«Le Dios áantkoʼon k-páaʼt le baʼax ku taal u kʼiinoʼ ka u beet u sen kiʼimaktal a wóoleʼex yéetel ka u beet u jach yantalteʼex jeetsʼelil tu yoʼolal a fejeʼex tiʼ letiʼ; le páajtalil ku tsʼáaikteʼex le espíritu santooʼ letiʼ ka u yáanteʼex a páaʼteʼex yéetel tuláakal a puksiʼikʼaleʼex» (Romanos 15:13, Túumben Luʼum).

 «Jajal Dios máax tsʼáaiktoʼon alab óolaleʼ, ka u chupeʼex yéetel kiʼimak óolal yéetel jeetsʼel óolal le kéen a woksaj óolteʼexeʼ utiaʼal ka u chupeʼex yéetel alab óolal tu yoʼolal u páajtalil le [espíritu santooʼ]» (Romanos 15:13, Nuevo Testamento de Nuestro Señor Jesucristo ich Maya; túumbenkuntaʼan u tsʼíibil).

 Apóstol Pabloeʼ meyajnajtiʼ le tʼaanoʼobaʼ utiaʼal u yaʼalik tiʼ le sukuʼunoʼoboʼ Dioseʼ yaan u beetik u yantaltiʼob kiʼimak óolal bey xan jeetsʼelil. Le kaʼapʼéel modosoʼobaʼ yaan baʼax u yil yéetel le esperanza ku tsʼáaiktoʼon Diosoʼ bey xan yéetel le páajtalil ku tsʼáaiktoʼon le espíritu santooʼ.

 Koʼoneʼex ilik máakalmáak le esperanza ku tsʼáaiktoʼon Dios teʼ Bibliaoʼ. Romanos 15:4, ku yaʼalik: «Tuláakal le baʼaxoʼob tsʼíibtaʼaboʼob [teʼ Biblia] úuchjeakiloʼ tsʼíibtaʼaboʼob utiaʼal k-kaanbal, utiaʼal beyoʼ ikil u chúukpajal k-óol yéetel ikil u líiʼsaʼal k-óol tumen u Tʼaan Dioseʼ ka k-páaʼt le baʼax ken u tsʼáatoʼon Diosoʼ». Teʼ Biblia xanoʼ k-kanikeʼ de ke Dioseʼ u yaʼalmaj yaan u xuʼulsik tiʼ tuláakal le problemasoʼ, jeʼex le óotsililoʼ, le sen injusticiaʼob ku beetaʼaloʼ, le kʼojaʼaniloʼoboʼ yéetel le kíimiloʼ (Apocalipsis 21:4). Dioseʼ tsʼoʼok u tsʼáaik páajtalil tiʼ Jesús utiaʼal u béeykuntik le baʼaxoʼob u prometermoʼ, le oʼolal jach k-ojel de ke yaan u yantaltoʼon junpʼéel kuxtal maas maʼalob (Romanos 15:12).

 Chéen jeʼel u yantaltoʼon esperanza wa k-confiar tiʼ Jéeobaeʼ. Jeʼex u bin k-maas kʼaj óoltikeʼ bey kun bin u maas nojochtal k-confianza tiʼ letiʼoʼ (Isaías 46:10; Tito 1:2). Le máaxoʼob jach ku creerkoʼob le promesaʼob yaan teʼ Bibliaoʼ kex yaantiʼob problemaseʼ kiʼimak u yóoloʼob yéetel yaantiʼob jeetsʼelil (Romanos 12:12).

 Le jeetsʼelil, le kiʼimak óolal yéetel le esperanzaoʼ jujunpʼéel tiʼ le modos ku taal tiʼ le espíritu santooʼ. a Utiaʼal u béeykuntik Dios tuláakal u promesaʼobeʼ ku meyajtiʼ u espíritu santo, leloʼ ku tsʼáaiktoʼon esperanza. Le espíritu santooʼ ku yáantkoʼon xan utiaʼal ka yanaktoʼon jatsʼuts modos jeʼex le kiʼimak óolaloʼ yéetel le jeetsʼeliloʼ (Gálatas 5:22).

 U libroil Romanoseʼ junpʼéel carta tsʼíibtaʼab utiaʼal le cristianoʼob kajaʼanoʼob Romaoʼ. Yanoʼobeʼ judíoʼob kaʼachi yéetel uláakʼoʼobeʼ maʼ. Teʼ cartaaʼ Pabloeʼ tu líiʼsaj u yóoloʼob utiaʼal ka múuchʼ meyajnakoʼob kex maʼ junpʼéeliliʼ bix líiʼsaʼabikoʼobiʼ yéetel kex jejeláas baʼax suuk u beetkoʼob (Romanos 15:6).

 Apóstol Pabloeʼ tu kʼaʼajsaj tiʼ le cristianoʼob yanoʼob Romaoʼ de ke Dioseʼ u yaʼalmiliʼ yaan u múuchʼ adorartaʼal tumen máakoʼob ku taaloʼob tiʼ jejeláas luʼumiloʼob. Utiaʼal u yeʼesiktiʼob jach jaaj le baʼax tu kʼaʼajsajtiʼoboʼ cuatro u téenel tu chʼaʼchiʼitaj le Tsʼíiboʼob ich Hebreooʼ b (Romanos 15:9-12). Apóstol Pabloeʼ u kʼáat ka u naʼatoʼob kaʼacheʼ tuláakal máak ken u jóoʼs u yutsil le baʼaxoʼob tu kaʼansaj Jesúsoʼ, maʼ chéen le judíoʼoboʼ. Le oʼolal le cristianoʼob yanoʼob teʼ múuchʼulil yaan Romaoʼ unaj kaʼach u kʼankubaʼob yéetel kiʼimak óolal, u paklan yaabiltikubaʼob yéetel u yeʼesik u yutsiloʼob (Romanos 15:7).