LIBRU stiʼ Apocalipsis, neni caadxi diidxaʼ ni cadi naquiiñeʼ guiénenu cásipeʼ modo laacani. Tobi de laacani nga ti gunaa ni riuuné caadxi hombre ne lucuabe cá «Babilonia, guidxi roʼ». Ne libru ca na zúbabe luguiáʼ «guidxi ne binni» (Apocalipsis 17:1, 5, 15). Peru pa ñaca dxandíʼ ti gunaa laabe la? qué ñanda nibibe luguiáʼ guidxi ne binni, nga runi Babilonia guidxi roʼ ca cadi dxandíʼ ti gunaa ni. Yanna, xii nga zeeda gaca ni yaʼ.

Lu Apocalipsis 17:18 cusiene laani nga ti guidxi roʼ ni «runi mandar [...] irá rey ni nuu ndaani guidxilayú». Ora gunadiáganu diidxaʼ «guidxi» riníʼ íquecanu ra nuu stale binni.  Ne «guidxi roʼ» riʼ runi mandar ni «irá rey ni nuu ndaani guidxilayú». Nga runi, Babilonia guidxi roʼ zeeda gaca ni ti grupu ni cayuni mandar lu guidubi naca Guidxilayú. Peru, tuu nga cani runi mandar yaʼ. Nga nga ti grupu de religión. Guidúʼyanu ximodo racané caadxi ejemplu ni zeeda lu libru stiʼ Apocalipsis laanu para gánnanu jneza nga ni maʼ guninu.

Nuu grupu de políticu, de negocio o de religión ni runi mandar stale binni. Peru Babilonia guidxi roʼ cadi de política ni, purtiʼ Stiidxaʼ Dios na «uyuu né [gunaa riʼ] cani runi mandar ndaani guidxilayú», o ca políticu stiʼ Guidxilayú. Riuunebe ca gobiernu stiʼ Guidxilayú riʼ ora tobi si runinebe laacaʼ dxiiñaʼ ne huayúnibe intiica cosa ti gápabe poder luguiacaʼ ne gúnicaʼ ni nabe. Nga runi, zanda guiénenu xiñee rábicabe laabe gunaa ni riuuné stale hombre (Apocalipsis 17:1, 2; Santiago 4:4).

Biblia na ora guinitilú gunaa ca zacaná ladxidóʼ «cani rutoo ndaani guidxilayú». Nga ruluíʼ cadi ti grupu de negocio nga Babilonia guidxi roʼ. Ne ca textu stiʼ Biblia na zuyadxí si ca rey ne cani rutoo laabe «de zitu» (Apocalipsis 18:3, 9, 10, 15-17). Nga runi, cadi de negocio nga Babilonia ni caninu, sínuque de religión.

Chiguidúʼyanu sti cosa ni cayabi laanu naca ni de religión: rieeteʼ laabe nga cusiguiibe ca guidxi ca né «brujería» stibe (Apocalipsis 18:23). Guiráʼ ni rúnicabe casi brujería zeeda cani de ca demonio. Nga runi, cadi guendaridxagayaa diʼ nga rieeteʼ naca Babilonia «lidxi binidxaba ne ca espíritu stiʼ» (Apocalipsis 18:2; Deuteronomio 18:10-12). Babilonia guidxi roʼ nabé rucaalú religión ni dxandíʼ, purtiʼ ridúʼyanu rizananda ni «cani byuíʼ stiidxa Dios ne ca xpinni» (Apocalipsis 18:24). Cumu nabé nanaláʼdxibe religión ni dxandíʼ ca la? dede ruutibe «cani [...] canayuíʼ stiidxa Jesús» (Apocalipsis 17:6). Nga runi, dxandíʼ nga zeeda gaca Babilonia guidxi roʼ ca guiráʼ religión ni cadi dxandíʼ ne lade cani nuu ca religión ni cucaalú Jiobá Dios.