Tu kʼiiniloʼob 13 tak 16 tiʼ noviembre tiʼ 2014, teʼ Centro Metropolitano de Convenciones yaan tu kaajil Torontooʼ bisaʼab eʼesbil libroʼob de juʼun bey xan le ku xoʼokloʼob tiʼ computadora wa tabletoʼ. Teʼeloʼ maas tiʼ 20,000 máakoʼob binoʼobiʼ.

U j-jaajkunajoʼob Jéeobaeʼ binoʼob xan u yeʼesoʼob le libroʼob yaantiʼoboʼ. Utiaʼal lelaʼ tu bisoʼob junpʼéel puesto jatsʼuts, tuʼux tu tsʼáajoʼob tak tabletoʼob utiaʼal u yeʼeskoʼob tiʼ le máakoʼob bix jeʼel u meyajtiʼob le kúuchil ich Internet jw.org.

Juntúul tiʼ u encargadoil le feriaoʼ tu yaʼalaj: «Le kúuchil ich Internet yaanteʼexoʼ jach moderno. Le uláakʼ máaxoʼob tu taasoʼob libroʼob teʼ feriaoʼ kexiʼ ka u kanoʼob bix a kʼaʼaytik a publicacioneʼexoʼ». Yaʼab máakoʼobeʼ tu yaʼaloʼobeʼ jach jatsʼuts le kúuchil jw.org yéetel chéen chʼaʼabil u meyaj tiʼ máak. Teʼeloʼ ku tsʼaʼabal u núukil kʼáatchiʼob jach kʼaʼanaʼantak. Jatsʼuts tu yililoʼob xan le áantaj ku tsʼaʼabal tiʼ máak yéetel le problemaʼob wa chiʼichnakiloʼob yaantiʼoboʼ.

Le j-Jaajkunajoʼob atendertik le puestooʼ tu tsʼáajoʼob cuenta yaʼab máakoʼob maʼ u kʼaj óoloʼob kaʼach le kúuchil jw.org. Le oʼolal tu tsʼáajoʼob tiʼob u chan tarjetail le jw.org bey xan le tratado ¿Tuʼux jeʼel a kaxtik u núukil le kʼáatchiʼob maas taak a wojéeltikoʼ? Tsʼoʼoleʼ yaʼab tiʼ letiʼobeʼ tu yaʼaloʼob yaan u kaʼa ookloʼob jw.org yéetel uláakʼoʼobeʼ tu kʼáatoʼob ka xíimbaltaʼakoʼob tu yotochoʼob.

Como viernes kʼiinbesaʼab le mejen paalaloʼob (día del niño) teʼ feriaoʼ, le j-Jaajkunajoʼoboʼ tu tsʼáajoʼob chaʼantbil le videoʼob Dibujoʼob ku péekoʼob tsʼaʼan jw.org. Yaʼab tiʼ le mejen paalaloʼob yéetel u maestroʼoboʼ náatsʼ u chaʼantoʼob.

Juntúul máak chicagoil ku meyaj tiʼ junpʼéel empresa ku imprimirtik bibliaʼobeʼ, tu felicitartaj le j-Jaajkunajoʼoboʼ tumen jach maʼalob beetaʼanik le Biblia U Suttʼaanil Túumben Luʼum tu yilaj teʼ puestooʼ. Hasta tu kʼáataj junpʼéel tarjeta utiaʼal u tʼanik le máaxoʼob beet le Bibliaoʼ.

Le kúuchil jw.org, tsʼaʼan ich maas tiʼ 700 idiomaʼob. Le máaxoʼob binoʼob teʼ feriaoʼ tu yiloʼob ich 16 idiomaʼob: amárico, bengalí, chino, coreano, español, francés, griego, gujarati, hindi, inglés, portugués, sueco, tamil, tigriña, urdu yéetel vietnamita.

Juntúul tiʼ le j-Jaajkunajoʼob atendertik le puestooʼ tu tsʼáaj cuenta maas maʼalob ka eʼesaʼak tiʼ le máakoʼob bix jeʼel u yookloʼob jw.org, maʼ chéen unaj u yaʼalaʼaltiʼobiʼ. «Le feriaaʼ tu tsʼáaj tuʼux k-tsʼáaik kʼaj óoltbil le kúuchil ich Internet yaantoʼonoʼ», tu yaʼalaj le j-Jaajkunajoʼ.