baʼaloʼob kin waʼalik, wa maʼ chiʼichnakeneʼ láayliʼ maʼ tu xuʼulul in tʼaaneʼ. Jeʼel bixakeʼ talam in makik in chiʼ».

 Le Bibliaoʼ ku yaʼalik: «U yaakʼ wíinikeʼ junpʼéel kʼáakʼ», tsʼoʼoleʼ ku yaʼalik xan: «¡Chéen yéetel junpʼéel chan kʼáakʼeʼ ku páajtal u tʼaʼabal junpʼéel nojoch kʼáax!» (Santiago 3:​5, 6). ¿Mantatsʼ wa ku yantaltech problemaʼob yoʼolal baʼaxoʼob ka waʼalik? Wa bey u yúuchultechoʼ jeʼel u yáantkech le baʼax ku yaʼalik le xookaʼ.

•  ¿Baʼaxten kin waʼalik baʼaloʼob maʼ unajiʼ?

•  Controlart a waakʼ

•  Baʼax ku yaʼalik uláakʼ paalaloʼob

 Le kʼebanoʼ. Le Bibliaoʼ ku yaʼalik: «Tuláakloʼon k-tʼóochpajal yaʼab u téenel. Wa yaan juntúul máak maʼ tu tʼóochpajal ichil u tʼaaneʼ, u kʼáat u yaʼaleʼ juntúul máak utsil chúukaʼan» (Santiago 3:2). Tu yoʼolal le kʼebanoʼ séebaʼan u yaʼalik máak baʼaloʼob maʼ unajiʼ.

 Annaeʼ ku yaʼalik: «Chéen kunel ka in waʼal kin controlartik baʼax kin waʼalik tumen in wojel kʼebanen».

 U sen tʼaan máak. Le Bibliaoʼ ku yaʼalik: «Le máax yaʼab u tʼaaneʼ, yaʼab u siʼipil» wa yaʼab u yaʼalik baʼax maʼ maʼalobiʼ (Proverbios 10:19). Le máaxoʼob yaʼab u tʼanoʼob yéetel maʼ suuk u yuʼubikoʼob baʼax ku yaʼalik u maasileʼ maas séebaʼan jeʼel u beetik u yaatal u yóol wa máax yoʼolal bix u tʼaaneʼ.

 Juliaeʼ ku yaʼalik: «Le máaxoʼob maas yaan u naʼatoʼoboʼ maʼ letiʼe maas yaʼab u tʼaanoʼoboʼ. Jesuseʼ letiʼe máax maas yaan u naʼat tsʼoʼok u yantal way Luʼumeʼ chéen baʼaleʼ yaan horaeʼ tu yilaj maas maʼalob maʼ u yaʼalik mix baʼal».

 U pʼaʼastaʼal máak. Le Bibliaoʼ ku yaʼalik: «Yaan máaxoʼob ku beetkoʼob loob yéetel u tʼaanoʼob» (Proverbios 12:18). Yaan horaeʼ suuk u tʼaan máak chéen minaʼan u cuentail. Yaan máaxeʼ ku yaʼalikeʼ chéen bin táan u báaxal, baʼaleʼ u jaajileʼ táan u pʼaʼastik u maasil. Chéen baʼaleʼ leloʼ junpuliʼ maʼ utsiʼ. Le Bibliaoʼ ku yaʼalik ka k-kanáantba tiʼ «poochʼil, bey xan tuláakal baʼax jeʼel u beetik loobeʼ» (Efesoiloʼob 4:​31).

 Oksanaeʼ ku yaʼalik: «Teneʼ séeb in tʼaan yéetel jatsʼuts in wilik in beetik u cheʼej u maasil, baʼaleʼ yaan horaeʼ yoʼolal baʼax kin waʼalikeʼ kin pʼaʼastik u maasil yéetel ku náachtaloʼob tiʼ teen».

 U kanik máak u controlart u yaakʼeʼ maʼ chéen chʼaʼabiliʼ, le Bibliaoʼ ku yáantkoʼon utiaʼal ka k-beet lelaʼ. Ilawil baʼax ku yaʼalik le tekstoʼobaʼ:

 «Aʼaleʼex jeʼel baʼaxak a kʼáateʼex ichil a puksiʼikʼaleʼexeʼ, kéen tsʼoʼokkeʼ mak a chiʼex» (Salmo 4:4, Traducción del Nuevo Mundo de las Santas Escrituras).

 Yaan kʼiineʼ maas maʼalob maʼ u yaʼalik máak mix baʼal. Juntúul koʼolel ku kʼaabaʼtik Lauraeʼ ku yaʼalik: «In wojel kéen tsʼíikilnakeneʼ kin waʼalik baʼaloʼob maʼ unajiʼ». Ku yaʼalik xan: «Le oʼolal kéen máanak in kʼuuxileʼ, ku kiʼimaktal in wóol tumen maʼ tin waʼalaj mix baʼaliʼ». Jeʼex k-ilkoʼ u makik u chiʼ máakeʼ ku yáantaj utiaʼal maʼ u yaʼalik baʼax maʼ unajiʼ.

 ‹Le xikinoʼ ku yuʼubik tubeel baʼaxoʼob ku yaʼalaʼal, le chiʼ xanoʼ ku yuʼubik baʼax kiʼ yéetel baʼax maʼ kiʼiʼ› (Job 12:11).

 Le kʼáatchiʼobaʼ jeʼel u yáantkech a wil wa maʼalob le baʼax ken a waʼaloʼ:

•   ¿Jaaj wa le baʼax ken in waʼaloʼ? ¿Ku yeʼesik wa in yaabiltmaj u maasil? ¿Jach kʼaʼabéet wa in waʼalik? (Romailoʼob 14:19).

•   ¿Bix jeʼel in wuʼuyikinba wa tiʼ teen ka aʼalaʼak leloʼ? (Mateo 7:​12).

•   Le baʼax ken in waʼaloʼ, ¿yaan wa u yeʼesik kin respetartik le baʼax ku yaʼalik u maasiloʼ? (Romailoʼob 12:10).

•   ¿Maʼalob wa ka in waʼal teʼ súutukaʼ? (Eclesiastés 3:7).

 «Yéetel kabal óolaleʼ ileʼex u maasil bey maas kʼaʼanaʼanoʼob ke teʼexeʼ» (Filiposiloʼob 2:3).

 Le tekstoaʼ yaan u yáantkech a weʼes yaabilaj tiʼ u maasil. Beyoʼ yaan a tuklik tubeel baʼax ken a waʼale yéetel yaan a controlartik a waakʼ. Kex wa tsʼoʼok a beetik u yaatal u yóol wa máax yoʼolal baʼax ta waʼaleʼ, le kabal óolaloʼ yaan u yáantkech utiaʼal ka a séeb kʼáat perdón (Mateo 5:​23, 24). Tsʼoʼoleʼ ilawil a controlartik baʼaxoʼob ka waʼalik.