Qué ruzeeteʼ Biblia zanda gutiidiʼ binni baʼduʼ. Peru lu caadxi versículo stini riete ximodo ruuyaʼ Dios guendanabani stiʼ binni dede né xquendanabani stiʼ ti ba’duhuiini’ ni ca’ru’ gale.

 Ti regalu stiʼ Dios nga guendanabani (Génesis 9:6; Salmo 36:9). Ne rusisaca Dios guiráʼ ni nabani, dede né xquendanabani stiʼ ti ba’duhuiini’ nuu ndaaniʼ jñaa. Nga runi tuuxa ni ruuti ti ba’duhuiini’ ni ca’ru’ gale la? reeda gaca ti binni ni ruuti.

 Ley bidii Dios ca israelita que ná: «Pa tinde chupa hombre ne guninacaʼ ti gunaa nacaxiiñiʼ ne guni nga gale xiiñibe ante guizaa xpeeuʼ peru nabani guirópacabe la? ni napa donda ca napa xidé quixe ca dañu bi’ni’, biaʼ naʼ xheelaʼ gunaa ca. Zaguixe biaʼ naʼ ca juez. Peru pa gueeda gati tobi de laacabe la? óraque napa xidé gudiiluʼ guendanabani pur guendanabani» (Éxodo 21:22, 23). a

•  ¿Pora nga ruzulú guendanabani?

•  ¿Ñee runi perdonar Dios tuuxa ni maʼ bitiidiʼ baʼduʼ la?

•  ¿Ñee malu nga gutiidiʼ binni baʼduʼ pa nuu xquendanabani stiʼ gunaa ca o stiʼ ba’duhuiini’ ca ra naxoo la?

 Para Dios la? ruzulú guendanabani dede ora cayáʼ ba’duhuiini’ ca ndaaniʼ jñaa o dede ora racaxiiñi’ gunaa ca. Biblia ná dede né ca ba’duhuiini’ nuu ndaaniʼ jñaa maʼ nácacaʼ ti binni. Guidúʼyanu caadxi ejemplu ni rusihuinni para Dios la? biaʼca risaca xquendanabani stiʼ ti ba’duhuiini’ ni nuu ndaaniʼ jñaa ne stiʼ ti ba’duhuiini’ ni maʼ gule.

•   Bicaa Dios rey David guiníʼ ca diidxaʼ riʼ: «Biiyaluʼ naa dxi nácaruaʼ ti embrión» (Salmo 139:16). Ndiʼ riníʼ maca dede ante gale David biiyaʼ Dios laabe casi ti binni.

•   Guzéʼtenu sti ejemplu. Maca dede ante gale profeta Jeremías gulí Dios laa para guni ti dxiiñaʼ nabé risaca. Gudxi Dios laabe: «Ante guzayaʼ lii ndaaniʼ jmatriz stiʼ jñaaluʼ binebiaʼyaʼ lii; ne, ante gáleluʼ, bisisacaʼ lii. Bineʼ lii profeta para ca nación ca» (Jeremías 1:5).

•   Lucas, ti hombre ni bicaa Biblia ne laaca guca doctor, biquiiñeʼ diidxaʼ ba’duhuiini’ para guiníʼ de ti ba’duhuiini’ ni nuu ndaaniʼ jñaa ne de tobi ni maʼ gule (Lucas 1:41; 2:12, 16).

 Runi perdonar Dios ca ni maʼ bitiidiʼ baʼduʼ. Pa gúʼyacaʼ guendanabani casi ruuyaʼ Dios ni la? cadi naquiiñeʼ guni sentircaʼ nápacaʼ donda. Biblia ná: «Jehová nga ti Dios ni napa misericordia ne ni riá binni [...]. Biaʼca zitu nuu de ra rindani gubidxa ne dede ra riaaziʼ ni, biáʼcaca nga zitu riguíxhebe ca pecadu stinu de laanu» (Salmo 103:8-12). b Runi perdonar Jehová ca ni raca arrepentir de guidubi ladxidóʼ de ca pecadu ni biʼniʼ dxiqué casi guendarutiidiʼ ba’du’ (Salmo 86:5).

 Biblia ná nabé risaca nga guendanabani stiʼ ti ba’duhuiini’ ni ca’ru’ gale, nga runi gastiʼ riʼ nin ti razón para gutiidiʼ binni ba’du’ neca nuu xquendanabani stiʼ gunaa o ba’duhuiini’ ca ra naxoo.

 Yanna, ¿xi zanda gaca pa maʼ chigapa gunaa ca xiiñiʼ ne málasi chuʼ xquendanabánibe ne xquendanabani stiʼ ba’duhuiini’ ca ra naxoo yaʼ? Qué rizaaca peʼ ndiʼ, peru pa málasi guizaaca ni la? maʼ guendaxheelaʼ ca nga guiníʼ tuu guilá, pa gunaa ca la? o ba’duhuiini’ ca.