NDAA 10
Ximodo zanda ganna binni gunáʼ nga religión ni rusiidiʼ ni dxandíʼ
1. Ñee nuu ti religión si ni rusiidiʼ ni dxandíʼ la?
«Laguuya gá laatu ne ca profeta ni [...] cadi dxandí.» (MATEO 7:15)
Jesús ne ca discípulo stiʼ ti religión si nga gúpacaʼ, ne laani nga religión ni rusiidiʼ ni dxandíʼ. Laabe guniʼbe zeeda gácani casi ti neza ni riné binni lu guendanabani ne huaxiéʼ tu ridxela ni (Mateo 7:14). Ziuulaʼdxiʼ Dios modo cayuni adorarnu laa pa cayúninu ni cásipeʼ rusiidiʼ Biblia, Stiidxabe. Ne cani runi adorar laabe zácacaʼ tobi si lu cani runi crecaʼ. Biindaʼ Juan 4:23, 24; 14:6, ne Efesios 4:4, 5.
Biiyaʼ videu ni láʼ ¿Ñee jneza ruuyaʼ Dios guiráʼ religión la?
2. Xi guníʼ Jesús zuni cani cadi dxandíʼ xpinni Cristu
«Na ca runi cre ca Dios, peru pur ni runi ca rihuinni cadi dxandí ni.» (TITO 1:16)
Jesús maca guníʼ ziuu profeta ni zusiidiʼ ni cadi dxandíʼ lade ca xpinni Cristu. Ca binni riʼ ne ca yuʼduʼ sticaʼ laaca riniʼcaʼ xpinni Dios laacaʼ. Neca riníʼcabe rusiidicabe ni dxandíʼ la? peru riguitesícabe binni. Ximodo zanda ganna binni gunáʼ nga religión ni rusiidiʼ ni dxandíʼ yaʼ. Ra gunibiaʼnu ca binni nuu ndaaniʼ ni purtiʼ rihuinni dxíchica lu xquendanabánicaʼ laacaʼ nga cani dxandíʼ xpinni Cristu. Biindaʼ Mateo 7:13-23.
3. Ximodo zanda gunibiaʼluʼ tuu nga cani nuu lu religión ni rusiidiʼ ni dxandíʼ
Guidúʼyanu gaayuʼ cosa ni zacané laanu gunibiaʼnu laacabe:
-
Runi respetárcabe Biblia casi Stiidxaʼ Dios. Qué rinándacabe ni rusiidiʼ binni guidxilayú, sínuque rúnicabe stipa pur chinándacabe ni na ca conseju zeeda lu Biblia (Mateo 15:7-9). Ne rúnicabe guiráʼ ni rusiidicabe lu xquendanabánicabe. Biindaʼ Juan 17:17 ne 2 Timoteo 3:16, 17.
-
Rusisácacabe lá Dios, Jiobá. Ne nga nga ni biʼniʼ Jesús ora bisiidiʼ binni tu láʼ Bixhoze. Bisiidibe ca binni que de Jiobá ne gúdxibe laacaʼ guinábacaʼ lu oración sticaʼ guisaca lá Dios (Mateo 6:9). Xi religión nuu neza ra nabézaluʼ riquiiñeʼ lá Dios yaʼ. Biindaʼ Deuteronomio 32:3.
-
Riniʼcaʼ de Reinu stiʼ Dios. Jesús beeda lu Guidxilayú para guiníʼ de ca diidxaʼ sicarú chiguni Reinu stiʼ Dios, ne laani nga tobi lucha ni zanda gacané binni guidxilayú. Laabe bisiidibe de laani dede dxi gútibe (Lucas 4:43; 8:1; 23:42, 43). Laaca gúdxibe ca discípulo stibe guiniʼcaʼ de Reinu ca. Pa cheʼ tuuxa ra nuuluʼ ne guiniʼné lii de Reinu stiʼ Dios, xi religión rábiluʼ nápabe yaʼ. Biindaʼ Mateo 24:14.
-
Cadi de guidxilayú malu riʼ laacaʼ. Ca discípulo stiʼ Jesús qué riuucaʼ lu política ne qué riuucaʼ lade binni ni ridindesaa (Juan 17:16; 18:36). Laaca qué rúnicabe guiráʼ cosa ni runiná binni ne qué rinándacabe xpiaʼcaʼ. Biindaʼ Santiago 4:4.
-
Rihuinni nadxiisaacabe. Maʼ bisiidiʼ Stiidxaʼ Dios laacabe guni respetárcabe guiráʼ binni neca gadxé gadxé raza laacaʼ. Ca religión ni qué rusiidiʼ ni dxandíʼ nabé riuucaʼ lu guendaridinde, peru cani dxandíʼ xpinni Cristu qué rúnicaʼ ni (Miqueas 4:1-3). Ni rúnicabe nga riquiiñecabe tiempu stícabe ne cani nápacabe para gacanécabe binni ne uguucabe gana laacaʼ, ne rúnicabe cani sin cuézacabe guicaacabe xiixa. Biindaʼ Juan 13:34, 35 ne 1 Juan 4:20.
4. Ñee zanda gannuʼ gunáʼ nga religión ni rusiidiʼ ni dxandíʼ la?
Xi religión nga riquiiñeʼ Biblia lu guiráʼ ni rusiidiʼ, rusisaca lá Dios ne rusiidiʼ Reinu si ni nuu guibáʼ nga zanda gacané binni guidxilayú yaʼ. Ñee nannuʼ xi religión nga dxandíʼ nadxiisaa ca xpinni ne qué riuucaʼ lu guendaridinde la? Gunáʼ nga religión raʼbuʼ runi zacá yaʼ. Biindaʼ 1 Juan 3:10-12.
