Bisihuinni guendarannaxhii
Ni rizaaca
Cadi nagueenda diʼ rusaana binni de gapa prejuiciu. Zeeda gaca ni casi ti virus, riquiiñeʼ tidiʼ tiempu ne naquiiñeʼ gaca stipa para gudxiilú binni ni. Nga ca nga naquiiñeʼ gúninu para gudxíʼlunu prejuiciu. Peru ¿xi caquiiñeʼ gúninu para maʼ cadi lica gápanu ni yaʼ?
Conseju zeeda lu Biblia
«Gápatu amor, purtiʼ dxandíʼ racané ni binni chuʼ unidu» (COLOSENSES 3:14).
¿Xi riníʼ ni? Riuu binni tobi si ora runi cosa galán pur xcaadxi. Pa gannaxhiiluʼ xcaadxi ne gusihuínniluʼ ni la? chaahuidugá zusaana de gápaluʼ prejuiciu ne qué zaca nanaláʼdxiluʼ binni.
Ni zanda gúniluʼ
Guníʼ ique ximodo zanda gusihuínniluʼ guendarannaxhii ca binni ni nuu lu ti grupu ni qué riuuláʼdxiluʼ guidxaagaluʼ. Cadi caquiiñeʼ peʼ gúniluʼ cosa nagana. Zanda gúniluʼ ni zeeda raríʼ:
Ra jma gusihuínniluʼ nadxiiluʼ xcaadxi, jma huaxiéʼ zápaluʼ prejuiciu.
Bisihuinni nápaluʼ respetu laacabe, zanda guxhéleluʼ puertaʼ para chúʼcabe o gudiiluʼ laacabe lugar ra zúbaluʼ ndaaniʼ autobús.
Biyubi güíneluʼ laacabe diidxaʼ, neca huaxiéʼ galán riníʼcabe stiidxaluʼ.
Gupa paciencia ora gúnicabe xiixa ni qué riéneluʼ.
Bicaadiaga chaahuiʼ laacabe ne biʼniʼ stipa guiéneluʼ guendanagana ni cadíʼdicabe.
Laaca zándaca ziuuláʼdxiluʼ ca ndiʼ
¡GUTANÁ!
Conseju ni zacané laanu chuʼnu en paz né xcaadxi binni
¿Gunáʼ nga ca cualidad ni zacané laanu gaca llevarnu bien né xcaadxi?
