XI ZACANÉ LII GATADXÍ LADXIDOʼLOʼ ORA GATIʼ TI FAMILIA STILUʼ

Ni jma racané binni ora gatiʼ tuuxa ni nadxii

XHÍDXINI LU

LU CA IZA NI HUADIʼDIʼ CA, NABÉ HUAYUNI INVESTIGÁRCABE XI RACANÉ BINNI DESPUÉ DE GATIʼ TUUXA NI NADXII. Peru, casi maʼ bidúʼyanu, stale conseju ni rudii ca especialista ca maca xadxí gucuá ca ni lu Biblia. Ne ndiʼ rusihuinni, dede yanna zanda gacané ca conseju stini laanu. Peru cadi conseju si nga zeeda lu Biblia, laaca neni información ni qué zanda guidxélanu sti lugar ni zanda quixhedxí ladxidóʼ ca ni gutiʼ tuuxa binni ni nadxii. Guzéʼtenu chupa chonna.

Cadi cayacaná ca binni ni nadxiinu ni maʼ guti.

Lu Eclesiastés 9:5, Biblia cayabi laanu «ca ni maʼ guti la? qué lica gánnacaʼ gastiʼ». Maʼ qué zanda guiníʼ íquecabe (Salmo 146:4). Nga runi, Biblia ruchaaga guendaguti casi ora nisiaasiʼ binni (Juan 11:11).
Ratadxí ladxidoʼno ora gápanu fe Dios ni nadxii laanu.

Biblia cayabi laanu: «Guielú Jehová * cayuuyaʼ ca binni runi ni jneza, ne rucaadiágabe ora rinábacaʼ gacanebe laacaʼ» (Salmo 34:15). Cadi para si guinínenu Dios ne gábinu laa xi cayácanu nga ora runi orarnu. Sínuque para gaca xhamígunu laabe, Dios ni bizáʼ laanu, ni zanda iquiiñeʼ poder stiʼ para quixhedxí ladxidoʼno.
Zedandá dxi zabáninu jma galán.

Stale biaje riete lu Biblia zabani ca ni maʼ guti. Ndiʼ nga ni chiguni Dios para guibani binni jma galán lu Guidxilayú: «Zuchaabe nisa riete lucaʼ, maʼ qué ziuuruʼ guendaguti, maʼ guirutiʼ qué ziuu triste, maʼ guirutiʼ qué zuunaʼ ne maʼ qué ziuuruʼ yuubaʼ» (Apocalipsis 21:3, 4). ¿Ñee ruxuíʼluluʼ pabiáʼ galán zabani binni dxi ca la?

Stale binni ni napa fe Jehová, Dios ni guníʼ xi guicá lu Biblia, maʼ biziidicaʼ zabiguetaʼ zuuyacaʼ ca binni ni nadxiicaʼ ni maʼ guti. Ndiʼ racané laacabe gatadxí ladxidóʼcabe ne guni huantárcabe yuubaʼ ni rusaana guendaguti. Guzéʼtenu ejemplu stiʼ Ann, maʼ zinebe 65 iza de bichaganabe dxi gutiʼ xheelabe. Laabe guniʼbe: «Maʼ biziideʼ lu Biblia cadi cayuni sufrir ca binni ni maʼ guti ne zedandá dxi zusibani Dios laacabe. Cada guietenaladxeʼ xheelaʼ, riuuladxeʼ guiníʼ iqueʼ promesa riʼ. Racaneni naa guneʼ huantar yuubaʼ ni napaʼ».

Tina, gunaa ni maca bizéʼtenu que, guníʼ: «Dede dxi gutiʼ Timo, qué huasaana de gacané Dios naa. Huadiibe stipa naa ora jma peʼ nuaaʼ triste. Runeʼ cré ziuu dxi guibani ca ni maʼ guti ne riguu ni gana naa para guneʼ huantar dede ora guedandá dxi guuyaʼ Timo sti biaje».

Ndiʼ nga ni runi sentir stale binni ni runi cré ni ná Biblia. Pa raca nagana para lii guni creluʼ ni ná Biblia, gulee tiempu para guyúbiluʼ ca prueba ni rusihuinni zanda gacané ca conseju stini laanu ne dxandíʼ ca promesa zeeda luni. Zudiiluʼ cuenta naca Biblia ti libru ni dxandíʼ peʼ racané binni ora gatiʼ tuuxa ni nadxii.