Pecadu nga guiníʼ ique binni ni cadi jneza o guni xiixa cosa malu ni que riuulaʼdxiʼ Dios (1 Juan 3:4; 5:17). Biblia ná zanda gueeda gaca pecadu ca ti cosa malu o xiixa ni cadi biaʼsi ruuyaʼ Dios (Santiago 4:17).

 Lu ca idioma original stiʼ Biblia, raca traducir diidxaʼ «pecadu» casi gucheecabe ra gundaacabe xiixa. Guzéʼtenu ti ejemplu, lu Biblia riete de ti grupu de soldadu israelita ni nanna iquiiñe guixhe bixeendaʼ ne qué rucheecaʼ ora rundaacaʼ ti guié. Pa ñaca traducir diidxaʼ riʼ de ti modo literal niníʼ ni: «qué runi pecar caʼ» (Jueces 20:16, Nueva Biblia Española). Nga runi zanda guininu ora qué runi binni ni ná Dios la? maʼ cuchee.

 Cumu Dios nga bizáʼ laanu la? nápabe derechu de quíxhebe xi gúninu (Apocalipsis 4:11). Ne pur ni gúninu, zabídxibe cuenta laanu (Romanos 14:12).

¿Ñee zanda guibani binni sin guchee la?

 Coʼ, purtiʼ Biblia ná «napa guiráʼ binni pecadu, ne qué rusihuínnicaʼ gloria stiʼ Dios» (Romanos 3:23; 1 Reyes 8:46; Eclesiastés 7:20; 1 Juan 1:8). ¿Xiñee rizaaca ndiʼ yaʼ?

 Dxi bizáʼ Dios Adán ne Eva, bizaʼbe laacaʼ perfectu casi laabe (Génesis 1:27) . Peru dxi maʼ qué nuzuubacabe stiidxaʼ Dios, bisaana de gácacabe perfectu (Génesis 3:5, 6, 17-19). Ne dxi gúpacabe xiiñicabe laaca gúcacaʼ binni ruchee purtiʼ gulenecaʼ pecadu (Romanos 5:12). Ne casi guníʼ rey David: «Maca binni ruchee naa dxi guleʼ» (Salmo 51:5).

¿Ñee nuu pecadu jma feu que xcaadxi la?

 Nuu, guzéʼtenu ti ejemplu, Biblia ruzeeteʼ nabé malu ca binni de Sodoma, nabé rucheecaʼ ne guizáʼ feu ca pecadu ni rúnicaʼ (Génesis 13:13; 18:20). Guidúʼyanu chonna cosa ni zacané laanu gánnanu pabiáʼ naxoo nga ti pecadu.

1.   Nabé malu. Biblia ná nin ca binni ni runi cometer pecadu sexual, nin ca ni runi adorar bidóʼ, nin ca gubaanaʼ, nin ca binnigüeʼ, nin ca ni runi extorsionar, nin ca ni ruuti ne nin ca binni ni runi practicar espiritismo qué ziuucaʼ lu Reinu stiʼ Dios. De guiráʼ ni bizéʼtenu riʼ zeeda gaca ca ni pecadu nabé malu ni cadi naquiiñeʼ gúninu (1 Corintios 6:9-11; Apocalipsis 21:8 ). Biblia ná maʼ gadxé ca pecadu ni bizéʼtenu riʼ de ca pecadu ni runi binni sin ganna, casi guiníʼ o guni xiixa ni guniná sti binni (Proverbios 12:18; Efesios 4:31, 32). Peru laaca caguixhená Biblia laanu cadi guiníʼ íquenu cadi malu peʼ ti pecadu, purtiʼ pa gúninu ni la? zucaani laanu guníʼ cometernu sti pecadu jma naroʼbaʼ (Mateo 5:27, 28).

2.   Xi pur runi binni ni. Stale binni runi cometer pecadu purtiʼ qué runibiaʼcaʼ ca ley stiʼ Dios (Hechos 17:30; 1 Timoteo 1:13). Neca qué runi justificar Biblia ca tipu pecadu riʼ la? maʼ gadxé ca ni de ca tipu pecadu ni runi binni neca nánnacaʼ cadi jneza ca ni (Números 15:30, 31). Ne Biblia ná ca binni ni ruyubi peʼ guni cometer ti pecadu, malu ladxidoʼcaʼ (Jeremías 16:12).

3.   Ora raca ni gatigá. Biblia ná maʼ gadxé guni pecar binni ti biaje si ne gadxé guni cometer ngueca pecadu stale biaje (1 Juan 3:4-8). Ne runi condenar Dios ca binni ni qué rusaana de guchee neca maʼ biziidicaʼ cadi jneza gúnicaʼ ni (Hebreos 10:26, 27).

 Zándaca nabé naná nuu ladxidóʼ ca binni ni huayuni cometer pecadu nabé malu. Guzéʼtenu ti ejemplu, rey David bicaa: «Purtiʼ puru si ca donda stinneʼ nuu ndaaniʼ iqueʼ; nanaa ca ni, nabé nanaa ca ni para naa» (Salmo 38:4). Peru lu Biblia nuu ti esperanza nabé galán, raca ná: «Lagaca arrepentir purtiʼ nuu Dios dispuestu guni perdonar; riabe laatu. Guchaa ca binni malu xpiaʼcaʼ ne gusaanacaʼ de gúnicaʼ cosa ni cadi jneza» (Isaías 55:7, Traducción en lenguaje actual).