U testigoʼob Jéeobaeʼ, ¿u kʼexmoʼob wa baʼax ku yaʼalik le Biblia utiaʼal ka u apoyart baʼax ku creerkoʼoboʼ?

PAX ICH

Maʼatech. Le baʼax k-kʼexikoʼ letiʼe baʼaxoʼob k-creertik wa k-ilik maʼ bey jeʼex u yaʼalik le Bibliaoʼ.

Tuláakal baʼax k-creertikeʼ tiaʼan teʼ Bibliaoʼ. Tu jaʼabil 1950 ka káaj k-jóoʼsik le biblia U Suttʼaanil Túumben Luʼumoʼ, baʼaleʼ desde antes ka káaj k-xakʼaltik tubeel. Utiaʼal leloʼ meyajnajtoʼon le jejeláas bibliaʼob yaan kaʼachoʼ. Koʼox ilik jujunpʼéel baʼaxoʼob k-creertik táanil tiʼ k-jóoʼsik U Suttʼaanil Túumben Luʼum. Teech ken a tsʼáa cuenta wa tiaʼan teʼ Biblia le baʼaxoʼob k-creertikoʼ.

Baʼax k-creertik: Dioseʼ maʼ junpʼéel Trinidadiʼ. Le revista Zion’s Watch Tower (bejlaʼeʼ U Pʼíich Tulumil Kanan) jóokʼ julio tiʼ 1882, tu yaʼalaj: «Le máaxoʼob xokik le revistaaʼ u yojloʼobeʼ kex k-creertik Jéeoba, Jesús yéetel le kiliʼich muukʼoʼ [wa espíritu santo], maʼ t-creertik wa óoxtúul dios ichil juntúuliʼ, tumen junpuliʼ maʼ bey u kaʼansik le Bibliaoʼ».

Baʼax ku yaʼalik le Bibliaoʼ: «Jéeoba k-Dioseʼ juntúuliliʼ Jéeoba» (Deuteronomio 6:4, Reina Valera, 1865). «Chéen juntúuliliʼ Jajal Dios yaan, le Taataoʼ. Le Taataoʼ tu beetaj tuláakal baʼal, toʼoneʼ yanoʼon utiaʼal letiʼ. Yaan xan chéen juntúuliliʼ Yuumtsil, Jesucristo.» (1 Corintoiloʼob 8:6, El Nuevo Testamento de Nuestro Señor Jesucristo ich Maya; túumbenkuntaʼan u tsʼíibil.) Tsʼoʼoleʼ tak Jesús tu yaʼalaj: «Le Taataoʼ maas nojoch tiʼ teen» (Juan 14:28, Torres Amat).
Baʼax k-creertik: le kʼasaʼanoʼoboʼ maʼ tu tóokaʼaloʼob mantatsʼ teʼ infiernooʼ. Le revista Zion’s Watch Tower jóokʼ junio tiʼ 1882, tu taasaj le xook ku kʼaabaʼtik «U boʼolil le kʼebanoʼ kíimil». Le tʼaanoʼobaʼ chʼaʼab tiʼ baʼax ku yaʼalik Romailoʼob 6:23. U xookil le revistaoʼ tu yaʼalaj: «¡Jach séeb u naʼataʼal le tʼaanoʼobaʼ! Maʼ t-naʼatik baʼaxten yaʼab máakoʼobeʼ kex ku yaʼalikoʼob ku creertikoʼob baʼax ku yaʼalik le Bibliaoʼ ku pechkuba u yaʼaloʼob maʼ beyiʼ; ku creertikoʼob yéetel ku kaʼanskoʼobeʼ u boʼolil le kʼeban según bin baʼax ku yaʼalik le Bibliaoʼ letiʼe u kuxtal máak mantatsʼ ichil le infiernooʼ».

Baʼax ku yaʼalik le Bibliaoʼ: «Le máax ku kʼebanchajleʼ letiʼ bíin kíimik» (Ezequiel 18:4, 20, Quiliʼich Biblia, túumbenkuntaʼan u tsʼíibil). Le u tsʼook castigo ken u tsʼáa Dios tiʼ le kʼasaʼanoʼoboʼ letiʼe «xuʼulsajil utiaʼal mantatsʼ[oʼ]», wa jeʼex u yaʼalik El Nuevo Testamento de Nuestro Señor Jesucristo ich Mayaoʼ, «saʼatalil minaʼan u xuul» (2 Tesalonicailoʼob 1:9).
Baʼax k-creertik: u Reino Dioseʼ junpʼéel gobierno, maʼ junpʼéel baʼax yaan t-puksiʼikʼaliʼ. Yoʼolal u Reino Dioseʼ le revista Zion’s Watch Tower jóokʼ diciembre tiʼ 1881, tu yaʼalaj: «Ken tsʼaʼabak le reinoaʼ, yaniliʼ u luʼsaʼal tuláakal le uláakʼ reinoʼob [wa gobiernoʼob] yanoʼob way Luʼumeʼ».

Baʼax ku yaʼalik le Bibliaoʼ: «Tu kʼiiniloʼob u méekʼtáanoʼob le ajawoʼoboʼ [wa reyoʼob], u Kʼu [wa u Diosil] kaʼaneʼ bíin u líikʼes junpʼéel ajawil [wa reino] mix bikʼin bíin xuʼulsaʼakiʼ, bíin pʼáatak utiaʼal minaʼan u xuul, mix bíin tʼonkíintaʼak tumen mix junpʼéel múuchʼ kaaj, baʼaleʼ yaan u xuʼulsik junpuliʼ tuláakal le uláakʼ ajawiloʼoboʼ» (Daniel 2:44, Quiliʼich Biblia, túumbenkuntaʼan u tsʼíibil).

¿Chéen wa U Suttʼaanil Túumben Luʼum apoyartik baʼax ku creertik u testigoʼob Jéeoba?

Maʼ. U testigoʼon Jéeobaeʼ láayliʼ ku meyajtoʼon uláakʼ bibliaʼob utiaʼal k-tsolik baʼax k-creertik. Jaaj, ken k-aʼal tiʼ wa máax wa jeʼel u xook t-éeteleʼ k-aʼalik xan jeʼel k-tsʼáaiktiʼ gratis junpʼéel biblia U Suttʼaanil Túumben Luʼumeʼ. Pero wa yaan máax u kʼáat u xok yaanal biblia ken xooknak t-éeteleʼ, maʼ t-aʼaliktiʼ wa maʼ tu béeytal.